(1) La responsabilité zivila é dan man sce:
- al ti vëgn fat dagns a terzi tl’eserzitaziun dles funziuns y di compić de sorvisc, sciöch’inće tres la violaziun dles oblianzes de sorvisc y de comportamënt;
- al ti vëgn fat dagns, inće nia materiai, al ënt de portignënza, al ënt assegné o a d’atres aministraziuns o a d’atri ënć tl’eserzitaziun dles funziuns y di compić de sorvisc, sciöch’inće tres la violaziun dles oblianzes de sorvisc y de comportamënt;
- al ti vëgn fat dagns ales finanzes di ënć indicà tla lëtra b) por gauja de fać o omisciuns de contabilité, sciöche inće por les spëises surantutes da chisc ënć por süa responsabilité solidara.
(2) La responsabilité aministrativa se limitëia ai fać, ai comportamënć y ales omisciuns cometüs intenzionalmënter o cun colpa groia.
(3)2)
(4)Les dezijiuns discrezionales romagn incontestables. Por valuté le grè de responsabilité aministrativa mësson te vigni caje tignì cunt di vantaji arjunć dal ënt sön la basa dl comportamënt di aministradus o dl personal.
(5) Stlüta fora é vigni responsabilité aministrativa por le personal che à eseguì ordinns de sorvisc che por gauja de na refodanza iustificada dada por iscrit, deache aratà nia legitims, à ciafè na reconfermaziun scrita, ater co sc’al se trata d’ativitês proibides dala lege penala. La responsabilité romagn pro che che à dè l’inćiaria o che à instësc surantut le caje.
(6) Tl caje di organns colegiai respogn, y plü avisa solidarmënter, ma i mëmbri che à dè jö na usc consenziënta.
[(7) Por ći che reverda l’eserzize dles funziuns liades ales registraziuns tl liber fondiar é la responsabilità, ti lims dles responsabilitês dl vicare dl liber fondiar, dl conservadù o dla conservadëssa di libri fondiars.] 3)4)
(8) La responsabilité patrimoniala dl personal diretif, dozënt, educatif y nia dozënt dl sistem provinzial d’istruziun y formaziun preodü dal articul 1, coma 5, dla lege provinziala di 16 de messè dl 2008, n. 5, y dles istituziuns educatives provinziales, é limitada ai caji sozedüs intenzionalmënter o por colpa groia tl'eserzize dla verda di scolars, por ći che reverda i dagns al'aministraziun lià ai comportamënć de scolars. 3)
(9) La limitaziun preodüda dal coma 8 vëgn aplicada inće ala responsabilité dl personal nominé dessura devers l'aministraziun che ret n terzo di dagns por comportamënć di scolars sotmetüs a verda. L'aministraziun surantôl le post dl personal por les responsabilitês ziviles che vëgn da aziun iudiziares promoiüdes da terzi, ater co tl caje de caji sozedüs intenzionalmënter o de colpa groia. 3)
Le coma 3 ne n’é nia gnü promulghè, deache al é gnü detlaré incostituzional cun sentënza dla Curt Costituzionala n. 340 di 8-24 d’otober dl 2001.
I comesc 7, 8 y 9 dl art. 2, é gnüs ajuntà dal art. 12, coma 1, dla l.p. di 17 de jenà dl 2011, n. 1.
La Curt Costituzionala à detlarè cun sentënza di 10 de forà dl 2014, n. 19 ilegitim l'art. 12, coma 1, pröma pert y coma 2 dla lege provinziala di 17 de jenà dl 2011, n. 1, che â ajuntè le coma 7 dl art. 2 y l'ultima pert dl art. 6, coma 2 tla lege provinziala di 9 de novëmber dl 2001, n. 16.