a) Lege Provinziala di 20 de forà dl 2002, n. 31)
Disciplina di ufizies de viac y turism

(1) Ufizies de viac y turism ie l’aziendes che mët a jì, urganisea, pieta y vënd, adum o separatamënter, pertes singules o coordinedes de viages y sojurnanzes sun n paiamënt a forfait o sun provijion, o che fej mé da ntermedieres per de tei servijes o che dejëuj tramedoi ativiteies.

(2) Ora che l’ativiteies aldò dl coma 1 possa i ufizies de viac y turism dejëujer, tl respet dla leges che les regulea, ënghe chësta ativiteies:

1. urganisé jites ndividueles o culetives y vijité ziteies cun uni mesun de trasport;
   
2. resservé y vënder chertes per cont dl’aziendes naziuneles y da oradecà che eserzitea trasporc cun la ferata, cun autoveicli, sun l mer y tl air y tres d’autra sortes de trasport;
   
3. rezever i tlienc ti porc, aeroporc, stazions de partënza y de travert di mesuns culetives de trasport y, te uni cajo, vester de assistënza ai tlienc;
   
4. resservé servijes pra strutures rezetives y de restaurazion, o nce vënder bons de credit (vouchers) per chisc servijes, dac ora ënghe da d’autri operadëures naziunei o da oradecà;
   
5. nfurmé y fé retlam per scumenciadives turistiches;
   
6. judé pra la relascedes de passaporc y visums de consulac;
   
7. mandé, jì a tò y tenì su cufri sun ncëria y tl nteres dla tlientela;
   
8. prenuté auti a fit y d’autri mesuns de trasport;
   
9. dé ora polizes d’assegurazion n cajo de nzidënc dla persones che ie de viac, de rezésc, de danns ala cosses traspurtedes y d’autri riscs cunliei ai viages sun ncëria y conta dl’aziendes d’assegurazion;
   
10. partì ora y vënder publicazions de utl per l turism sciche manuai de viac, chertes geografiches y de zità, cudejiei y libri ilustrei;
    
11. prenuté y vënder chertes per cunzerc, mostres, fieres y d’autra manifestazions;
    
12. urganisé servijes cunliei al’ativiteies che reverda cungresc y ala manifestazions dejëutes n ucajion de fieres;
    
13. dejëujer uni autra atività che à da nfé cun servijes tl ciamp dl turism.