f) Lege Provinziala di 18 de merz dl 2013, n. 41)
Ordinamënt nü y ajornamënt dles spëises de rapresentanza

(1) Cun chësta lege vëgnel regolamentè danü y ajornè les spëises de rapresentanza di comëmbri/dles comëmbres dla Junta provinziala y dl ofize de presidënza dl Consëi provinzial, sciöche inće les prozedöres aministratives y contables che alda laprò.

(1) I comëmbri/les comëmbres dla Junta provinziala y dl ofize de presidënza dl Consëi provinzial à a süa desposiziun n fonds por les spëises de rapresentanza.

(1) Les spëises de rapresentanza é d’ütl por mantignì y alzè l’inom dl’istituziun rapresentada dai titolars/dales titolares de na funziun che é en ćiaria. Chëstes é:

1. spëises por ademplì dovëis de ospitabilité cun laprò le trasport, por marënes y bufês te eserzizi publics o te strotöres de na te’ sort o tla sënta dles istituziuns relatives;
   
2. de pices scincundes, sciöche produć tipics dla provinzia, copes, medaies, plachëtes, libri, fotografies, stampes, ciüfs y patüc de chësta sort;
   
3. spëises por festivitês y festes de recort, cun laprò presentaziuns culturales, desmostraziuns de condolianzes sce al mör na personalité publica y personal dependënt, so om/süa fomena o parënć, sciöche inće spëises por chertes d’audanzes en gaujiun de festes y manifestaziuns particolares;
   
4. vigni atra scomenciadia che porta pro a promöie y ti dè valur ala funziun y al’imaja dla Provinzia de Balsan cun laprò le sostëgn dles ativitês de scora;
   
5. spëises por marënes/cënes de laûr tl cheder de ativitês politiches.
   

(2) Por les spëises de rapresentanza che vëgn dal’atuaziun dles scomenciadies o di programs odüs danfora ti capitui dl bilanz de vigni istituziun ne vëgnel nia apliché la regolamentaziun preodüda dal coma 1.

(1) Les spëises vëgn paiades da vigni istituziun o antizipades dal titolar/dala titolara de na funziun y spo retüdes dal’istituziun interessada sce ares vëgn cumprovades da fatures, cubites fiscales, bonns de cassa o atestaziuns dla porsona benefiziada, o a vigni moda a norma de lege.

(1) Inće les spëises de rapresentanza de vigni grup consiliar vëgn manajades aladô dles desposiziuns de chësta lege.

(1) L’amunta de vigni fonds vëgn stabilida ann por ann cun le bilanz dla Provinzia o dl Consëi provinzial.

(1) I cosć che vëgn da chësta lege por la Provinzia vëgn curis cun i stanziamënć de spëisa bele metüs a desposiziun tl bilanz provinzial sön les unitês de previjiun de basa 01105, 06100, 06105, 06110, 09100, 12105, 13100, 19105 y 25105 a ćiaria dl eserzize 2013 y autorisà por i intervënć dà dant tl articul 5 dla lege provinziala di 17 d’agost dl 1989, n. 6, y tl articul 2 dla lege provinziala di 11 d’agost dl 1994, n. 6, abrogà dal articul 8.

(2) La spëisa a ćiaria di agn finanziars che à da gnì vëgn stabilida cun la lege finanziara anuala.

(3) I cosć che vëgn da chësta lege por le Consëi provinzial vëgn curis dal bilanz dl Consëi provinzial instës.

(1) Chësta lege va en forza le dé do süa publicaziun tl Boletin Ofizial dla Regiun. L’articul 5 dla lege provinziala di 17 d’agost dl 1989, n. 6, y l’articul 2 dla lege provinziala di 11 d’agost dl 1994, n. 6, vëgn abrogà cun le medema data, tl respet dles spëises y dles prozedöres desponüdes sön la basa de chisc.

Chësta lege gnarà publicada tl Boletin Ofizial dla Regiun. Vignun a chël che al ti speta é oblié da la respetè y da la fà respetè sciöche lege dla Provinzia.