i) Lege provinziala di 19 de forà dl 2001, n. 51)
Ordinamënt dla profesciun de maester de schi y dles scores de schi

(1)  En referimënt ala lege statala de basa dl 8 de merz 1991, nr. 81 por la profesciun de maester de schi regolëia chësta lege la profesciun de maester de schi y l’ativité dles scores de schi.

(1)  Maester de schi é chël che insëgna profescionalmënter, inće sce nia estlusivamënter y tresfora, a porsones singules o a grups de porsones les tecniches da jì cun i schi te dötes sües spezialisaziuns y cun de vigni sort de injins sön pistes dai schi, itinerars schiistics, percursc fora de pista y escursciuns cun i schi che ne se damana nia l’adoranza de mesi tecnics o alpinistics sciöche cordes, picli o grifs.

(2)  La denominaziun maester de schi adorada te chësta lege y tles normes d´atuaziun se referësc a dötes les abilitaziuns y a düć i degrà.

(1)  Por l’eserzize dla profesciun de maester de schi él odü danfora abilitaziuns te chëstes disciplines:

1. schi alpinism
2. paslunch
3. brëia

(2)  Do avëi superè n ejam pratich, teorich y didatich sura le pröm livel de formaziun arjunj i candidać sön domanda tles singules disciplines la cualificaziun de assistënć dla scora de schi. Do l’iscriziun tla lista speziala dl register profescional provinzial é i aspiranć autorisà a dè leziuns tecniches sistematiches de schi te na scora de schi sot forma de practicum, che costituësc na pert integranta dla formaziun profescionala, sot al control dl diretur te na perioda de tëmp de nia plü de cin agn. Le colegium provinzial controlëia che al vëgnes veramënter fat le practicum. Te chësta ocupaziun à i maestri de schi dla scora de schi prezedënza tl laûr en confrunt di assistënć dla scora de schi.2)

(3) 3)

(1)  L´eserzize stabil dl´ativité de maester de schi tla provinzia de Balsan vëiga danfora l´iscriziun tl register profescional provinzial che é tignì dala ćiamena profescionala provinziala y controlè dal assessur provinzial competënt aladô dl articul 12.

(2)  Le register profescional provinzial di maestri de schi é partì sö tles listes suandëntes:

1. lista di maestri de schi alpin, di maestri de paslunch y di maestri de brëia
2. lista a esaurimënt di maestri de schi dl II degré
3. lista speziala di assistënć de scores de schi

(3)  L´iscriziun tl register provinzial vëgn desponüda dala ćiamena profescionala provinziala.

(1)  Tl register provinzial po gnì scrić ite i maestri de schi che à l´abilitaziun relativa y les condiziuns suandëntes:

1. la zitadinanza taliana o de n stat che fej pert dl UE o de n ater stat foradecà sce le damanant é autorisé a avëi la residënza y le laûr tla Talia aladô dles relatives acordanzes internazionales;
2. la majera eté;
3. 4)
4. le possès dl diplom de scora mesana;
5. l´ester lëdi da condanes penales che proibësces l´eserzize dla profesciun inće ma por n cört tëmp, tut fora le cajo che al è gnü fat na reabilitaziun;
6. la residënza, le domizil o la misciun por la consegnaziun dla posta te n comun dla provinzia de Balsan.

(1)  L´abilitaziun al eserzize dla profesciun de maester de schi pon arjunje frecuentan efetivamënter n curs de formaziun profescionala y superan i ejams corespognënć de contlujiun dl curs.

(2)  La Provinzia organisëia, sides diretamënter che ince tres la Scora por Maestri de Schi Südtirol dla ciamena provinziala di maestri de schi, cursc teorics y pratics por la formaziun di maestri de schi.  5)

(3)  La Junta provinziala, sön proposta dl colegium provinzial y osservan les desposiziuns dl articul 22, coma 2, dla lege dl 8 de merz 1991, n. 81, determinëia les condiziuns d´amisciun al ejam d´idoneité, la dorada, la frecuënza, i programs y les modalitês di cursc de formaziun mo inće i critêrs y i programs d´ejam por arjunje l´abilitaziun profescionala sciöche inće la dorada minima dl practicum.6)

(4)  I candidać po fà i ejams por talian o por todësch. Al po inće gnì metü a jì cursc de formaziun por ladin.

