d) Lege Provinziala di 22 de otober dl 1993, n. 171)2)
Regulamënt dl pruzedimënt aministratif 3)

(1)  L’atività aministrativa se tën a criteres de mparzialità, de fazion, d’economizità, de slune, de publizità, de trasparënza, de valivanza de tratamënt y dla chances, coche nce ai prinzips dl urdinamënt dla Union europeica per l arjunjimënt di fins preudui dala lege.  4)

(1/bis)  I raporc danter i sogec privac y l’aministrazion ie caraterisei da na culaburazion leala y da curetëza y crëta i uni ti cun cunfronc di autri.  5)

(1/ter)  L’aministrazion alesirea l azes ala pruzedures aministratives nce tres la scemplificazion dl lingaz adurvà per la redazion di ac aministratifs.  6)

(1/quater)  Acioche l'atività aministrativa sibe plu efizienta y trasparënta y per garantì i dërc digitei a zitadins y a mprejes, sustën l’aministrazion la partezipazion ala pruzedura aministrativa y l dërt d’azes ai documënc aministratifs tres l’adurvanza dla tecnologies dla nfurmazion y dla comunicazion y la nen segurea oradechël l’adurvanza ti raporc interns, cun l’autra aministrazions y cun i sogec privac. La realisea a chësc fin na plataforma digitela, la proietan y la urganisan a na maniera da garantì la sauridanza de consultazion, la cumprenscibltà y l’azescibltà scëmpla a uni categuria de utënc.  7)

(2)  La strutures urganisatives dla Provinzia, dl’aziendes y di ënc che depënd da d’ëila ie struturedes a na maniera che la pruzedures sibe plu scëmples, tambën a livel dla cumpetënzes che a livel di sistems y mesuns de lëur, dla destribuzion dl personal y di lëures y nce dla culaburazions da dedora.

(3)  Per i fins nunziei ti comes 1, 1/quater y 2, y tla usservanza di prinzips di articuli suzessifs, vëniel regulà cun regulamënt, nce n mudazion o ntegrazion de normes de lege n forza, do che l ti ie unit comunicà al Cunsëi provinziel:  8)

1. l’urganisazion y l funzionamënt di organns colegiai dla Provinzia, co i reurganisé y i tré adum te n organn sëul, sce si ativiteies ie cunliedes. L possa nce unì smendrì la cumpëida de si cumëmbri y, sce i organns ne ie nia de bujën a uni moda, possen i tò ju o i sustituì;  9)
   
2. la modaliteies y i tiermui preudui per la pruzedures aministratives singules, co les tré adum sce les à da nfé cun la medema atività privata o publica. L ie te chësc cajo da tenì cont dla sort de atività y dla natura di pruvedimënc, da cialé de smendrì la fases defrëntes, l numer di organns provinziei che tol pert, da razionalisé la cumpetënzes y i cuntroi, da eliminé l’acurdanzes y i cunsënsc che ne muessa nia vester y da trasferì i pudëies dezijionei a organns monocratics o a direzions aministratives, sce chisc ne se damanda nia, pervia de si gran mpurtanza, che i vënie eserzitei te na forma colegiala; 10)
   
3. i documënc che ie da njunté ala dumandes per l'emiscion di pruvedimënc aministratifs;
   
4. la soprescion dla pruzedures che ne curespuend nia plu ai fins y ai obietifs fundamentei dla legislazion de setor o che cuntrastea cun i prinzips dl urdinamënt giuridich dla Union europeica (UE); 11)
   
5. la soprescion dla pruzedures che cumporta plu custimënc che vantajes per l’aministrazion y per i zitadins, nce tres la sustituzion dla atività aministrativa direta, cun formes de regulamentazion autonoma da pert dla persones nteressedes;
   
6. adatamënt di regulmënc sustanziei y de pruzedura dl’atività y di ac aministratifs ai prinzips dla normativa dla UE; 12)
   
7. la soprescion dla pruzedures che desvieia dala normes de pruzedura de carater generel, canche la rejons che giustifichea n regulamënt de setor speziel ne ie nia plu dates.  13)
   

(4)  14)

(5)  L’atività aministrativa se urientea aldò dl prinzip dl svilup sustenibl, per garantì che l acuntentamënt di bujëns dla generazions da ncuei ne limiteie nia la cualità dla vita y la pusciblteies dla generazions dl daunì. I criteres per purté inant n svilup sustenibl vën fissei cun n regulamënt. 15)

(1)  Chësta lege vën aplicheda al’atività aministrativa dla Provinzia autonoma de Bulsan, dl’aziendes y di ënc che depënd da chësta o de chëi che l urdinamënt toma te si cumpetënzes, nce deleghedes, dla istituzions dl sistem provinziel de istruzion y furmazion y, n generel, di organisms de dërt publich costituii da chësta y denuminei cochemei.

(2)  I sogec privac sëurastanc al eserzize d’ativiteies aministratives per cont di ënc nunziei tl coma 1 assegurea l respet di criteres y di prinzips aldò de chësta lege, cun n livel de garanzia nia mënder de chël a chël che l’aministrazions publiches muessa se tenì. 18)

(1) L diretëur generel dla Provinzia fej periodicamënter l’analisa y l monitoraje di cosć per l’aministrazion de duc i pruzedimënc, de si tëmps de dejeujamënt, di cosć de carater economich y dla spëises burocratiches a cëria di zitadins y dla mprejes, se nuzan nce dla culaburazion di partner soziei. I tëmps efetifs de cuntlujion di pruzedimënc aministratifs che à la majera fazion sun i zitadins y sun la mprejes vën muserei y monitorei periodicamënter y publichei sun la plata web istituzionela, tla sezion “Aministrazion trasparënta.” 19)

(2) Tl cuarto ann dla legislatura respetiva njinia l diretëur generel na relazion che reverda l’atività nunzieda tl coma 1, ti sometan ala Jonta provinziela la prupostes de razionalisazion y i ntervënc de cumedura che ie de bujën per miuré l’efizienza y la fazion dl’azion aministrativa. La relazion vën prejenteda tl Cunsëi provinziel ala cumiscion legislativa cumpetënta y la vën oradechël publicheda sun la plata dla Provinzia. 20) 21)

(1) La Jonta provinziela, cun delibrazion da publiché tl Buletin Ufiziel dla Region, determinea danora i criteres per la cunzescion de suvenzions, cuntribuc, sustenimënc, borses de stude, premies, ncurajamënc y aiuc finanzieres y l’atribuzion de vantajes economics de uni sort a persones, sozieteies y ënc publics y privac, coche nce la manieres de licuidazion de chisc y la documentazion de spëisa che ie da prejenté n chësc cont. Per i ënc y i sogec che ne à nia n fin de davani y che ie atifs tl ciamp dl’assistënza, dl sustëni dla familia, dl lëur, dla sanità, dla prutezion zevila, dla istruzion, dla cultura, dl sport, dl frabiché abitatif alesirà, coche nce dla defendura dla cuntreda y dl ambient, possa la documentazion vester limiteda ala soma dl vantaje economich cunzedù, restan mpe la ublianza dl’atestazion dl dejeujamënt dla scumenciadiva ntiera lasceda pro al sustenimënt y la facultà de cuantifiché la prestazions pitedes dai ënc y dai sogec nstësc.  23)  24)

(1/bis) L relevamënt dla situazion economica de persones fisiches per la cunzescion de suvenzions, cuntribuc, stipendiums, premies, sustenimënc, aiuc finanzieres y l’atribuzion de vantajes economics de ce sort che mei, vën fat sun la basa di criteres per la detlarazion unificheda dl davani y dl patrimone, stabilii cun regulamënt d’esecuzion.  25)

(1/ter) Al fin dl cuntrol y dl svilup di criteres per la detlarazion unificheda dl davani y dl patrimone aldò dl coma 1/bis, à la Provinzia azes ai dac che curespuend ai benefizienc y ala prestazions di ënc publics che se nuza di criteres nunziei per la gestion dla prestazions respetives.  26)

(2) La strutura aministrativa respunsabla dla pruzedura verifichea sce la scumenciadives suvenzionedes vën tenides aldò dla regules sun la basa de contes, de cuntrac o d’autra documentazions adatedes, che vën stabilides, setor per setor, tla deliberazions nunziedes tl coma 1, y nce n basa ala detlarazion dla persona che damanda l alesiramënt economich. Te chësta muessel unì detlarà che la cundizions y i recuisic scric dant dala lege vën adempìi y l muessa unì specificà i ufizies o ënc pra chëi che l ie unit fat o l unirà fat d'autra dumandes per n alesiramënt economich per la medema scumenciadiva.

