b) Lege Provinziala di 31 de agost dl 1974, n. 71)2)
Assistënza scolastica. Previdënzes por garantì le dërt da studié

(1) La Junta provinziala aprovëia vigni ann ćina ai 31 de merz le plann de stüdi general di intervënć por realisé le dërt da studié.

(2) Tl plann vëgnel fissé sides i intervënć olache i scolars n’à nia debojëgn de certes condiziuns sogetives o ogetives, sides chi lià a recuisić o a concursc.

(3) La Provinzia sostëgn le dërt da studié cun:

1. stipendiums ordinars;
   
2. stipendiums straordinars;
   
3. la retüda de tasses y contribuć scolastics;
   
4. menses scolastiches;
   
5. libri de scora;
   
6. trasporć de scolars o d’atres alisiraziuns de iade;
   
7. l’assiguraziun;
   
8. sorvisc abitatifs;
   
9. sorvisc de sostëgn y de verda de mituns y jogn fora dal orar de scora;
   
10. provedimënć por mituns y jogn cun handicap;
    
11. vigni ater intervënt por realisé le dërt da studié.
    

(4) I intervënć preodüs dal coma 3, lëtra a), b), c) y e) é por scolars che é te na situaziun economica dejavantajada.

(5) La condiziun economica dejavantajada vëgn fissada aladô dl davagn, dl patrimone y di imporć nia imponibli stabilis dai criters aposta. An tëgn cunt sides dl davagn y dl patrimone dl scolar che de chi de sü geniturs. Sce i geniturs é separà legalmënter o devorzià, mësson tignì cunt dl davagn y dl patrimone dl scolar y dl genitur autorisé al’educaziun. Sce le scolar é orfano de tramidui i geniturs, mësson tignì cunt dl davagn y dl patrimone dl scolar y de che che eserzitëia la potesté dl genitur. Sce le genitur che à la potesté vir adöm cun zacai zënza ester maridà, tëgnon inće cunt dl davagn y dl patrimone dla porsona cun chëra che al vir adöm.

(6) La Junta provinziala stabilësc le davagn mascimal ametü y i criters de valutaziun dl davagn, dl patrimone y di imporć nia imponibli. 3)