(5)  I ejams d´abilitaziun vëgn fać dan dales comisciun d´ejam preodödes dal articul 7. I candidać che à frecuentè regolarmënter i cursc y che à fat le practicum scrit dant po jì a fà l´ejam. I diploms d´ejam vëgn sotscrić dal assessur provinzial competënt o dala assessuria competënta.7)

(6)  ) I cursc d´ajornamënt d´oblianza por l´eserzize dla profesciun vëgn tignis dala Scora por Maestri de Schi Südtirol dla ciamena provinziala di maestri de schi en osservanza de ci che vëgn scrit dant dal coma 3. La Scora por Maestri de Schi Südtirol dla ciamena provinziala di maestri de schi tëgn ince i cursc de ajornamënt nia d´oblianza determinan la dorada, la frecuënza y i programs. 8)

(7)  Le decurs di cursc de cualificaziun y de spezialisaziun vëgn tignì sot a osservanza de ći che é preodü dai articui 10 y 11.

(1)  La Junta provinziala determinëia la composiziun, les modalités de nominaziun y le funzionamënt dles comisciuns d’ejam por vigni abilitaziun preodüda dal articul 3.  9)

(1) I maestri de schi scrić ite tl register profescional di maestri de schi de d´atres regiuns o dla provinzia de Trënt o che à n titul profescional arjunt foradecà, che à intenziun d´eserzité regolarmënter süa profesciun tl Südtirol, mëss damanè do l’iscriziun tl register provinzial di maestri de schi dla provinzia de Balsan.

(2) L'iscriziun di maestri de schi de d’atres regiuns o dla provinzia de Trënt vëgn desponüda dal consëi diretif dla ćiamena provinziala di maestri de schi, sce le damanant à i recuisić preodüs dal articul 5, coma 1, y la comisciun preodüda dal articul 7, coma 1 o na sotcomisciun delegada da chëst´ultima, à constatè süa conescënza dl teritore provinzial, dla geografia dl ambiënt da munt y dles condiziuns dl tlima dla provinzia de Balsan, che va debojëgn por la segurëza dl jì cun i schi, sciöche inće la conescënza dles diretives de lege che reverda i maestri y les scores de schi.

(3) L´iscriziun tl register provinzial di maestri de schi che vëgn da d´atri stać vëgn desponüda dal consëi diretif dla ćiamena provinziala di maestri de schi ales condiziuns preodüdes al coma 2, y sce le damanant à n titul profescional che l’abilitëia tl paîsc de provegnënza ala profesciun de maester de schi sciöche profescionist lëde, y à na formaziun che po gnì ecuiparada a chëra di maestri de schi provinziai. L’ecuiparaziun vëgn desponüda dal assessur provinzial competënt sön la basa de n arat concordant dla ćiamena provinziala di maestri de schi. Sce al é de gran desfarënzies danter la formaziun arjunta foradecà y chëra damanada tla provinzia de Balsan, po l’ecuiparaziun gnì fata do avëi stlüt jö n practicum integratif o do avëi passè n ejam de cualificaziun, aladô de ći che le damanant instës se chir fora, y a sües spëises.

(4) Le consëi diretif dla ćiamena provinziala di maestri de schi desponn d'ofize la straicada dal register profescional provinzial di maestri de schi che é gnüs scrić ite tl register profescional de n'atra regiun o dla provinzia de Trënt.

(5) Por eserzité temporaneamënter süa profesciun sön le teritore provinzial, mëss i maestri de schi, scrić ite tl register profescional de d’atres regiuns o dla provinzia de Trënt, ti le lascè alsavëi damperfora ala ćiamena profescionala provinziala di maestri de schi y dè dant les localitês schiistiches y sce la profesciun vëgn eserzitada tl respet dl articul 19 o te na scora de schi. 10)

(6)11)