(2/bis) Per i alesiramënc liei ai ntervënc de costruzion o ressanamënt possa i criteres per l’atribuzion de vantajes economics udëi danora che la licuidazion di cuntribuc per lëures de costruzion y de miuramënt dl terac vënie fata, ti lims dla spëisa lasceda pro, tres l’aplicazion, ala cuantità di lëures dejëuc, di priejes uniteres o dla somes pausciales, apurvei n ucajion dla cunzescion dl alesiramënt, cun la njonta, ulache udù danora dai criteres de setor curespundënc, de na cuota fisseda danora per spëises genereles y cëries defrëntes. La detlarazion dl’esecuzion regulera di lëures, data ora da n prufesciunist abilità n basa al stat parziel o finel di lëures, vel coche documentazion adateda per la licuidazion dl vantaje economich.  27)

(2/ter) Tl respet dl prinzip dla scemplificazion di pruzedimënc aministratifs possa i criteres per l’atribuzion di vantajes economics udëi danora che la documentazion de spëisa vënie sustituida da na lista ressuntiva dla spëises abudes. Ala lista, da chëla che l muessa vester da udëi i detai essenziei dla documentazion de spëisa, vëniel njuntà na detlarazion dl reprejentant legal de chi che se damanda l alesiramënt, che atestea che la spëises ie unides fates.  28)

(2/quater) I ënc nunziei tl articul 1/ter, coma 1, se cruzia, tl respet dla normativa sun la prutezion di dac persunei, dl barat dla nfurmazions sun la cunzescion de vantajes economics de ce sort che mei paiei ora dai ënc nstësc.  29)

(3) Uni strutura aministrativa respunsabla de paië ora i alesiramënc economics fej cuntroi a cajo tla mesura de almanco l sies percënt dla scumenciadives sustenides. La manieres vën determinedes dala Jonta provinziela aldò dl coma 1; la possa nce se jué de esperc da dedora. 23)

(4) Danter la spëises lascedes pro a cuntribut iel te uni cajo stlut ora chëles n referimënt ala chëutes sun l davani y sun l patrimone, ora che la chëuta sun l’ativiteies produtives. L vën oradechël lascià pro a cuntribut la cëries respidledes coche cuntribuc previdenziei.  30)

(5) La strutures dl’Aministrazion provinziela ie autorisedes a dé su a ënc privac sot a cuntrol publich provinziel l sustëni aministratif y cuntabl, nce sun plataformes digiteles, per la gestion dla dumandes de cunzescion de vantajes economics liei ala mesures dla Provinzia per afrunté l’emergënza dl SARS-CoV-2 o per sustenì l svilup economich do la pandemia y cun i mesuns asseniei ala Provinzia per chësc fin da istituzions naziuneles y internaziuneles. La maniera de trasferimënt y de destribuzion di vantajes economics ai benefiziac ie fisseda te n cuntrat de servisc spezifich, te chël che l ie preudù l’adurvanza de plataformes digiteles y tecnologies prugressives per l’aministrazion, l cuntrol y la licuidazion di benefiziac. 31)

(6) I afidamënc aldò dl coma 5 possa nce unì fac per l sustëni aministratif y cuntabl pra l’atuazion dl Plan Naziunel per l se Refé y la Resilienza (PNRR). La manieres de sustëni ie stabilides tl cuntrat de servisc.  32)

(1) Sce l unissa ora da n cuntrol che l cuntenut dla detlarazion ne curespuende nia ala urità o che l mancia nfurmazions che ëssa messù unì dates sëura, pierd l detlarënt, restan mpe l’aplicazion dla straufonghes penales eventueles, dut l vantaje economich cunzedù cun pruvedimënt n basa ala detlarazion faleda. La soma che muessa n cajo unì retuda ne daussa nia vester plu auta che cin iedesc mo ntant l vantaje economich giapà zënza nen avëi l dërt.  33)

(1/bis) L resta a uni moda mpe i ntervënc, nce economics, a bën di minorens y per situazions familieres y sozieles particuleres, definii dala Jonta provinziela. 34)

(2) Cun l pruvedimënt de revucheda o d'archiviazion vëniel nce scrit dant che la persona che à cumetù l’azion o l’omiscion o l ënt da d’ëila reprejentà ne daussa nia plu giapé vantajes economics per n tëmp de nchin a 5 ani dala data dl pruvedimënt nstës. La pruibizion de giaudëi de vantajes economics possa unì limiteda a strutures d’urganisazion o prestazions singules.  35)

(3) 36)

(4) Sce per i fac nunziei tl coma 1 ie la soma giapeda zënza nen avëi l dërt unfat auta o mëndra de 3.999,96 euro, vëniel aplicà la straufonga aministrativa dl paiamënt de na soma da 500,00 a 25.822,00 euro. Chësta straufonga ne daussa nia superé l tripl dl vantaje giapà. L resta mpe l'aplicazion de sanzions penales eventueles.  37)  38)

(4/bis) La despusizions nunziedes tl coma 4 vën aplichedes nce ai fac liei dan la jita n forza de chësc articul, sce i ie plu vantajëus, ora che sce l pruvedimënt de paiamënt dla straufonga ie deventà definitif.  39)

(5) 40)

(1) I tiermui per prejenté recursc gerarchics ordineres y straordeneres, per i cuntroi de legitimità y de merit, per l’esprescion de arac obligatores y lienc ne possa nia unic spustei. Spustei ne possa ënghe nia unì i tiermui preudui dal’aministrazion per l’amiscion a cuncorsc publics, a ejams y a garejedes d'apalt y a uni autra atività te chëla che l ie preudù la furmazion de graduatories per i damandënc nteressei da n pruvedimënt aministratif.

(2) I tiermui de prejentazion dla dumandes per giapé vantajes economics d'uni sort vën determinei dala Jonta provinziela aldò dl articul 2, coma 1.

(3) Sce l tiermul nunzià ti comes 1 y 2 toma sun n di de festa o sun n di n chël che i ufizies dla Provinzia ie stluc, vën l tiermul spustà de dërt sun l proscim di de lëur n chël che i ufizies ie davierc.  42)

(1) Sce l pruzedimënt aministratif vën nvià via d’ublinaza do na istanza o sce l muessa unì nvià via d’ufize, ie la strutures urganisatives di ënc nunziei tl articul 1/ter, coma 1, ubliedes a l stlù ju espressamënter tres n pruvedimënt. Sce l’aministrazion ëssa da cunstaté che l’istanza ne possa nia unì rezevuda, sce la ne possa nia unì lasceda pro, sce l ne ti po nia unì jit do o sce la ne ie nia de rejon, stlujela ju l pruzedimënt cun n pruvedimënt espressif scrit te na forma scemplificheda y la mutivazion relativa ie metuda adum da n referimënt sintetich y da ntënder dl fat o dla rejon giuridica ratei ressolutifs. Tl cajo de pruvedimënt tla forma scemplificheda ne vëniel nia aplicà l articul 11/bis.

(2) L diretëur dla repartizion cumpetënta, o sun si delega l diretëur dla strutura urganisativa, dà l orden d’archiviazion dl pruzedimënt do che l ie unit comunicà o stlut ju l pruvedimënt de cuntlujion o sce l ne se porta nia pro per l’aministrazion la ublianza de se ativé pervia de na istanza o de n raport d’ufize.

(3) La documentazion y la istanzes prejentedes a na strutura urganisativa defrënta da chëla cumpetënta a les giapé, ma che toca pra l’aministrazion provinziela o pra i ënc nunziei tl articul 1/ter, coma 1, o prejentedes tres la Purtela per la relazions cun l publich vën mandedes d’ufize ala strutura cumpetënta.

(4) L tiermul per la cuntlujion dl pruzedimënt ie de 30 dis. Canche l ie, tenì cont dla sustenibltà di tëmps per la urganisazion aministrativa, dla natura di nteresc publics stravardei o dla cumplessità particulera dl pruzedimënt, assolutamënter de bujën de n tiermul plu lonch de 30 dis per la cuntlujion dl pruzedimënt, vën chësc tiermul fissà cun delibrazion dla Jonta provinziela, che ie da publiché tl Buletin Ufiziel dla Region. Chësc tiermul ne daussa nia vester plu lonch de 180 dis. L resta mpe i tiermuli defrënc stabilii da despusizions normatives. 43)

(5) Ora che sce l ne ie nia stabilì autramënter destoma l tiermul nunzià tl coma 4 pian via dala data de rezevuda dla istanza da pert dl’aministrazion cumpetënta tl cajo de pruzedimënt a istanza de pert y dala data de vianvieda de pruzedimënt tl cajo de pruzedimënt ativà d’ufize.

(6)  L tiermul nunzià pra l coma 4 vën sburdlà te chisc caji: 44)

1. n pendënza dl tiermul assenià aldò dl articul 15/bis, coma 1, pustom b), per la prejentazion de lecurdanzes scrites y documënc;
   
2. n pendënza dl tiermul de n tëmp nia plu lonch che 30 dis assenià aldò dl articul 12, coma 1, pustom a), y eventualmënter slungià, per rejons giustifichedes y sun istanza mutiveda dl nteressà, al plu de mo 30 dis mplù, per la relasceda de detlarazions y per la regularisazion o la ntegrazion de detlarazions o istanzes faledes o nia cumpletes – ulache amiscibles;
   
3. n aspitanza dla emiscion d’arac de ublianza, de arac facultatifs y dla valutazions tecniches nunziedes ti articuli 19 y 20.
   

(7) L tiermul nunzià pra l coma 4 possa mé unì sburdlà un n iede y per n tëmp nia plu lonch de 30 dis per tò ite d’ufize nfurmazions o documënc aldò dl articul 5.  45)

(1) Sce l tiermul per la cuntlujion dl pruzedimënt de cumpetënza dl’aministrazion provinziela preudù dal articul 4 ie passà via zënza resultat, possa la pert che à dat ite la istanza cuntaté l diretëur generel dla Provinzia, a chël che l ti ie atribuì l pudëi sustitutif y che, tres la strutures urganisatives cumpetëntes, muessa stlù ju l pruzedimënt tl lim de tëmp curespundënt al mez de chël udù danora uriginelmënter.

(2) Tl cajo de pruzedimënc aministratifs de cumpetënza di autri ënc nunziei tl articul 1/ter, coma 1, ti spieta l pudëi sustitutif al dirigënt plu aut dl ënt.

(3) Per i fins de chësc articul vëniel indicà sun la plata istituzionela di ënc nunziei tl articul 1/ter, coma 1, per uni pruzedimënt, l soget cun si adres, a chël che l ie atribuì l pudëi sustitutif y pra chël che la pert che à dat ite la istanza possa damandé do.  46)

(1) I dac liei a cuinuem, inuem, luech y data di nasciuda, zitadinanza y residënza possa unì desmustrei prejentan i documënc de recunescimënt curespundënc. L resta a uni moda mpe per l’aministrazion la puscibltà de verifiché ntan l pruzedimënt la urità y l’autentizità di dac cuntenii tl documënt d’identità o de recunescimënt.

(2) Per cie che reverda i fac, i stac y la cualiteies persuneles che ie debujën per l pruzedimënt sciche i fac che ie diretamënter cunesciui dala persona nteresseda, mé ora de chëi udui danora pra l coma 8, muessa la strutures urganisatives di ënc nunziei tl articul 1/ter, coma 1, azeté, tla luegia dla documentazion scrita dant, na detlarazion sotscrita dla persona nteresseda.

