(1) Ales sperses resservades al frabiché abitatif alisiré vëgnel lascè pro l’IPFS y les porsones singules o assoziades te cooperatives che po gnì ametüdes ai alisiramënć aladô dl articul 2. I comuns po adorè les sperses resservades al frabiché abitatif alisiré por fà sö abitaziuns finanziades daldöt o en pert cun sü mesi.131)
(2) Al vëgn inće lascè pro les sozietês y i ënć cun le fin de fà sö, zënza intenziun de davagn, abitaziuns popolares standard da vëne o da dè en afit, inće cun l’impormetüda de venüda tl dagnì, sön la basa de acordanzes cun l’aministraziun provinziala. Chësta acordanza mëss fissé i criters por l’assegnaziun dl’abitaziun, por la determinaziun y la revijiun dl afit sciöche inće por la determinaziun dl prisc de venüda, osservan i prinzips de chësta lege cun garanzies finanziares adatades por ademplì les oblianzes tutes sö.
(3) Canch’al vëgn assegné sperses por le frabiché abitatif alisiré ti vëgnel dè la prezedënza al IPFS che à intenziun de fà sö tl comun abitaziuns adinfit che é preodüdes tl program de costruziun aladô dl articul 22.
(4) Por les domandes de cooperatives por le frabiché y de damananć singui stabilësc i comuns cun regolamënt i terminns y les modalitês por la presentaziun dles domandes, por la formaziun dla gradatöra y inće la mosöra dla spersa da assegné. Implü stabilësc i comuns tl regolamënt i criters de preferënza dles domandes presentades da cooperatives por le frabiché pormez a chëres di damananć singui. Tl regolamënt po i comuns odëi danfora de reconësce dui punć implü por la dorada dla residënza tl comun y che la gradatöra vel al mascimo por trëi agn.
(5) Por acuisì la proprieté de sperses resservades al frabiché abitatif alisiré mëss i comëmbri de cooperatives por le frabiché y i damananć singui ester en possès de chëstes condiziuns:
- avëi la residënza tl comun o avëi le post de laûr tl comun o ti comuns consorzià aladô dl articul 31 dla lege urbanistica dla Provinzia;
- ester en possès dles condiziuns damanades dala lege por gnì lascià pro ai alisiramënć por frabiché dla Provinzia por fà sö n’abitaziun de proprieté y avëi n davagn che ne va nia sura chël dl cuinto scalin de davagn;132)
- arjunje almanco 16 punć aladô dl regolamënt d’esecuziun;
- n’ester nia proprietars y n’avëi nia zedü ti cin agn dan la presentaziun dla domanda n tòch de grunt da frabiché te n post saurì da arjunje che bastass por fà sö n’abitaziun de almanco 495 metri cubich.
(6) A parité de punć vëgnel trat dant i damananć che po mostrè sö, por ći che reverda la condiziun dada dant tl coma 5, lëtra a), la residënza plü lungia.
(7) L’assegnaziun dles sperses por le frabiché abitatif alisiré tla proprieté di damananć o tl dërt de spersa vëgn fata cun deliberaziun dla junta comunala en concordanza cun le program d’atuaziun plurienal y cun le plann d’atuaziun aprovè do l’ordinn dla gradatöra definitiva.
(7/bis) Les sperses destinades al frabiché abitatif alisiré che é de proprieté sóra dla Provinzia o dl IPFS ti vëgn dades en proprieté ai damananć dala Junta provinziala o dal IPFS en acordanza cun le comun competënt te chël raiun.133)
(7/ter) La Junta provinziala po preodëi tl ambit di programs de costruziun, inće bele aprovà, che i raiuns dl frabiché abitatif alisiré pois gnì assegnà, desvian da ći che é gnü stabilì tl coma 5, numer 1), inće a bëgn de damananć cun la residënza te n comun dlungia. Al va debojëgn dl consëns di comuns interessà. 134)
(8) L’assegnaziun dles sperses po gnì fata te döes fases. L’assegnaziun provisora po gnì fata do che le plann d’atuaziun é gnü aprovè y la prozedöra d’espropriaziun é gnüda inviada ia. Sön la basa dl’assegnaziun provisora po les porsones che ciafa en assegnaziun na spersa damanè ch’al ti vëgnes dè la conzesciun da frabiché. L’assegnaziun definitiva en proprieté po pormò gnì fata do ch’al é gnü esproprié les sperses destinades al frabiché abitatif alisiré. Tla deliberaziun d’assegnaziun provisora o tla deliberaziun d’assegnaziun definitiva, sce chëra provisora n’é nia gnüda fata, mëssel gnì verifiché ch’al n’esist nia les rajuns d’estlujiun dades dant tl articul 45, coma 1, lëtres b) y c), y tl coma 5, lëtra d), de chësc articul.
(9) Tratan ch’an aspeta l’assegnaziun definitiva en proprieté po le comun dè l’autorisaziun ales porsones che ciafa en assegnaziun la spersa a ocupé les sperses espropriades y a mëte man i laûrs de costruziun. L’autorisaziun a tó ite la spersa depënn dal paiamënt de n acunt dl 80 porcënt dl prisc de zesciun dla spersa probabl y di cosć de urbanisaziun.
(10) Sön les sperses por le frabiché abitatif alisiré pol ma gnì fat sö abitaziuns che à les carateristiches d’abitaziuns popolares, tut fora les carateristiches desvalies dles abitaziuns por porsones atempades, dles ćiases alberch por lauranć y studënć, dles abitaziuns protezionades y dles abitaziuns coletives.
(11) Les porsones emigrades foradecà bele residëntes tla provinzia dan l’emigraziun por almanco cin agn, sciöche inće süa fomena o so om nia despartis legalmënter, che à intenziun de portè indô la residënza tla provinzia po presentè la domanda d’assegnaziun de grunt tl comun de süa ultima residënza o te chël olach’ai desmostra d’ester bogn de eserzité süa profesciun, süa ocupaziun o so laûr. Por faziun de chësta norma vëgnel conscidré le tëmp de laûr foradecà sciöche fat tl comun.