(7) L'eserzize dla profesciun ocajional sön le teritore provinzial da pert de che che à arjunt la cualificaziun profescionala de maester de schi te d’atri stać é conzedüda, sce al ti vëgn lascè alsavëi al ofize provinzial competënt damperfora y sce al va a öna cun les desposiziuns de converjiun dla diretiva 2005/36/CE dl Parlamënt europeich y dl Consëi di 7 de setëmber dl 2005 sön le reconescimënt dles cualificaziuns profescionales. La Junta provinziala stabilësc i criters y les modalitês por valuté l‘eserzize temporann dla profesciun de maester de schi. 12)

(8) En ocajiun dla pröma prestaziun dl’ativité da pert di maestri de schi che vëgn da d’atri stać, mëss la comunicaziun preodüda dal coma 7 conzede le control dla cualifica profescionala, dles conescënzes dl’interessè y dla curida d’assiguraziun por l’ativité tla provinzia de Balsan, finalisada a tignì fora dagns ala sanité y ala segurëza dl destinatar dl sorvisc. Sce les desfarënzies danter la cualifica profescionala dl interessè y la formaziun damanada dales normes provinziales é tan granes da danejè la sanité y la segurëza dl destinatar dl sorvisc, po le damanant avalié fora chëstes desfarënzes cun n ejam de cualificaziun aposta, surantolon les spëises.

(9) Les modalitês de control di dać y dles condiziuns damanades por l’eserzize profescional preodü da chësc articul, sciöche inće chëres de atuaziun dles mosöres de compensaziun eventuales, vëgn regolamentades cun regolamënt de atuaziun.13)

(1)  I maestri de schi scrić ite tl register profescional mëss eserzité süa profesciun coretamënter respetan i dovëis profescionai y les regoles de comportamënt scrites dant dala lege, contribuì al svilup de chësc sport, istruì i scolars sura les regoles de segurëza y sura i prighi sön pista y fora de pista, portè pro ala promoziun dl turism y inće daidé tl cajo de inzidënć cun i schi.

(1)  Frecuentan cursc aposta organisá dala Provinzia, dala ciamena provinziala di maestri de schi o da d´atres organisaziuns o assoziaziuns dla categoria y do avëi dé jö i ejams relatifs pó i maestri de schi arjunje les cualificaziuns y spezialisaziuns suandëntes:

1. la cualificaziun de diretur de scora de schi;
   
2. la cualificaziun de maester de maestri de schi o de maestri de brëia o de maestri de paslunch;
   
3. la spezialisaziun por l'insegnamënt cun injins che remplazëia i schi;
   
4. la spezialisaziun por insigné da jí cun i schi ai mituns;
   
5. la spezialisaziun por insigné da jí cun i schi a porsones cun handicap;
   
6. la spezialisaziun por insigné da jí cun i schi adoran d´atri lingac.
   
7. la spezialisaziun por insigné le freeride;
   
8. la spezialisaziun por insigné le freestyle.  14)
   

(1/bis)  Les cualificaziuns preodüdes dales lëtres a) y b) dl coma 1 é resservades ai maestri de schi preodüs dal articul 4, coma 2, lëtra a); les spezialisaziuns preodüdes dales lëtres c), d), e), f), g) y h) dl coma 1 pó gní arjuntes dai maestri de schi preodüs dal articul 4, coma 2, lëtres a) y b). 15)

(2)  Tl regolamënt d´esecuziun vëgnel scrit dant les condiziuns por arjunje les spezialisaziuns y les cualificaziuns aladô dl coma 1 y eventualmënter de n valgönes d´atres y inće i programs di cursc y di ejams relatifs, les condiziuns por le reconoscimënt dles spezialisaziuns y dles cualificaziuns arjuntes pro d´atres organisaziuns.

(3) Les comisciuns por i ejams de spezialisaziun y de cualificaziun é metüdes adöm da almanco trëi mëmbri cun competënzes tecniches y didatiches particolares te sües spezialisaziuns y cualificaziuns. I mëmbri vëgn nominá da iade a iade dal’assessuria provinziala competënta/dal assessur provinzial competënt cun le decret d´indiziun di cursc. I diploms d´ejam vëgn sotscric dal’assessuria provinziala competënta/dal assessur provinzial competënt. 16)

(1)  I maestri de schi abilità a eserzité süa profesciun tles disciplines aladô dl articul 3, coma 1, y tles cualificaziuns y spezialisaziuns aladô dl articul 10, coma 1, sciöche inće i assistënć de scora de schi odüs danfora dal articul 3, coma 2, é oblià a frecuentè i cursc d´ajornamënt scrić dant organisà dala ćiamena provinziala di maestri de schi.17)

(2)  Sce i cursc d´ajornamënt aladô dl coma 1 ne vëgn nia frecuentà ordinëia le consëi diretif dla ćiamena provinziala di maestri de schi l´anulamënt dl iscrit dal register profescional.

