(1) Per giaté l’autorisazion aldò dl articul 8, coma 1, muessa i organns de cuntrol prejenté n program de cuntrol standard cun na descrizion prezisa dla mesures de cuntrol y dla precauzions che l organn nstës se mpënia a ti mëter dant ai eco-mprenditëures sometui a si cuntrol.
(2) Oradechël muessa i organns de cuntrol avëi na strutura che garantësce la mparzialità y che lasce pro la partezipazion de duta la pertes nteressedes ai duvieres y al funzionamënt dl organn de cuntrol y de zertificazion.
(3) I cumëmbri dl diretif di organns de cuntrol possa nce unì crisc ora danter i setores tuchei dala ativiteies de cuntrol y de zertificazion, ma mé a cundizion che l vënie schivà la preduminanza de nteresc setoriei singui.
(4) Tl’eserzitazion dl’atività de cuntrol iel mé lascià pro de se nuzé de personal permanënt, sot ala supervijion de n soget respunsabl ti cunfronc dl organn de cuntrol; danter l personal y i eco-mprenditëures sometui al cuntrol ne daussel vester degun raport prufescionel, economich o de cunsulënza, nce sce ndiret. L personal tecnich adurvà a chësc fin muessa oradechël avëi l diplom de laureat te scienzes agraries, furesteles, scienzes y tecnologies dl’alimentazion, scienza dla produzion de tieres, chimica, biologia, veterinaria o tituli ecuivalënc, o l diplom de tecnich agrer, de n tecnich de economia agrera, de n tecnich chimich, de n tecnich dl’alimentazion o diploms ecuivalënc y avëi la cumpetënza che ie debujën per i duvieres asseniei.
(5) La strutures di organns de cuntrol muessa, n cont de si sënta, si dotazion tecnica y tecnich-nfurmatica per l’atività de cuntrol, vester njiniedes ite aldò.
(6) La Jonta provinziela determinea i recuisic di reprejentanc y di aministradëures di organns de cuntrol. La delibra curespundënta muessa unì publicheda tl Buletin Ufiziel dla Region Trentin-Südtirol.