(3) Sce la persona nteresseda detlarea che i fac, i stac y la cualiteies persuneles ie atestei te documënc che ie bele tl possés dla strutures urganisatives nunziedes pra l coma 2, y la nen dà i elemënc che ie debujën per ruvé leprò, se cruzia l respunsabl dl pruzedimënt d’ufize de i giapé o de nen giapé na copia. L vën oradechël azertà d’ufize i fac, i stac y la cualiteies persuneles che l’aministrazion che dejëuj l pruzedimënt o n’autra aministrazion publica muessa zertifiché.

(3/bis) Per la prejentazion de dumantes per l’atribuzion de vantajes economics de uni sort possa chël o chëla che fej dumanda adurvé la detlarazions aldò de chësc articul nce per fac, stac y cualiteies persuneles che possa unì zertifichei o atestei da sogec publics o privac de n auter stat cumëmber dla Union europeica. 47)

(4) L cuntrol sun la detlarazions nunziedes pra l coma 2 y l’acuisizion y l azertamënt d’ufize di fac, di stac y dla cualiteies nunziei pra l coma 3 vën mé dejëuc per via telematica; per chësc mët l’aministrazions zertificantes a despusizion dl’aministrazions che dejëuj l pruzedimënt i azesc a si banches dac, tl respet dla regules tecniches preududes tla materia d’aministrazion digitela y de prutezion di dac persunei.

(5) L vën a uni moda fat cuntroi a cajo adatei sun la urità dla detlarazions.

(6) Ora che per cie che ie udù danora dal articul 2/bis, sce l vën ora dai cuntroi nunziei pra l coma 5 o pra chëi nunziei pra l articul 2 che la detlarazions ne cuerspuend nia ala urità o che l ie unit prejentà na documentazion faleda, resta la persona detlarënta che à metù a jì l’azion n cunsapuda o cun gauja grieva, stluta ora per n tëmp nchin a n ann da pruzedures de cuncorsc d’afidamënt o de ncëries. L’estlujion vën aplicheda ala pruzedures de cuncorsc d’afidamënt o de ncëries che vën dejëutes tl’aministrazion che à abù n dann per gauja dla detlarazion nia nia curespundënta ala urità.

(7) Per defënder la reservatëza di dac sensibli, possa i dac da tò ite o da mandé mé cuntenì la nfurmazions curespundëntes a stac, fac y cualiteies persuneles preududes dala lege o da regulamënc y che ie propi debujën per arjonjer i fins per chëles che les vën acuisides.

(8)I zertificac medics, saniteres, di dutores di tieres, d’uriginn, de cunformità ala UE, dla marches o di brevec ne possa nia unì sustituii da n auter documënt, ora che n basa a despusizions de lege defrëntes tla materia. Duc i zertificac medics y saniteres damandei dala istituzions scolastiches per l dejeujamënt nia agonistich d’ativiteies sportives da pert di sculeies vën sustituii da n sëul zertificat d’idoneità al dejeujamënt nia agonistich d’ativiteies sportives, dat ora dal dutor de basa per dut l ann de scola. 48)

(9) I zitadins de Stac che ne fej nia pert dla Union europeica y che sta regulermënter tla Talia, possa se nuzé dla detlarazions sustitutives nunziedes te chësc articul tl lim di fac, di stac y dla cualiteies persuneles che possa unì zertifichei o atestei da pert de sogec publics o privac talians o che possa unì verifichei tl cheder di cuntroi a cajo udui danora da chësta lege. Per i zitadins dla Union europeica vel la manieres preududes per i zitadins talians.  49)

(10) Ti pruzedimënc nviei via sun istanza de pert, che à coche oget l'erogazion de vantajes cochemei denuminei, da pert dla aministrazion publica, o la relasceda de autorisazions y nulla osta cochemei denuminei, remplazea la detlarazions o l'acuisizion de dac y documënc nunziei ti comes 1, 2 y 3 uni sort de documentazion per la desmustrazion de duc i recuisic sogetifs y ogetifs damandei dala normativa de referimënt, sambën for restan mpe l respet dla despusizions dl codesc antimafia. 50)

(1) Restan mpé la despusizions stateles tla materia de cumbat dla criminalità urganiseda, daussel aldò dla lege sun la trasparënza mé unì assenià cunzescions ala sozieteies de crëta a cundizion che chësta sozieteies feje al savëi la identità di fidënc y se mpeniëie a fé al savëi per dut l tëmp dla cunzescion la identità de duc i fidënc dl daunì.

(2)A duc i autri sogec tla forma sozietera ti daussel mé unì dat cunzescions, sce la sozieteies de fidanza che à la partezipazion al capital de chisc y la sozieteies de fidanza che à la partezipazion de cuntrol, coche definida dal articul 2359, coma 1, dl codesc zevil, te sozieteies partezipantes al capital de chisc, ti fej al savëi al soget cunzesciuner l’identità de si fidanzienc y i se mpënia nce a fé al savëi la identità de duc i fidanzienc dl daunì. La sozieteies de fidanza, ubliedes a fé al savëi l’identità di fidanzienc aldò de chësc coma, che compra partezipazions de sogec bele tituleres de na cunzescion o la partezipazion de cuntrol de na sozietà partezipanta al capital de chisc, muessa comuniché l’identità di fidanzienc tl tëmp de 30 dis dala compra dla partezipazion. La medema sozieteies de fidanza muessa fé al savëi al cunzesciuner uni mudazion dla identità di fidanzienc, tl tëmp de 30 dis dala data canche i nen ie unic al savëi. Per la sozieteies cuotedes tla borsa ne vën la despusizions de chësc coma y chëles nunziedes tl coma 1 nia aplichedes. 51)

(3) Tl cajo che la ublianzes dessëura nunziedes ne vënie nia respetedes vën la cunzescion revucheda.

(4) I sogec, a chëi che l partezipea diretamënter o ndiretamënter sozieteies de fidanza o che ie nstësc sozieteies de fidanza y che à bele giapà na cunzescion de dërt publich dala Provinzia autonoma de Bulsan, muessa fé al savëi la identità di fidënc tl tëmp de 30 dis dala jita n forza de chësta lege, sce no ti vën revucheda la cunzescion.  52)

(1) I cuntrac pra chëi che la Provinzia ie una dla pertes muessa avëi tiermui y duredes segures. I tiermui y la duredes ne daussa nia vester n pëis, diret o ndiret, permanënt per l’aministrazion publica, sce no per rejons de bujën o de cunvenienza assoluta per l’aministrazion nstëssa, che ie da dé sëura tl pruvedimënt d’autorisazion per la stipulazion dl cuntrat.

(2) A vantaje dla pertes contraëntes ne daussel nia unì stipulà fic o provijions sun somes che ie n cajo da paië danora per l’esecuzion dl cuntrat. L ne daussa ënghe nia unì cunzedù antizipazions sun cie che n à da avëi o provijions a bën de terzi per ntermediazions tla cuestion.

(3) Sce ntan l’esecuzion de n cuntrat iel de bujën de n avanamënt o de n arbassamënt dl material, di servijes o di lëures, pona muessa la pert contraënta realisé chisc bujëns ala medema cundizions bele preududes dal cuntrat nchin a n valor nia sëura n cuinto dl priesc fat ora. Ti caji de somes plu autes à la pert contraënta l dërt de ressoluzion dl cuntrat y dl paiamënt di lëures realisei aldò dl cuntrat.

(4) Restan mpe cie che ie udù danora tl coma 10 vën i cuntrac, do che l ie unit ite i documënc damandei n basa ala despusizions valëivles, stipulei tla forma de na scritura privata tres na lëtra de ncëria o n barat de curespundënza y ie debota esecutifs.  53)

(5) 54)

(6) Per uni ntervënt da realisé tres n cuntrat publich, sëurantòl l diretëur cumpetënt tla materia o n funzioner da d’ël desinià, la funzions de respunsabl unich y l dejëuj duc i duvieres liei ala pruzedures d’afidamënt, l se cruzia de duc i ac d’istrutoria che ie de bujën y ie de verdia che i cuntrac che ne ie nia atribuii spezificamënter a d’autri organns o sogec vënie dejëuc sciche l toca..  55)

(7) 56)

(8) 57)

(9) I cuntrac vën njiniei y stluc ju aldò dla despuszions valëivles sot ala respunsabltà direta dl diretëur cumpetënt, che se cruzia oradechël nce de i tenì su. Stluc ora da chësta despusizion ie i cuntrac che aldò dl articul 2643 dl codesc zevil muessa unì scric ite o che aldò dla despusizions sun la spëisa dl register muessa unì registrei dan che l tiermul fissà toma.   58)

(10) I cuntrac che ie sometui ala registrazion tl liber fundier ie stipulei tla forma publich-aministrativa cun la usservanza dla normes dla lege nutariela per i ac nutariei, tan inant che les ie aplicables, scric ite tl repertore coche udù danora dai articuli 67 y 68 dl decret dl Presidënt dla Republica di 26 d’auril dl 1986, n. 131, y mudazions suzessives, y tenii su te n’abineda aposta. L secreter generel/La secretera generela documentea chisc cuntrac y ac y autentichea i documënc privac de relevanza per chësc articul y i ac giuridics unilaterei aldò dl articul 28, coma 1, pustom d) dla lege provinziela di 21 de lugio 2022, n. 6.   59)

(11)  Sce l ne ie nia despusizions cuntreres, ie de regula la spëises per chëutes y tasses che resultea dala stipulazion dl cuntrat a cëria dla pertes che à stlut ju l cuntrat cun l’aministrazion provinziela. La spëises per la copies vën determinedes dal regulamënt d'esecuzion preudù dal articul 25. L ne vën nia ratà la spëises de secretariat.