(3)  L´anulamënt dal register profescional ne vëgn nia a s´al dè sce l´interessè n´à nia la poscibilité por maratia o a gauja de forzes majeres, de partezipé al curs d´ajornamënt.

(1)  La ćiamena provinziala di maestri de schi é istituida sciöche organn d´autodisciplina y d´aministraziun autonoma dla profesciun.

(2)  Dla ćiamena profescionala fej pert por lege düć i maestri de schi scrić ite tl register profescional y inće i maestri de schi residënć tla provinzia de Balsan che à dè sö süa ativité.

(3)  Organns dla ćiamena é: l´adunada, le consëi diretif y le presidënt dla ćiamena provinziala.

(4)  L´adunada dla ćiamena provinziala di maestri de schi é metüda adöm da düć i mëmbri dla ćiamena.

(5)  Le consëi diretif dla ćiamena provinziala di maestri de schi vëgn lité dal´adunada inanter i maestri de schi scrić ite tl numer odü danfora dal statut.

(6)  Le presidënt dla ćiamena provinziala di maestri de schi vëgn lité dal´adunada dla ćiamena y é le rapresentant legal dla ćiamena.

(7)  L´assessur provinzial competënt ćiara sura la ćiamena provinziala di maestri de schi y autorisëia le statut.

(1)  L´adunanza dla ćiamena provinziala di maestri de schi à les inćiaries suandëntes:

1. aprovè le statut dla ćiamena;
2. lité le consëi diretif;
3. aprovè anualmënter le preventif söl bilanz y le cunt consuntif dla ćiamena elaborè dal consëi diretif;
4. tó dezijiuns por ći che reverda cuestiuns d´importanza particolara por chësta categoria profescionala y inće vigni atra cuestiun che vëgn portada dant al consëi diretif o da almanco n cuinto di comëmbri.

(2)  L´adunanza dla ćiamena provinziala vëgn convocada do lege un n iade al ann por aprovè le bilanz preventif.

(3)  Le consëi diretif dla ćiamena provinziala di maestri de schi à les inćiaries suandëntes:

1. eserzité dötes les funziuns che alda pro l´iscriziun tl register profescional y la tignida de chësc;
2. mëte averda al eserzize dla profesciun y al´osservanza di dovëis profescionai y dà sanziuns disciplinares;
3. se cruzié dles relaziuns cun les assoziaziuns profescionales di maestri de schi, cun d´atres ćiamenes profescionales, cun l´assoziaziun nazionala di maestri de schi y cun les assoziaziuns di maestri de schi de d´atri stać;
4. colaurè cun les autoritês provinziales competëntes y nominé sü rapresentanć tles comisciuns preodödes dales respetives diretives de lege;
5. determiné la cuantité di contribuć di iscrić;
6. sön domanda dla Provinzia o de d´atres autoritês aministratives dè jö n arat sura les cuestiuns che reverda l´ordinamënt y l´ativité di maestri de schi, le sport di schi y le turism da d´invern en general;
7. portè pro ala difujiun dl sport di schi, dla conscënza dl teritore schiistich provinzial, dles mosöres de segurëza y de prevenziun sön y fora dles pistes dai schi; implü contribuì a schivé prighi por l´ambiënt natural;
8. nominé comisciuns tecniches che elaborëies inće en colauraziun cun l´assoziaziun di maestri de schi plü rapresentativa a livel provinzial, programs por cursc de formaziun y individuëies i critêrs dles materies d´ejam;
9. propone les tarifes minimales y mascimales por les prestaziuns profescionales;
10. ademplì dötes les inćiaries che ti é gnüdes surandades o delegades y tó vigni atra iniziativa por le sostegnimënt de chësc grup profescional.

