(1) Tignin cunt dla normativa comunitara varënta, regolëia la Provinzia cun regolamënt, la produziun, la trasformaziun, le control y la venüda al publich di produć agricoi di paurs che é produzënć direć, singui o assozià, sciöch’inće la coltivaziun, la racoiüda, la lauraziun, la preparaziun, la trasformaziun, le confezionamënt y le comerz de plantes medejinales. Pro chëstes prescriziuns alda inće les normes nezesciares por sconè la sanité y l’igiena publica.
(2) Sce les prescriziuns contignides tl regolamënt d’esecuziun preodü dal coma 1 ne vëgn nia tignides ite, spo vëgnel ghiré na sanziun aministrativa de 300,00 ćina 3.000,00 euro.
(3) Sce les prescriziuns vëgn ćiamò n iade violades, spo proibësc l’ombolt dl comun competënt l’ativité de produziun, de trasformaziun y de venüda al publich por na dorada anter sis mëisc ćina n ann. Sc’al vëgn constatè n’atra violaziun dla medema sort o sc’al se trata de na repetiziun spezifica, proibësc l’ombolt l’ativité por na dorada da trëi ćina diesc agn.
(4) Sce l’ativité gaujëia prighi por la sanité o l’igiena publica, proibësc l’ombolt atira che l’ativité vëgnes condüta inant.
(5) Por les violaziuns che reverda l’igiena tla produziun y tl comerz di produć alimentars, sciöch’inće süa etichetöra vëgnel apliché les sanziuns aministratives preodüdes dales desposiziuns statales varëntes. 2)