(12) 60)

(13) 61)

(14) 62)

(15) 63)

(16) 64)

(17) 65)

(18) 66)

(19) 67)

(20) 68)

(21) 69)

(22) 70)

(23) 71)

(24) Duta la publicazions de avisc, bandides de cuncors y resultac de garejedes vën fates aldò dla manieres nunziedes te chësc articul y tla istruzions aplicatives curespundëntes. 72) 73)

(25) Per la strutures dla Provinzia, dl’aziendes y di ënc che depënd da chësta, i istituc d’istruzion scolastica y, n generel, i organisms de dërt publich metui su da d’ëila y denuminei cochemei, a cundizion che i ne ebe nia na persunalità giuridica privatistica, ma nce si cunsorc y assoziazions, i ënc locai, i ënc, l’aziendes y i istituc, nce autonoms, la istituzions, la sozieteies y n generel i organisms de dërt publich da chisc metui su o partezipei y cochemei denuminei, sciche nce si cunsorc y assoziazions, y oradechël i istituc de istruzion universitera presënc y atifs sun l teritore provinziel vëniel aplicà debota i tiermui udui danora dala diretiva 2014/24/UE dl Parlamënt europeich y dl Cunsëi, di 26 de fauré 2014, sun i apalc publics, che abroghea la diretiva 2004/18/CE, y dla diretiva 2014/25/UE dl Parlamënt europeich y dl Cunsëi, di 26 de fauré 2014, sun la pruzedures d’apalt di ënc nciarienc ti setores dl’ega, dl’energia, di trasporc y di servijes dla posta, che abroghea la diretiva 2004/17/CE, per la rezezion dla ufiertes y dla dumandes de partezipazion.  74)

(26) L'assoziazion n partezipazion ie pruibida sibe ntan la pruzedura de garejeda sibe nce do l'agiudicazion. Ora dla despusizions di comes 27, 28, 29 y 30 iel pruibì uni sort de mudazion dla cumposizion di ragrupamënc temporeres y di cunsorc di concurënc de coche la fova tl mpeniamënt dat ju pra la ufierta prejenteda. 75)

(27) Ora de chël che ie udù danora dal articul 110, coma 5 dl decret legislatif di 18 d'auril 2016, n. 50, y mudazions suzessives possa la stazion d'apalt, tl cajo de falimënt, licuidazion furzeda aministrativa, aministrazion cuntroleda, aministrazion straurdenera, cuncurdà preventif, nce l cuncordà cun cuntinuità aziendela aldò dl articul 186-bis dl decret dl rë di 16 de merz 1942, n. 267, y mudazions siuzessives, o pruzedura de nsulvënza tl concurs o de licuidazion dl mandater o, sce l se trata de n mprenditëur ndividuel, tl cajo de mort, interdizion, inabilitazion o falimënt de chësc o tl cajo de perduda, ntan la escuzion, di recuisic nunziei tl articul 80 dl decret legislatif di 18 d'auril 2016, n. 50, y mudazions suzessives, o ti caji preudui dala normativa antimafia, agiudiché la garejeda ai autri operadëures economics dl ragrupamënt, o jì inant cun l apalt cun i medemi operadëures, de chëi che un sibe unì costituì coche mandater nuef, y cun la facultà de mudé la cuotes ndichedes tla ufierta uriginela, cumpatiblmënter cun i recuisic de cualificazion damandei dala bandida, da verifiché tl mumënt dla mudazion, y zënza l cunsëns dl mandater da dant; sce chësta cundizions ne ie nia dates, muessa la stazion d'apalt stlù ora l ragrupamënt o rezeder dal cuntrat. 76)

(28) Ora de chël che ie udù danora dal articul 110, coma 5 dl decret legislatif di 18 d'auril 2016, n. 50, y mudazions suzessives possa la stazion d'apalt, tl cajo de falimënt, licuidazion furzeda aministrativa , aministrazion cuntroleda, aministrazion straurdenera, cuncurdà preventif, nce l cuncordà cun cuntinuità aziendela aldò dl articul 186-bis dl decret dl rë di 16 de merz 1942, n. 267, y mudazions siuzessives, o pruzedura de nsulvënza tl concurs o de licuidazion de un di mandanc o, sce l se trata de n mprenditëur ndividuel, tl cajo de mort, interdizion, inabilitazion o falimënt de chësc o tl cajo de perduda, ntan la garejeda o la escuzion dl cuntrat, di recuisic nunziei tl articul 80 dl decret legislatif di 18 d'auril 2016, n. 50, y mudazions suzessives, o ti caji preudui dala normativa antimafia, agiudiché la garejeda ai autri operadëures economics dl ragrupamënt, o jì inant cun l apalt cun i medemi operadëures che à la facultà de mudé la cuotes ndichedes tla ufierta uriginela, cumpatiblmënter cun i recuisic de cualificazion damandei dala bandida, da verifiché tl mumënt dla mudazion, y zënza l bujën dl cunsëns dl mandant da dant. 77)

(29) La previjions nunziedes ti comes 27 y 28 vën aplichedes nce cun referimënt ai sogec nunziei tl articul 45, coma 2, pustoms b), c) y e), dl decret legislatif di 18 d'auril 2016, n. 50. 78)

(30) La despusizions nunziedes ti comes 26, 27, 28 y 29 vën aplichedes ala pruzedures de garejeda y ai cuntrac de chëi che la bandides o i avisc ie unic publichei do la data de jita n forza dla lege provinziela di 17 de dezëmber 2015, n. 16. 79)

(1) Uni pruvedimënt aministratif muessa unì mutivà cun la ndicazion dl fat y dla rejons giuridiches che à purtà pro a chësta dezijion aldò di resultac dla pruzedura de nrescida.

(2) Per i ac normatifs y per chëi de contenut generel ne iel nia de bujën de na mutivazion.

(3) Sce la rejons dla dezijion resultea da n’auter at aministratif a chël che n fej referimënt tla dezijion, pona muessa chësc unì ndicà y metù a despusizion adum cun la comunicazion dla dezijion aministrativa.

(4) Te uni pruvedimënt aministratif nutificà muessel unì dat sëura l tiermul dla mputazion y l’autorità pra chëla che l ie puscibl fé recurs.  86)

(1) I ënc nunziei tl articul 1/ter, coma 1, se cruzia dla comunicazion di ac y di pruvedimënc aministratifs y, ti caji preudui dala lege, dla nutificazion respetiva, se nuzan dla tecnologies dla nfurmazion y dla comunicazion.

(2) La comunicazions ai sogec che muessa vester scric ite tl register dla mprejes y ai prufesciunisć che muessa vester scric ite tla listes dla prufescions y ti indesc dla prufescions vën mé fates tres l domizil digitel dat sëura tl “Indesc naziunel di domizii digitei dla mprejes y di prufesciunisć” (INI-PEC), ora che ti caji te chëi che l ie preudù na maniera defrënta de comunicazion telematica.

(3) La comunicazions ala aministrazions publiches, ai gestores de servijes publics y ala sozieteies a cuntrol publich vën mé fates tres l domizil digitel dat sëura tl’“Indesc di domizii digitei dla aministrazions publiches y di gestores de srvijes publics” (IPA) o tres la cooperazion aplicativa. I documënc possa nce unì metui a despusizion do che l ie unì comunicà coche n possa azeder a chisc telematicamënter.

(4) Cun la tëuta ndroa dl’“Indesc naziunel di domizii digitei dla persones fisiches y di autri ënc de dërt privat che ne muessa nia se scrì ite ti indesc prufesciunei o tl register dla mprejes” vën la comunicazions ai zitadins y ai sogec defrënc da chëi nunziei pra i comes 2 y 3 fates tres l domizil digitel dat sëura iló.

(5) I sogec nunziei ti comes 2, 3 y 4 possa nce crì ora, per cër’ pruzedimënc, n domizil digitel speziel, defrënt da chëi bele repurtei ti indesc respetifs. Chësc domizil muessa vester n’adres de posta eletronica zertificheda o n servisc eletronich o de destinazion zertificheda cualificheda, coche definì dal regulamënt (UE) n. 910/2014 dl Parlamënt Europeich y dl Cunsëi, di 23 de lugio 2014, tla materia de identificazion eletronica y servijes de fidanza per la transazions eletroniches tl marcià intern y che abroghea la diretiva 1999/93/CE (EIDAS).

(6) La mprejes da paur individueles che ne à nia la puscibltà de aministré n’adres de posta eletronica zertificheda, possa crì ora, per dejëujer i pruzedimënc aministratifs, n domizil digitel speziel pra terzi. Chësc domizil muessa vester n’adres de posta eletronica zertificheda o n servisc eletronich de destinazion zertificheda cualificheda.

(7) Sce l ne ie degun domizil digitel coche nunzià tl coma 4 o degun domizil digitel speziel aldò dl coma 5, ti vëniel mandà ai zitadins y ai sogec che ne ie nia chëi nunziei ti comes 2 y 3 tres posta regulera na copia tla forma de papier dl documënt nfurmatich uriginel. Tl cajo de nutificazions y de comunicazions che se damanda na rezevuda de cunseniazion, vën chëstes mandedes tres recumandeda cun avis de rezevuda. Sce l ie de bujën per cër’ pruzedimënc njunté ala istanza prejenteda te forma de papier n pruvedimënt aministratif, muessa la cunformità dla copia dl pruvedimënt aministratif al uriginel unì atesteda da n funzioner publich autorisà a l fé.

(8) La comunicazions mandedes a un di domizii digitei nunziei pra i comes 2, 3, 4 y 5 à, tl mumënt dla spedizion y dla rezevuda, la medema fazions giuridiches dla comunicazions tres posta recumandeda cun avis de rezevuda y les curespuend ala nutificazion tres posta, ora che sce la lege dij zeche d’auter.   87)

(1) Contra i ac aministratifs, adotei dal Presidënt dla Provinzia, dai assessëures provinziei y dai diretëures dla strutures urganisatives provinzieles, o si organns deleghei, ora che sce l se trata de ac detlarei definitifs per lege, vëniel lascià pro de fé recurs te na istanza sëula pra la Jonta provinziela, per rejons de legitimità y de merit, da pert de chi che nen ëssa nteres.  88)

(2) Contra i ac aministratifs di organns colegiai dla Provinzia possa chëi che à n nteres fé recurs aldò dla modaliteies, di caji y di lims preudui dala lege.

