(1) Ora che per cie che ie udù danora tl coma 6 prejentea chi che nuza eghes publiches y uel dejëujer variazions pra na derivazion bele recunesciuda o data n cunzescion na dumanda al ufize cumpetënt dl’Agenzia provinziela per l ambient. 5) 20)
(2) Variantes sustanzieles vën cunscidredes chëla mudazions che reverda la mudazion dl fin dl’adurvanza, l avanamënt, ënghe sce mé te fases singules dl tëmp de nuzeda, dla cuantità dl’ega cunzeduda o recunesciuda, l slungiamënt dl tëmp de nuzeda, l mudamënt dla nuzeda o l avanamënt dla putënzia numinela. Ala variantes vëniel aplicà duta la despusizions ududes danora per la cunzescions nueves. Stlutes ora da chësc ie, tl cajo de stënta d’ega, la derivazion d’ega per fins agricui coche udù danora dal articul 12. 21)
(3) Uni dumanda de varianta sustanziela n referimënt a na dumanda de derivazion d’ega che ie tl lëur de unì ejamineda vën rateda cun duta si fazions na dumanda nueva che remplazea la prima. 22)
(4) Dal ufize cumpetënt dl’Agenzia provinziela per l ambient 5) vëniel autorisà chësta mudazions n referimënt a:
- frabica, ressanamënt o miuramënc de mplanc de captazion d’eghes de surfazia;
- frabica o ressanamënt de mplanc de refurnimënt d’ega da bever publica, ora che la rë de destribuzion y i cunliamënc ala frabiches zeviles. L’autorisazion vën data ora, do che l ie unit audì la cunferënza di servijes nunziei tl articul 3, coma 6. L’autorisazion remplazea cun duta si fazions uni autra autorisazion, arat, vist o nulla osta, ora che la pruzedura VDA, ulache ududa danora, y l arat dla cumiscion cumenela per l frabiché. 22) 23)
(5) L ufize cumpetënt dl’Agenzia provinziela per l ambient 5) dà n arat lient per la frabica o l ampliamënt de resservares majeri de 5.000 metri cubics. 24)
(6) L ti vën mé comunicà danora al ufize cumpetënt dl’Agenzia provinziela per l ambient 5) la mudazions relatives a:
- 25)
- l’estenscion dla spersa d’irigazion, dl raion de refurnimënt dla rë d’ega da bever publica y dla spersa sun chëla che l dëssa unì fat nëif artifiziela, zënza che la derivazion dl’ega vënie avaneda, tl cajo che l vën adotà mesures miredes al sparani dl’ega o a na miëura nuzeda dl’ega o che cumporta mudazions dla tecniches d’irigazion o de nnevamënt artifiziel. 26)
La denuminazion Repartizion provinziela per l’eghes y l’energia ie unida sostituida dal articul 2, coma 1 dla L.P. di 17 de setëmber 2013, n. 18 cun la denuminazion Agenzia provinziela per l ambient.
L articul 8, coma 1 ie unit sostituì nsci dal articul 2, coma 4 dla L.P. di 21 de juni 2011, n. 4.
L articul 8, coma 2, ie n iede unì sostituì dal articul 15 dla L.P. di 23 de lugio 2007, n. 6, pona dal articul 2, coma 5, dla L.P. di 21 de juni 2011, n. 4, y mudà ala fin dal articul 13, coma 2, dla L.P. di 23 d’utober 2014, n. 10, y dal articul 18, coma 1, dla L.P. di 24 de setëmber 2019, n. 8.
I comes 3 y 4 dl articul 8 ie unit sostituii nsci dal articul 2, coma 6 dla L.P. di 21 de juni 2011, n. 4.
L pustom b) dl articul 8, coma 4 ie unit mudà nsci dal articul 36, coma 4, dla L.P. di 26 de jené 2015, n. 2.
L articul 8, coma 5 ie unit sostituì nsci dal articul 15 dla L.P. di 23 de lugio 2007, n. 6, pona mudà dal articul 10, coma 7 dla L.P. di 22 de jené 2010, n. 2 y ala fin sostituì nsci dal articul 2, coma 7 dla L.P. di 21 de juni 2011, n. 4.
L pustom a), dl articul 8, coma 6 ie unit abrogà dal articul 36, coma 1, pustom c), dla L.P. di 26 de jené 2015, n. 2.
L articul 8, coma 6 ie unit njuntà dal articul 2, coma 8 dla L.P. di 21 de juni 2011, n. 4.