(1)I criteres per l’atribuzion di vantajes economics determinea per i pruvedimënc d’erogazion, che cumporta spëises a cëria dl bilanz dla Provinzia, i tiermui te chëi che n muessa se cruzië di ademplimënc che ie de bujën, i pruvedimënc che se porta pro sce chisc tiermui ne vën nia respetei y i caji te chëi che l possa unì dat despusizion dla revucazion dl vantaje economich.
(2) I criteres per l’atribuzion de vantajes economics de natura curënta o per nvestimënc muessa preudëi che la spëises vënie rendicontedes dal benefizier tl lim de tëmp dl ann do l pruvedimënt de cunzescion o de mputazion dla spëisa, sce defrënt. Canche chësc tiermul o l tiermul plu curt eventualmënter stabilì ie passà zënza che l sibe unit fat la rendicontazion dla spëisa per gauja dl benefizier, nen dà l’unità urganisativa respunsabla dl pruzedimënt la despusizion de revucazion. Per rejons grieves y mutivedes possa l’unità urganisativa respunsabla dl pruzedimënt cunzeder n slungiamënt dl tiermul nchin a mo n ann, ma canche chësc ann ie passà ie l vantaje economich revucà automaticamënter.
(3) I criteres per l’atribuzion di vantajes economics che reverda ativiteies che vën realisedes te n tëmp de de plu ani muessa preudëi che l benefizier mande ite n cronoprogram dl’ativiteies. L benefizier muessa rendiconté la spëisa abuda tl lim dla fin dl ann do n referimënt ala ativiteies singules ududes danora tl cronoprogram. Per la rendicontazion vëniel aplicà cie che ie udù danora tl coma 2.
(4) I criteres per l’atribuzion di vantajes economics che reverda operes o spëises per nvestimënc che vën realisedes te n tëmp de de plu ani muessa preudëi che l benefizier débe sëura na data de scumenciamënt di lëures y che l mande ite n cronoprogram dl’ativiteies. L benefizier muessa rendiconté la spëisa abuda tl lim de tëmp dl ann do n referimënt ala ativiteies singules preududes tl cronoprogram. Per la rendicontazion vëniel aplicà cie che ie udù danora tl coma 2, restan mpe la facultà dl benefizier de purté dant, do la revucazion dl vantaje economich, na dumanda de cunzescion de n vantaje economich nuef per pudëi purté a cuntlujion l’opera o l nvestimënt.
(5) Sce la Jonta provinziela revuchea cuntribuc o alesiramënc bele paiei ora, vën la somes da reter, sce l ne ie nia stabilì autramënter, auzedes di fic legai pian via dala data dl’erogazion.
(6) Nchin al adatamënt di criteres nunziei dessëura ala despusizions de chësta lege vëniel aplicà ai pruvedimënc de cunzescion di vantajes economics chësta despusizions. 11)