(3) Tla comunicazion di ac sometui a recurs aldò di comes 1 y 2 muessel vester ndicà l tiermul y l organn a chël che l recurs vën prejentà.

(4) L recurs muessa unì fat, acioche l posse unì azetà, tl tëmp de 45 dis dala data dla nutificazion o dla comunicazion tres l canal aministratif dl at mpunià o da canche l nteressà nen ie unit de plën a cunescënza.  89)

(5) L recurs ie da prejenté al organn ndicà tla comunicazion o a chël che à dat ora l at mpunià, diretamënter o tres nutificazion, lëtra recumandeda cun avis de rezevuda, o tres posta eletronica zertificheda. Per l respet dl tiermul conta la data dl timber dla posta de spedizion canche l recurs vën mandà tres posta y la data dla rezevuda de cunseniazion dl messaje, sce l recurs vën prejentà tres posta eletronica zertificheda.  90)

(6) I recursc prejentei tl tiermul scrit dant a organns defrënc da chël cumpetënt, ma che toc apra i ënc nunziei tl articul 1/ter, coma 1, ne vën nia detlarei nia rezevibli, ma mandei d’ufize al organn cumpetënt.  91)

(7) L organn dezidënt possa d’ufize o sun dumanda dla persona che fej recurs fermé l’esecuzion dl at cuntestà per rejons grieves; na dumanda aposta ie da prejenté cun l recurs nstës o te na istanza che vën do aldò dla forma scrita dant tl coma 5.

(8) L diretëur dla repartizion provinziela cumpetënta comunichea l recurs ai autri sogec diretamënter nteressei che ie da ndividué dal at cuntestà, sce chësc ne ie mo nia unit fat dal retlamënt.

(9) Tl lim de tëmp de vint dis dala comunicazion dl recurs possa i sogec nteressei prejenté tëutes de pusizion y documënc al organn adressà tl recurs tres la repartizion provinziela cumpetënta.

(10) L organn dezidënt o l respunsabl dla pruzedura de nrescida possa mëter a jì duta la nrescides che l rata de bujën per la dezijion dl recurs.

(11)  Sce l organn dezidënt giapa ora che l recurs ne daussova nia unì fat, l detlareiel nia amiscibl; sce l cunstatea na iregularità che possa unì metuda a post, ti dàl al retlamënt n tiermul per la regularisazion y, sce chësc ne se cruzia nia de mëter a post l’iregularità, ne possa l recurs nia jì inant; sce l cunstatea che l recurs ne ie nia unì fat a rejon, l refudëiel; sce l azetea l recurs per ncumpetënza anuleiel l at y ti passa la cuestion al organn cumpetënt; sce l azetea l recurs per d’autra rejons de dërt o de merit, anuleiel o mudel l at, ora che sce l ie de bujën che la cuestion vënie mandeda al organn che à dat ora l at.

(12) La dezijion ie da mutivé y muessa unì data ora y nutificheda al organn che à emanà l at mpunià, a chi che à fat recurs y ai autri nteressei, a chëi che l ti ie unit comunicà l recurs, ala manieres stabilides tl articul 8.  92)

(13) L organn dezidënt à la ublianza de tò na dezijion n cont dl recurs cun pruvedimënt mutivà tl tëmp de 120 dis dal di n chël che l recurs ie unit prejentà. Canche chësc tiermul ie passà possa l recurënt fé recurs pra l Tribunal aministratif regiunel aldò dl articul 31 dl Codesc dl pruzes aministratif, apurvà cun decret legislatif di 2 de lugio 2010, n. 104. L resta mpe si dërc de fé valëi, sce n cajo, i danns gaujei dala tardivanza tl’ejaminazion dl recurs.  93)

(14) 94)

(1) La strutura urganisativa di ënc nunziei tl articul 1/ter, coma 1, ie respunsabla, per si ciamp de cumpetënza, dla istrutoria y de uni auter ademplimënt pruzedurel, sciche nce dl’adozion dla elaborazion dl pruvedimënt de cuntlujion y de si esecuzion, ora che per cie che ie udù danora dal articul 11.

(2) Sce de plu strutures urganisatives de na medema repartizion provinziela ie de cumpetënza per la istrutoria, asseniea l diretëur de repartizion la respunsabltà dl pruzedimënt ala strutura che muessa se dé ju deplù limpea o che muessa lauré ora la pruposta per l pruvedimënt cuntlujif.

(3) Sce de plu repartizions provinzieles ie de cumpetënza dla istrutoria, ie la respunsabltà dl pruzedimënt de cumpetënza dl diretëur dla repartizion che muessa se dé ju deplù limpea o che muessa lauré ora la pruposta per l pruvedimënt cuntlujif.  95)

(1) L diretëur dla repartizion provinziela cumpetënta per l’elaborazion o l’emiscion dl pruvedimënt cuntlujif pëia do duta la istanzes y i raporc d’ufize y se cruzia a slune de i assenië ala strutures urganisatives dependëntes, ora che sce l tratamënt toma te si cumpetënza.

(2) L diretëur de repartizion possa, cun na si despusizion de servisc, nciarië la strutures urganisatives y i mplieghei respunsabli dl pruzedimënt de pië do diretamënter la istanzes y i raporc.

(3) Ora che sce l ne ie nia udù danora autramënter cun na despusizion de servisc dl diretëur de repartizion, à l diretëur dla strutura urganisativa che giapa per cumpetënza l’istanza o l raport da sëurantò n prima persona o da sëurandé a n auter dependënt, tl cheder dla cumpetënzes istituzioneles respetives, la respunsabltà de una o plu fases dla istrutoria y de uni auter ademplimënt lià cun l pruzedimënt singul, sciche nce dla emiscion o dla elaborazion dl pruvedimënt cuntlujif.

(4) Nchin che l ne ie nia unit fat l’asseniazion a d’autri culaburadëures, l respunsabl dl singul pruzedimënt ie l diretëur dla strutura urganisativa a chëla che l diretëur de repartizion cumpetënt à sëurandat la ncëria, o si sustitut.

(5) L diretëur dla strutura urganisativa se cruzia dla comunicazions nunziedes tl articul 14.

(6) Nce tl cajo d’acuisizion de pruvedimënc infrapruzedimentei, cuntabli o de cuntrol eventuei, resta la respunsabltà pra la strutura urganisativa che se cruzia dla cuestion, ora che sce ala persones nteressedes ti vëniel comunicà zeche d’auter.  96)

(1) Ti pruzedimënc a istanza de pert comunichea l respunsabl dl pruzedimënt o l’autorità cumpetënta, dan l’adozion furmela de n pruvedimënt negatif, debota ai istanc la rejons che ie de mpedimënt per l’amiscion dla dumanda. Tl tëmp de 30 dis dala rezevuda dla comunicazion à i istanc l dërt de prejenté per scrit si usservazions, eventualmënter njuntedes da documënc. Chësta comunicazion fërma su i tëmps per stlù ju l pruzedimënt che scumëncia a inò a destumé so l tiermul nunzià de 30 dis o, n cajo de na prejentazion de usservazions adëura, diesc dis do la prejentazion dla usservazions. Tl medemo tëmp de 30 dis possa i istanc se damandé n’audizion. Nce te chësc cajo vën l tiermul per la cuntlujion dl pruzedimënt fermà su y l scumëncia inò a destumé do la data dl’audizion. Sce chësta usservazions ne unissa eventualmënter nia tëutes su, vëniel n chësc cont dat n tlarimënt tla mutivazion dl pruvedimënt finel dajan sëura tl cajo de refudeda mé la rejons de mpedimënt n plu che ie la cunseguenza dla usservazions o dl’audizion. Danter la rejons de mpedimënt per l’amiscion dla dumanda ne daussel nia unì dat sëura ademplienzes nia dejëutes o tardivanzes che ie da atribuì al’aministrazion. Tl cajo de n anulamënt giudizier dl pruvedimënt nsci adotà ne daussa l’aministrazion tl’eserzité da nuef si pudëi nia purté dant per l prim iede rejons de mpedimënt che fova bele unides ora dal’istrutoria dl pruvedimënt anulà.   97)

(2) 98)

(3) La despusizions nunziedes te chësc articul ne vën nia aplichedes ai pruzedimënc de planificazions, ai pruzedimënc de cuncors y ai pruzedimënc de alesiramënt pra chëi che l se porta pro na cuncorënza danter la dumandes, ti pruzedimënc tl ciamp dl’assistënza y previdënza de ntegrazion gaujedes da istanzes de pert, y nianca ai pruzedimënc che vën stluc ju cun n pruvedimënt de liam.  99) 100)

(1) La persona respunsabla dla pruzedura:

1. valutea, ai fins dla istrutoria, la cundizions d’amiscibltà, i recuisic de legitimazion y la cundizions che ie relevantes per l’emanazion dl pruvedimënt y la adotea uni mesura per l dejeujamënt adecuat y asvelt dla istrutoria. Tl particuler, tolela ite d’ufize la nfurmazions o i documënc aldò dl articul 5 y la nviëia l nteressà, ulache l possa unì fat, a relascé detlarazions o a regularisé o ntegré detlarazions o istanzes da fai o nia cumpletes. Ti caji te chëi che l vën fat n sëuraluech, stluc ora ie i sëuraluesc tl ciamp de n’atività de cuntrol cochemei tlameda, fej la persona respunsabla la comunicazion curespundënta ai patrons y ai pussëures cualifichei dl bën da valuté;  101)
   
2. fej la pruposta de fissé la cunferënzes di servijes nunziedes tl articul 18;
   
3. ti damanda ai organns consultifs i arac ublienc o lienc scric dant;
   
4. ti cunsiëia al diretëur de repartizion de acuisì i arac facultatifs eventuei o la consulënzes da dedora aldò dla cumplessità dla cuestion o dla pruzedura de nrescida;
   
5. ti manda la pratica ala strutura urganisativa cumpetënta per la fasa dl pruzedimënt che vën do y ti l comunichea tl medemo tëmp ai sogec nunziei ti articuli 14 y 15, cun ndicazion dl inuem dl diretëur respetif;  102)
   
6. emanea, tl lim de si cumpetënza, l pruvedimënt cuntlujif o prejentea al organn plu aut cumpetënt la pruposta dl test da adoté;
   
7. se cruzia dla comunicazions, dla publicazions y dla nutificazions preududes dala leges y dai regulamënc o dai urdinamënc de servisc di organns plu auc;
   
8. se cruzia aldò dla ndicazions dl organn plu aut dl’esecuzion dl pruvedimënt definitif.
   

