a) Lege Provinziala di 9 de otober dl 2007, n. 81)
Ordinamënt dl'industria

(1) Aladô de chësta lege minon cun ativités industriales l'eserzize profescional de n'ativité economica organisada por prodüje o trasformé bëgns y pité sorvisc coliá a chisc, cun lapró süa destribuziun y venüda.

(2) Cun regolamënt d'esecuziun pól gní odü danfora condiziuns profescionales spezifiches por eserzité certes ativités industriales, tl respet de normes speziales eventuales.

(1) Les impreses industriales é impreses individuales, sozietés de porsones o de capitai che eserzitëia:

1. öna dles ativités preodüdes dales seziuns C, D, E o F dla classificaziun Ateco dl Istitut nazional de statistica, o
   
2. n'ativité classificada, aladô dla lege provinziala sön l'ordinamënt di sorvisc, sciöche ativité de sorvisc industriai.
   

(2) Les impreses preodüdes dal coma 1 mëss avëi altamo döes de chëstes carateristiches:

1. produziun o sorvisc suradöt en seria;
   
2. organisaziun aziendala despartida te n'unité produtiva y te n'unité aministrativa cun na gestiun despartida dles unités y dl personal y colaboraziun eventuala dl imprenditur limitada ales ativités de direziun.
   
3. produziun de bëgns y desfiramënt de sorvisc cun dandadöt na spartiziun dl laur sistematica.
   

(1) L'iscriziun dles impreses tl Register dl comerz dla Ciamena dl comerz, dl'industria, dl artejanat y dl'agricoltöra vëgn a se le dé tres l'atribuziun dl codesc Ateco dl Istitut nazional de statistica che alda lapró.

(1) La competënza por l'aplicaziun dles sanziuns aministratives odüdes danfora dales normes statales y provinziales, sce al vëgn eserzité n'ativité industriala zënza avëi les condiziuns profescionales preodüdes, ti vëgn delegada ala Ciamena dl comerz, dl’industria, dl artejanat y dl'agricoltöra de Balsan, a chëra che al ti röia les entrades che alda lapró.

Chësta lege gnará publicada tl Boletin Ofizial dla Regiun. Vignun a chël che al ti speta mëss la respeté y la fá respeté sciöche lege dla Provinzia.