(1)  I maestri de schi scrić ite tl register profescional che violëia les normes di dovëis profescionai o chëres de comportamënt odüdes danfora da chësta lege é sotmetüs ales sanziuns disciplinares suandëntes:

1. amoniziun scrita;
2. zensöra;
3. sospenjiun dal register profescional por n tëmp che va da n mëis a n ann;
4. anulamënt dal register.

(2)  Les sanziuns disciplinares vëgn dades dal consëi diretif a maioranza assoluta di componënć do na anotaziun formala dles plüres y respetan i prinzips de aldiziun y defenüda dl incolpè che, do avëi notifiché le provedimënt, po fà recurs ala Junta provinziala ćina a n tëmp de 30 dis. La presentaziun de recurs sospënn l´esecutivité dla sanziun ćina che la Junta provinziala tol na dezijiun.

(3)  I provedimënć tuć dala Ćiamena provinziala, tut fora chi che reverda la disciplina, é definitifs y po gnì contestà dan dal organn de iustizia aministrativa competënt aladô dl articul 17, coma 4, dla lege dl 8 de merz 1991, nr. 81.

(1)  Aladô de chësta lege vëgn conscidrada scora de schi vigni organisaziun che laora tl teritore provinzial che mostra sö n´ativité coordinada de de plü maestri de schi por l´insegnamënt dles tecniches y dles conoscënzes di sporć söla nëi, inće cun d´atri injins che i schi y por l´acompagnamënt di tliënć söi schi.

(2)  La scora de schi mëss garantì n´oferta poscibilmënter ampla de düć i sorvisc tles singules disciplines.

(3)  Por l´eserzize de na scora de schi val debojëgn dl´autorisaziun dl assessur provinzial competënt. An po fà recurs cuntra la dezijiun dl assessur provinzial pro la Junta provinziala. 18)

(4)  Chëstes é les Les condiziuns por ciafè l´autorisaziun da daurì na scora de schi:

1. maestri de schi che fej pert dl personal insegnant permanënt colaborëia cun la scora de schi tratan döta la sajun schiistica, por garantì n sorvisc y n’oferta zënza interuziun. Sön domanda ti mëssel gnì menè al ofize provinzial competënt la documentaziun sön vigni maester de schi che desmostra süa colauraziun efetiva;
   
2. a scora de schi sotesta a n statut democratich, che garantësces na partezipaziun efetiva di mëmbri ti organns che delibrëia y la sudivijiun dl davagn dla scora de schi en proporziun ales prestaziuns profescionales efetives, tignin cunt dles spezialisaziuns o cualificaziuns eventuales di mëmbri;
   
3. a će dla scora de schi mëssel ester n diretur cun na cualificaziun adatada;
   
4. la scora de schi mëss avëi n ofize adatè a süa dimenjiun y ala capazité de tó sö i tliënć dl raiun dai schi y n post d´abinada adatè, cun na tofla esterna, sciöche inće n ćiamp da se eserzité, y ara mëss garantì le funzionamënt zënza interuziun intratan döta la sajun da d´invern o da d´isté;
   
5. la denominaziun dla scora de schi mëss se desfarenzié avisa dales atres scores de schi autorisades por tignì fora vigni poscibilité de confujiun, y mëss contignì almanco öna de chëstes denominaziuns : “Scuola di sci, Skischule, Scola de schi”, o indicaziuns analoghes tl caje de scores spezialisades;
   
6. le raiun schiistich olache al vëgn daurì la scora de schi y olache chësta eserzitëia prinzipalmënter süa ativité mëss avëi, aladô sce ara se trata de na scora de schi, brëia o paslunch, assà implanć portamunt davërć y assà pistes dai schi o pistes da paslunch te de bones condiziuns;
   
7. les scores de schi da d´isté po ma gnì autorisades te localitês olache ara va da eserzité chësta disciplina; la daurida é sajonala, limitada al’adoranza efetiva sön le teritore y al funzionamënt di implanć portamunt;
   
8. la scora de schi mëss gnì manajada a na manira da promöie i interesc generai dl sport di schi, la segurëza da jì cun i schi y i interesc dl turism inće tolon pert ales scomenciadies de promoziun da pert dles organisaziuns y dles aziëndes turistiches por fà crësce le turism tles localitês da d´invern y colaboran cun les autoritês dla scora y cun les assoziaziuns dl sport por sostignì y slarié fora le jì cun i schi inanter i jogn. 18)
   