(1) L respunsabl dl pruzedimënt y i diretëures dla strutures urganisatives cumpetëntes per l’adozion di arac, dla valutazions tecniches, di ac endopruzedimentei y dl pruvedimënt finel se tën ora dala dezijions y dal dejëujer ativiteies che à da n fé cun si manscions, sce l ie n cunflit de nteresc, nce putenziel, sce i ie te una dla situazions nunziedes tl articul 30, coma 1, o sce l ie rejons grieves de cunvenienza. 103)

(2) Uni situazion de cunflit de nteres, nce putenziela, che possa revardé nteresc de uni sort, nce nia patrimuniela, muessa unì senialeda dala persones nunziedes tl coma 1 al sëurastant diret. 104) 105)

(3) Ai dependënc che tol pert al pruzedimënt aministratif cun funzions de preparazion, de istrutoria o d’esecuzion vëniel aplicà la despusizions dl codesc de cumpurtamënt dl personal dla Provinzia autonoma de Bulsan, apurvà dala Jonta provinziela. 106)

(1) Uni decret o auter pruvedimënt de n assessëur muessa, dan che l vën sometù ala sotscrizion dl assessëur privinziel cumpetënt, giapé n vist:

1. per la regularità tecnica, dal diretëur dla strutura urganisativa respunsabla per l’elaborazion finela dl at;
   
2. per la regularità de cuntabltà, dal diretëur dl ufize cumpetënt dla Repartizion Finanzes;
   
3. per la legitimità, dal diretëur de repartizion cumpetënta; 107)
   
4. per la curespundënza ala strategia apurveda, ala ressorses preududes y ala ndicazions dl Plan ntegrà de atività y urganisazion, dal diretëur de departimënt cumpetënt.  108)
   

(2) Uni pruposta de deliberazion da somëter al’apurvazion dla Jonta provinziela muessa vester njunteda dai visć nunziei tl coma 1, pustomes a), b), c) y d).  109)

(2/bis) Ai zëntri de respunsabltà dla spëisa aldò dla lege provinziela de cuntabltà vëniel aplicà la pruzedures particuleres ududes danora iló.  110)

(3) La delegazion de funzions aministratives cumporta che la persona delegheda ie respunsabla dla regularità tecnica y cuntabla y dla legitimità dl pruvedimënt.

(4) L personal dla Provinzia che tol pert ala pruzedura aministrativa cun funzions de preparazion, de nrescida o d'esecuzion ie respunsabli dla regularità tecnica y cuntabla de si azions, tenian cont dla mesura de respunsabltà lieda al prufil prufescionel curespundënt.

(5) I funzioners dla Provinzia ie respunsabli sota l aspet aministratif y cuntabl dla vidimazions y di arac nunziei ti comes 1 y 2. Sce i pruvedimënc vën tëuc zënza che i ie unic vidimei o n deviazion di arac nunziei ti comes 1 y 2, ie la respunsabltà aministrativa y cuntabla di organns dezidënc.

(6) L diretëur dla strutura urganisativa dla Provinzia che à la cumpetënza de dé ora l pruvedimënt cuntlujif respuend sota l aspet aministratif y cuntabl de chësc pruvedimënt adum cun i funzioneres respunsabli dla pruzedura, cun resserva dla despusizions dl coma 4.

(7) L diretëur dla strutura urganisativa cumpetënta per la fasa finela dl pruvedimënt ie respunsabl, a livel de aministrazion y cuntabltà, di ac y dla pruzedures d’atuazion dla deliberazions dla Jonta provinziela y di pruvedimënc di assessëures, ora che per che cie che ie udù danora dal coma 4.  111)

(8) Pra i ac aministratifs che ne ie nia de cumpetënza dla Jonta provinziela, di assessëures provinziei, dla repartizions y di ufizies, ma de d' autri organns y d'autra strutures urganisatives, ie, sota l aspet tecnich y cuntabl y per chël che reverda la legitimità, respunsabli i organns o l personal curespundënt che ie a cë de chëla strutures.

(9) L organn che adotea la pruzedura ie diretamënter respunsabl dl pruvedimënt sota l aspet aministratif y cuntabl.

(1) Dla vianvieda dl pruzedimënt aministratif ti vëniel fat al savëi a chëi sogec pra chëi che l pruvedimënt cuntlujif gaujëssa fazions diretes y a chëi che muessa ntervenì aldò dla lege. La vianvieda dl pruvedimënt ti vën oradechël comunicheda ai sogec ndividuei o che ie saurì da ndividué, defrënc dai destinateres direc, a chëi che l pruvedimënt cuntlujif pudëssa gaujé n desvantaje.  113)

(2) Ti caji nunziei tl coma 1 à l’aministrazion la puscibltà de tò pruvedimënc de precauzion nce dan che l vënie fat la comunicazion nunzieda tl medemo coma 1.

(3) Tla comunicazion persunela nunzieda tl coma 1 iel da dé sëura:

• a) la repartizion provinziela cumpetënta;
  
• b) l oget dla pruzedura che ie unida mëtuda a jì;
  
• c) l ufize o n’autra strutura urganisativa adum cun l’adresses de posta eletronica zertificheda y normala publichedes tl “Indesc di domizii digitei dl’aministrazion publica y di gestëures de servijes publics,” y la persona, respunsabli dl pruzedimënt;  114)
  
• d) l ufize o l’autra strutura urganisativa, ulache n possa ti cialé ai ac che ne ie nia despunibli o azessibli tla maniera ududa danora al pustom d/bis;  115)
  
• d/bis) la manieres telematiches cun chëles che l ie puscibl tò vijion di ac, azeder al faszicul nfurmatich y eserzité n via telematica i dërc preudui da chësta lege, tl respet dla normativa n forza tl ciamp aministratif digitel;  116)
  
• e) la data nchin chëla che l pruzedimënt muessa, aldò di tiermuli udui danora dal articul 4, unì stlut ju y la pusciblteies legales n cajo che l’aministrazion ne devënta nia ativa;  117)
  
• f) la data de prejentazion dla istanza curespundënta ti pruzedimënc a scumenciadiva de pert.  118)
  

(3/bis) La comunicazion nunzieda tl coma 3) pustoms a), c) y d) muessa unì renuveda uni iede che l muda la repartizion, la strutura urganisativa o l respunsabl dl pruzedimënt.  119)

(4) Sce per gauja dla gran cumpëida de adressei ne ie la comunicazion persunela nia puscibla o sce la ie scialdi ria da fé, pona fej la persona respunsabla dla pruzedura al savëi la ndicazions nunziedes l coma 3 tres formes de publizità adatedes che vën crisses ora da cajo a cajo o che vën determinedes n generel tres urdinamënt de servisc dl organn plu aut.

(5) Sce la comunicazion ie adresseda a de plu persones nteressedes che ne ie nia saurides da determiné, pona iela da scrì sibe per tudësch che per talian.

(6) L’omiscion o l’iregularità de na comunicazion scrita dant possa mé unì fata valëi dal soget, per chël che la comunicazion preududa ie de nteres diret.

(1) Duc i sogec purtadëures de nteresc publics o privac coche nce i purtadëures de nteresc nia ndividuei costituii te assoziazions, per chëi che l pruvedimënt possa gaujé n desvantaje, possa ntervenì tl pruzedimënt, nce tres l’adurvanza dla tecnologies de nfurmazion y comunicazion.  121)

(2) 122)

(1) I sogec nunziei tl articul 14 y chëi ndichei tl articul 15 à l dërt de:

1. ti cialé ai ac dl pruzedimënt, ora che ti caji te chëi che l dërt d’azes ne vën nia cunzedù o ie limità;
   
2. prejenté, tl tëmp dat dant, nia plu lonch de 30 dis, lecurdanzes scrites o documënc, che l’aministrazion à l’ublianza de valuté, a cundizion che i à da nfé cun l oget dl pruzedimënt.  123)
   

(1)  Sce l organn provinziel cumpetënt tol n cunscidrazion la prupostes y la usservazions purtedes dant aldò dl articul 15, coma 1, possel unì a una tres acurdanzes cun la persones nteressedes, zënza arziché l dërt de terzi, y te uni cajo tl respet dl nteres publich, per determiné l contenut dl pruvedimënt cuntlujif che lascia daviert de plu pusciblteies o per l sustituì ti caji preudui dala lege. 124)

(2) L’acurdanzes nunziedes tl coma 1 muessa vester mutivedes aldò dl articul 7 y stipuledes cun n at scrit, ora che sce la lege l vëij danora autramënter, sce no ne veleles nia. A chësta acurdanzes vëniel aplicà, sce l ne ie nia udù danora autramënter, i prinzips dl codesc zevil tla materia de ublianzes y cuntrac tan inant che i ie cumpatibli.  125)

(3) L’acurdanzes che sustituesc i pruvedimënc aministratifs ie sometudes ai medemi cuntroi de chisc.

(4) Sce l nteres publich se l damanda per rejons che ie unides a se l dé plu tert, cumanda l organn provinziel cumpetënt la retrata unilaterela dl’acurdanza; ma l ie ublià a paië na ndenità n relazion al dann eventuel che ti ie unit gaujà ala persona privata tres chësta retrata.

(5) 126)

(1) La despusizions de chësta sezion ne vën nia aplichedes al’ativiteies dla Provinzia che reverda l'emanazion de ac normatifs, de ac aministratifs generei, de ac de planificazion y de prugramazion; per chisc resta mpe la normes particuleres che nen regulea la furmazion.

(1)Sce l ie de utl somëter tl medemo tëmp a n ejam i nteresc publics defrënc tuchei da n pruzedimënt aministratif chërd l diretëur dla repartizion provinziela cumpetënt per l’atuazion dl ntervënt cuntlujif o a uni moda prevalënt n cont dl’ativiteies dl pruzedimënt ite na cunferënza di servijes. 128)

(1/bis) Cun regulamënt d’esecuzion vëniel determinà la manieres de funzionamënt dla cunferënza di servijes tenian cont di prinzips dla segurëza di tëmps dla cunferënza, dla partezipazion di nteressei al pruzedimënt, dl’apurvazion chieta y dla refudeda.  129)

(2) 130)

(3) L’apurvazion dl’aministrazions publiches, che à la funzions nunziedes tl coma 2, vën cunscidreda data, sce la cundizions aldò dl articul 17/bis dla lege di 7 d’agost 1990, n. 241 ie ademplides. Ti caji te chëi che l chiet danter l’aministrazions publiches y danter l’aministrazions publiches y i gestëures di bëns y servijes publics dl’aministrazion ie ecuivalënta al azetamënt dla dumanda, possa l’aministrazion cumpetënta adoté pruvedimënc de autodefendura.  131)

(4) L’apurvazion dl proiet o dl ntervënt prejentà dala reprejëntanza dla Provinzia tla cunferënzes di servijes remplazea sota uni aspet duc i ac d’apurvazion che ie ududes danora dala leges dla Provinzia.

(5) Dla cunferënza di servijes ie a cë l organn che à cherdà ite la cunferënza o n si delegà.  132)

(6) La cunferënza di servijes possa nce se dejëujer tla forma telematica.  133)

(1) Ora che ti caji preudui dal articul 18 possa i ënc nunziei tl articul 1/ter, coma 1, stipulé acurdanzes danter d’ëi y cun d’autra aministrazions publiches per regulé la culaburazion n cont de ativiteies de nteres per duta la pertes n cumenanza.

(2) Per l’acurdanzes nunziedes tl coma 1 iel da usservé, tan inant che les ie cumpatibles, la despusizions nunziedes tl articul 16, comes 2 y 3.  134)

(1) Ulache l ie udù danora n arat de n organn consultif provinziel muessa chësc organn dé l arat tl lim de tëmp fissà danora da despusizions de lege o, sce l ne ie udù danora degun tiermul, tl lim tëmp de 30 dis da canche l à giapà la dumanda dl arat. Sce l vën damandà arac facultatifs da organns consultifs provinziei o da d’autra aministrazions publiches, muessa chisc unì dac tl tëmp de 30 dis da canche l organn à giapà la dumanda d’arat.  136)

(2)  Sce l tiermul ie passa zënza che l sibe unì comunicà l arat o zënza che l organn damandà ebe prejentà bujëns de istrutoria aldò dl coma 3, va l’aministrazion damandënta inant unfat cun o zënza arat.    137)

(3) Sce l organn provinziel n cuestion à l bujën de nrescida o sce l ne ie nia bon de tenì ite l tiermul nunzià tl coma 1 per gauja dla natura dla cuestion o per forzes plu autes, pëia chësc tiermul via da nuef da canche l organn consultif à giapà la ndicazions y i documënc damandei o dala prima destumeda dl tiermul o da canche l ne ie nia plu la cundizions gaujedes da forzes plu autes.

(4) I organns consultifs dla Provinzia vëij danora pruzedures de prëscia particulera per l’adozion di arac damandei. I arac y la dumandes curespundëntes nunziedes tl coma 1 vën mandei tla forma telematica.  138)

(5) La despusizions nunziedes ti comes 1 y 2 ne vën nia aplichedes tl cajo d’arac tl ciamp dla defendura dl ambient, dla cuntreda y dl teritore y dla sanità di zitadins.

(1)Sce te na norma provinziela, regiunela, statela o dla Union europeica, che possa unì aplicheda ti ciamps de cumpetënza dla Provinzia, iel preudù che dan dé ora n pruvedimënt muessel unì damandà la valutazions tecniches di organns o ënc aposta, y sce chisc organns o ënc ne tol nia i pruvedimënc curespundënc, sce i ne porta nia dant rejons de forzes plu autes o ne porta nia dant l bujën de nrescida dl’aministrazion y chësc tl lim de tëmp udù danora dal’aministrazion, o sce chësta ne à nia preudù n tiermul, possa la persona respunsabla dla pruzedura tl lim de tëmp de sessanta dis do la rezevuda dla dumanda, damandé la valutazions tecniches a d’autri organns o ënc publics che à la medema cualificazion y capazità tecnica, a universiteies, a persones espertes te chël ciamp; ma la possa nce jì inant zënza valutazions tecniches. 140)

(2) Sce l ënt o l organn n cuestion à purtà dant pra l’aministrazion che se dà ju cun la pruzedura gaujes de forza plu auta o sce l à purtà dant l bujën de nrescida, vëniel aplicà l articul 19 coma 3.

(2/bis) La valutazions y la dumandes curespundëntes nunziedes tl coma 1 vën mandedes tres mesuns telematics.  141)

(3) La despusizion nunzieda tl coma 1 ne vën nia aplicheda a valutazions tecniches de organns o ënc che ie cumpetënc tl setor dla defendura dl ambient, dla cuntreda y dl teritore y dla sanità dla zitadines y di zitadins.

(1) La prejentazion de dumandes, detlarazions y senialazions ie cunfermeda debota, nce tla forma telematica, cun na rezevuda, che documentea la prejentazion. Sce la rezevuda cuntën la nfurmazions nunziedes tl coma 3 dl articul 14, velela sciche comunicazion de vianvieda dl pruzedimënt. 142)

(1) Per scemplifiché l’ativiteies di zitadins y dla mprejes y per smendrì la grovaries y i custimënc aministratifs vëniel metù a jì la senialazion zertificheda dl scumenciamënt dl’atività.

(2) Cun deliberazion dla Jonta provinziela vëniel determinà i caji te chëi che l eserzize de n’atività privata, sometuda a autorisazion, lizënza, abilitazion, nulla osta, cunzescion o auter at de cunsëns denuminà cochemei, da pert dla autoriteies aministratives o organns colegiai, possa unì scumencià do che l ie unit senialà dala persona nteresseda al’aministrazion cumpetënta. Cun la deliberazion vëniel oradechël nce definì la manieres de prejentazion dla senialazion y de dejeujamënt dla pruzedura, nce telematica.  144)

(3) La senialazion zertifichea l’esistënza di recuisic y dla cundizions damandedes dala normativa valëivla per l eserzize dl’atività.

(4) L’atività possa unì scumenceda a pië via dala data dla prejentazion dla senialazion al’aministrazion cumpetënta.

(5) Tl cajo che l’aministrazion cumpetënta azertea mancianzes n cont di recuisic y dla cundizions nunziei tl coma 3, tolela, tl lim de tëmp de 60 dis da canche la à giapà la senialazion, i pruvedimënc de pruibizion de jì inant cun l’atività y, sce n cajo, i pruvedimënc de remozion dla fazions danejëntes che ie debujën. Te chësc cajo ne vëniel nia aplicà l articul 11/bis. Sce l ie puscibl cunfurmé l’atività dejëuta y si fazions ala normativa n forza nviëia l’aministrazion cumpetënta, cun at mutivà, l privat de se cruzië de l fé, dajan orden de sospenscion dl’atività metuda a jì y scrijan dant la mesures de bujën cun la fissazion de n tiermul nia plu curt de 30 dis per l’adozion de chëstes. Sce chësc tiermul ie passà zënza che l vënie adotà la mesures scrites dant, ie l’atività da raté pruibida.  145) 146)

(6) Do che l ie passà via l tiermul per adoté la mesures aldò dl articul 5 possa l’aministrazion cumpetënta a uni moda tò mesures per si autodefendura.  147)

(1) Ti pruzedimënc a istanza de pert per dé ora pruvedimënc aministratifs vel l chiet dl’aministrazion cumpetënta sciche n pruvedimënt d’azetazion dla dumanda, zënza che l sibe de bujën de mo d’autra istanzes o ordens, sce la medema aministrazion ne ti comunichea nia al nteressà, tl tiermul nunzià tl articul 4, l pruvedimënt de refudeda. Te chësc cajo vëniel aplicà l articul 11/bis.

(1/bis) L’apurvazion chieta vën nce aplicheda ai pruzedimënc de verificazion nviei via aldò dl articul 71 dl decret dl Presidënt dla Republica di 28 de dezëmber 2000, n. 445, sun istanza dla stazions d’apalt, per cuntrolé l’aurità dla detlarazion sustitutiva data ora dai operadëures economics aldò dl articul 80, coma 5, pustom i), dl decret legislatif di 18 d’auril 2016, n. 50, y mudazions suzessives, per atesté la usservanza dla normes sun l dërt al lëur dla persones cun dejabltà nunziedes tl articul 17 dla lege di 12 de merz 1999, n. 68, y mudazions suzessives.  148)

(2) Ti caji te chëi che l chiet dl’aministrazion vel sciche l’azetazion dla dumanda possa l’aministrazion cumpetënta adoté pruvedimënc de autodefendura.