(1)  La domanda por ciafè l´autorisaziun mëss gnì presentada al ofize provinzial competënt cun l´ajunta de chisc papiers:

1. na copia dl statut che contëgn la denominaziun dla scora de schi; 19)
2. na reproduziun sön scala de eventuales tofles, emblems o cuntrassëgns dla scora de schi;
3. n plann di programs d´insegnamënt;
4. l´indicaziun dl raiun dla scora de schi;
5. les indicaziuns por ći che reverda la posiziun, la grandëza y l´aredamënt dl ofize y di eventuai posć d´iscriziun por le publich;
6. l´indicaziun dl post d´abinada y dl ćiamp dla scora;
7. indicaziuns sön le diretur dla scora de schi y i maestri de schi cun les relatives cualifiches y spezialisaziuns profescionales;
8. 20)

(2)  Les scores autorisades mëss comuniché ćina 30 dis eventuai mudamënć al ofize provinzial competënt.

(3)  L´autorisaziun vëgn revocada sce al vëgn a manćé öna o plü condiziuns odüdes danfora da chësc articul y tl cajo de violaziun dles normes de chësta lege.

(4)  L´autorisaziun vëgn inće trata zoruch tl cajo che do n ann dal conferimënt dl´autorisaziun la scora n ides nia ćiamò metü man süa ativité, tl cajo che l´ativité sides gnüda lasciada sö por plü de na sajun o inće sce les desposiziuns odüdes danfora dal provedimënt d’autorisaziun ne vëgn nia ademplides.

(5)  L´autorisaziun por l´eserzize de na scora de schi conzed le dërt de adorè mesums didatics, cun intlujiun di implanć portamunt mobii.

(1)  I maestri de schi scrić ite tl register provinzial di maestri de schi po avëi n´ativité da profescionisć lëdi fora dles scores de schi, tan inant che les prestaziuns profescionales ne vëgnes nia pitades sot forma de n´ativité organisada cun d´atri maestri de schi, inće ma ocajionalmënter.

(2)  I maestri de schi che laora autonomamënter zënza l´intermediaziun de na scora de schi mëss lascé alsavëi le fat denant che mëte man la sajun al consëi diretif dla ciamena provinziala, al ofize provinzial competënt en materia y al´aziënda turistica competënta dl post indican avisa i dac personai, les cualificaziuns y spezialisaziuns, le numer de codesc fiscal y le numer dla partida CVA, la sënta fiscala y la misciun por la consegnaziun dla posta, le raiun de competënza, les tarifes aplicades y la desmostraziun da avëi stlüt jö n´assiguraziun de responsabilité zivila por i dagns ala porsona y ales cosses dl scolar y de terzi.  23)

(1)  Tl respet de ci che vëgn preodü dal articul 348 dl codesc penal é l´eserzize ilegal dla profesciun de maester de schi sotmetü a na straufunga aministrativa da n minim de 516 euro cina a n mascim de 2.582 euro.    24)

(2)  Le maester de schi che eserzitëia süa profesciun zënza tignì cunt dles normes stabilides da chësta lege é sotmetü al paiamënt de na sanziun aministrativa da n minim de 103 euro a n mascim de 516 euro. 25)

(3) 26)

(4)  L´adoranza nia autorisada dla denominaziun de scora de schi, la daurida o l´eserzize de na organisaziun analoga a na scora de schi o la daurida o l´eserzize de n post d´iscriziun violan les desposiziuns aladô di articui 15 y 16 é sotmetüs a na sanziun aministrativa da 774 euro ćina a 5.164 euro a ćiaria di manajadus dl´organisaziun. 27)

(5)  Fora de ći che dij l´articul 348 dl codesc penal é le diretur dla scora de schi, che lascia pro a insigné tla scora porsones che n´ademplësc nia les condiziuns scrites dant da chësta lege, sotmetü al paiamënt de na sanziun aministrativa da n minim de 516 euro a n mascim de 5.164 euro; implü, sce al ess da sozede ćiamò n iade ti gnissel proibì d´eserzité süa funziun por alplü trëi agn. Te caji plü sceri po inće gnì trata zoruch l´autorisaziun ofiziala dla scora de schi. 28)

(6)  L´aplicaziun de tarifes maius o mëndres de chëres scrites dant y metüdes fora vëgn straufada cun na sanziun aministrativa da n minim de 387 euro a n mascim de 2.582 euro; implü ti mëssel gnì retü al tliënt la soma che va sura la tarifa mascimala fora. 29)

(1)  Por l´eruida dles violaziuns y l´aplicaziun dles sanziuns aministratives vëgnel apliché les desposiziuns dla lege provinziala di 7 de jenà 1977, nr. 9 tla verjiun varënta.

(2)  L´ordinn de paiamënt por les sanziuns aministratives vëgn relascè dal diretur dla repartiziun competënta.

(1)  Por che al vëgnes conzedü l´autorisaziun da manajè na scora de schi y daurì l´ativité de maester de schi y de brëia, d´assistënt dla scora de schi, de maester de schi alpin de II degré mëssel gnì stlüt jö n´assiguraziun de responsabilité zivila aposta por i danns a porsones y a cosses de scolars o de terzi. La mosöra minima dla proteziun dl´assiguraziun vëgn stabilida dal assessur provinzial competënt.

(2) 30)

(3) 30)

(1)  Le finanziamënt di cursc de formaziun aladô dl articul 6, coma 2, é completamënter o en pert a ćiaria dl bilanz dla Provinzia. La Junta provinziala determinëia la cuota de partezipaziun dl candidat che mëss paié la soma relativa diretamënter ala porsona inćiariada dla formaziun; implü po la Junta provinziala conzede contribuć y sovenziuns ala ćiamena provinziala di maestri de schi por süa ativité istituzionala y inće ales organisaziuns profescionales di maestri de schi y ales scores de schi por mosöres de promoziun te chësc setur.

(2)  Tl regolamënt de esecuziun vëgnel stabilì i critêrs por l’erogaziun y la licuidaziun di contribuć y dles sovenziuns, la documentaziun damanada y la data de presentaziun dles domandes.32)

(3)  La Junta provinziala é autorisada da tó sö impëgns finanziars de spëises por promöie y gestì diretamënter iniziatives aladô de chësta lege y por le svilup de chësc setur.

(1)  Tl regolamënt d´esecuziun vëgnel stabilì les modalitês de presentaziun dles domandes por l´organisaziun y la gestiun di cursc aladô dl articul 6, coma 2, y por i ejams; al vëgn inće stabilì i dovëis di maestri de schi respetan i prinzips fissà da chësta lege. Ala fin vëgnel inće determiné les carateristiches dl sëgn distintif ofizial y dla cherta de reconoscimënt di maestri de schi y di diploms de cualificaziun y spezialisaziun.

(2)  Tres desposiziuns prozedurales pol gnì stabilì critêrs suplementars a chësta lege por conzede l´autorisaziun dles scores de schi; insciö pol gnì garantì n funzionamënt otimal en relaziun ai bojëgns di scolars che impara da jì cun i schi, di turisć y dl ambiënt dl raiun.

(1)  I maestri de schi alpin dl II degré scrić ite al momënt che chësta lege è jüda en forza tla lista a esaurimënt aladô dl articul 4, po frecuentè n curs d´eserzitaziuns che vëgn tignì un n iade che é partì sö te na pert didatica-tecnica y na pert teorica-didatica-metodica dla dorada de 20 dis y do avëi superè n colloquium final sura i contegnüs teorics-didatics-metodics dan dala comisciun aladô dl articul 7 poi gnì scrić ite tl register profescional provinzial aladô dl articul 4, coma 2, lëtra a). Contignüs y modalitês dl colloquium y dl curs vëgn stabilis cun regolamënt d´esecuziun. Le finanziamënt dl curs aladô de chësc articul mëss gnì surantut dai partezipanć instësc.

(1)  La lege provinziala di 19 de messè 1994, nr. 3 tla verjiun varënta cun estlujiun dl articul 26, é gnüda abolida.34) 

Chësta lege gnarà publicada tla Gasëta Ofiziala dla Regiun. A vignun che al ti speta é oblié da la osservè y da la fà osservè sciöche lege provinziala.