(3)  La despusizions de chësc articul ne vën nia aplichedes ai ac y ai pruzedimënc tl ciamp dla defendura dl ambient, dla defendura dala resieda idrogeologica, dla defendura dl patrimone culturel, storich-artistich y dla cuntreda sciche nce dla sanità, dla segurëza publica y dl vester san y nton dla persones, no ai caji te chëi che la normativa dla Union europeica dà dant l’adozion de pruvedimënc aministratifs furmei, sciche nianca ai caji te chëi che na despusizion normativa valutea l chiet dl’aministrazion sciche la refudeda dla istanza y nia ai ac y pruzedimënc ndividuei cun deliberazion dla Jonta provinziela da publiché tl Buletin Ufiziel dla Region. 149) 150) 

(1) Tl avis o tla dumanda nunziei ti articuli 21/bis y 22 muessa la persona nteresseda detlaré che la cundizions y i recuisic de lege damandei sibe dac. Tl cajo de detlarazions che ne curespuend nia ala urità o de zertificazions fauzes ne iel nia cunzedù adaté dadedò l’atività y si fazions ala lege o la ressané coche udù danora ti articuli nunziei. La persona detlarënta vën straufeda aldò dl articul 21 dla lege n. 241 dl 1990 cun la sanzion preududa dal articul 483 dl codesc penal ora che sce l fat ie n reat plu pesoch.  151)

(2) 152)

(3)  Sce l fat ne costituesc nia n majer reat vën uniun che, tla detlarazions o atestazions njuntedes ala senialazion de scumenciamënt dl’atività nunzieda tl articul 21/bis, detlarea o atestea te na maniera fauza l’esistënza di recuisic o dla cundizions per la senialazion, straufà aldò dl articul 19, coma 6, dla lege di 7 d’agost 1990, n. 241.  153)

(1)Per i fins de chësta lege mienen cun:

1. “dërt d’azes”: l dërt di nteressei de ti cialé y de giapé na copia di documënc aministratifs;
   
2. “nteressei”: duc i sogec privac, nce i purtadëures di nteresc publics o sëurandividuei, che ebe n nteres diret, cuncret y atuel, curespundënt a na situazion giuridicamënter defenduda y lieda al documënt, a chël che l vën damandà l azes;
   
3. “contranteressei”: duc i sogec, individuei o saurii da individué sun la basa dla natura dl documënt damandà, che dala eserzitazion dl azes udëssa arzicà si dërt ala reservatëza;
   
4. “documënt aministratif”: uni reprejentazion grafica, filmica, fotografica, eletromagnetica o de uni autra sort dl cuntenut di ac, nce interns o nia liei a n pruzedimënt spezifich, tenii da n’aministrazion publica o da duc i sogec de dërt publich y i sogec de dërt privat tl lim de si atività de nteres publich reguleda dal dërt statel o da chël dla Union europeica, y che à da n fé cun ativiteies de nteres publich, unfat sce si regulamentazion sustanziela ie de natura publicistica o privatistica.
   

(2)  Per i fins dl nteres publich reprejentea l dërt d’azes n prinzip generel dl’atività aministrativa per sauridé la partezipazion y per seguré la mparzialità y la trasparënza.

(3)  L dërt d’azes vën eserzità ti cunfronc dla strutures urganisatives di ënc nunziei tl articul 1/ter, coma 1, coche nce, tl lim de si ativiteies de nteres publich, ti cunfronc di cunzesciuneres de servijes publis provinziei, dla sozieteies partezipedes y dla sozieteies in house dla Provinzia y de duc i sogec nunziei tl articul 1/ter, coma 2.

(4)  Cun regulamënt d’esecuzion vëniel regulà la manieres d’eserzitazion dl dërt d’azes. 156)

(1) L dërt d’azes ne ie nia cunzedù:

1. ti caji de sucrët o pruibizion de devulgazion preudui dal urdinamënt;
   
2. ti cunfronc dl’atività dl’aministrazion publica ëuta al’emanazion de ac normatifs, aministratifs generei, de planificazion y de prugramazion;
   
3. ti pruzedimënc de selezion, ti cunfronc di documënc aministratifs che cuntën nfurmazions de carater de adatënza psichica n cont de terzi.
   

(2) Ora che sce l vën dat espressamënter l’autorisazion da pert dl organ provinziel cumpetënt ne ie l dërt d’azes nia dat per chisc documënc aministratifs:

1. protocol dla sentedes di organs colegei provinziei nia daviertes al publich;
   
2. arac facultatifs, consulënzes giuridiches y relazions tecniches, ora de cie che ie preudù dal articul 7, coma 3.
   

(3) 157)

(4) Ora che per cie che ie preudù dal coma 7, ie i documënc liei ala materies cumpededes su tlo dessot azessibli ai destinateres direc, ma nce ala persones che à l’autorità o che ie nciariedes cun la direzion y dla verdia sun i destinateres direc, ma te chësc cajo vëniel valutà, deberieda cun l diretëur de repartizion cumpetënt sce l ne ie mianó n cunflit de nteresc:

1. ntervënc d’assistënza sanitera y d’assistënza socio-economica;
   
2. ntervënc dl servisc soziel, di consultoresc per la families, di istituc per i minorens, di zëntri de igena mentela, dla cumenanzes terapeutiches y strutures semientes;
   
3. ejams, analises, cuntroi y azertamënc liei ala igena y ala sanità publica, coche nce ala defendura di luesc de vita y de lëur;
   
4. dac statistics persunei;
   
5. stat matriculer de dependënc publics y pruzedimënc disciplineres.
   

(5) L azes ai documënc aministratifs ne daussa nia unì refudà sce l tleca fé recurs al pudëi de tardivamënt.

(6) L tardivamënt dl azes vën cumandà per stravardé bujëns spezifics dl’aministrazion, dantaldut tla fasa canche i pruvedimënc vën njiniei, n relazion a documënc de chëi che la cunescënza possa dezipé l bon andamënt dl’azion aministrativa y canche l ie de bujën de seguré na scunanza temporera di nteresc nunziei pra l coma 7.

(7) L ie a uni moda da garantì ai damandënc l azes ai documënc aministratifs che n muessa cunëscer acioche n posse se curé y defënder si nteresc giuridics. Tl cajo di documënc che cuntën dac sensibli y giudizieres, vën l azes lascià pro ti lims che l ie iust de bujën y tl cheder preudù dal articul 60 dl decret legislatif di 30 de juni 2003, n. 196, tl cajo de dac tres chëi che n possa unì al savëi velch sun la cundizions de sanità o la vita sessuela.

(8) Cun regulamënt d’esecuzion vëniel disciplinà d’autri caji d’estlujion dl dërt d’azes, nce n relazion al bujën de stravardé la reservatëza de terzi, persones, grupes y mprejes.  158)

(1)  L dërt d'azes ie eserzità tres l vijionamënt di documënc y fajan na copia di documënc aministratifs tla maniera y ti lims determinei da chësta lege. L vijionamënt di documënc ie debant. Per la copies iel da paië la spëises de produzion che vën determinedes dala Jonta provnziela. La despusizions valëivles che reverda la spëises de bol resta mpe.

(2)La dumanda d'azes ai documënc muessa unì mutiveda. La muessa unì adresseda ala strutura urganisativa dl'aministrazion che à furmà l documënt o che l tën su coche uriginel. 159)

(3) La refudeda, l sburdlé ora y la limitazion dl azes ie cunzedui ti caji y tla manieres stabilides dal articul 25 y muessa unì mutivei.

(4) Sce l passa trënta dis zënza che n ebe giapà na resposta ie la dumanda unida refudeda.

(5) Contra la determinazions aministratives revardëntes l dërt d’azes y ti caji preudui dal coma 4 possel, aldò de cie che ie udù danora dal codesc dl pruzes aministratif, unì fat recurs al’autorità giudiziera aministrativa tl lim de tëmp de 30 dis. Nchin chësc tiermul possa l damandënt oradechël damandé al defensëur zivich che la dezijion vënie ejamineda mo n iede. L defensëur zivich se pronunziea tl tëmp de 30 dis dala prejentazion dla istanza. Sce chësc tëmp passa via zënza che l ne suzed velch vën la istanza rateda refudeda. Sce l defensëur zivich miena che la refudeda o la remandeda sibe ilegitima, nen nfurmeiel l damandënt y nen dàl comunicazion ala strutura urganisativa respunsabla. Sce, tl tëmp de 30 dis dala rezevuda dla comunicazion dl defensëur zivich, ne emanea la strutura urganisativa respunsabla nia l pruvedimënt cunfermatif mutivà de refudeda, vën l azes lascià pro. Sce l damandënt dl azes à cuntatà l defensëur zivich, vën l tiermul per l recurs al’autorità giudiziera aministrativa suspenduda a pië via dala data de rezevuda, da pert dl damandënt, dl resultat de si istanza al defensëur zivich o dala data n chëla che la istanza al defensëur zivich ie da raté refudeda.  160)

(6) La strutures urganisatives di ënc nunziei tl articul 1/ter, coma 1, segurea che l dërt d’azes posse unì eserzità nce tla forma telematica, aldò dla manieres preududes dala normes n forza tl ciamp dl’aministrazion digitela.  161)

(7) L dërt d’azes ai documënc vën ratà realisà cun la publicazion de chisc sun la plata web istituzionela dl’aministrazion provinziela, a cundizion che la publicazion vënie fata per ntier. 162)

(1) L mpiegà muessa se tenì al sucrët d’ufize. Cun ezezion di caji y dla modaliteies che ie ududes danora dal dërt de azes ai documënc aministratifs, ne daussa l mpiegà nia dé inant nfurmazions sun operazions aministratives o sun pruvedimënc curënc o bele stluc ju y ënghedenó sun nutizies che l ie unit al savëi tres si lëur.

(2) L diretëur dla strutura urganisativa cumpetënta o l mpiegà da d'ël delegà fej, tl cheder de si cumpetënza, copies y estrac de ates y documënc aministratifs tan inant che chësc ne ie nia pruibì dal urdinamënt.

(1)Ora che per i ac per chëi che l ie bele preudù dala lege vëniel publicà tl Buletin Ufiziel dla Region ënghe i ac che nteressea la generalità o grupes spezifiches de persones. 164)

(1)Per l fin de realisé n’aministrazion davierta, al servisc dl zitadin, y atué i criteres y i prinzips stabilii tl articul 1, segurea l’aministrazion a chichemei la majera azessibltà ai dac y ai documënc tenii su dala aministrazion sciche nce la publicazion de documënc, nfurmazions y dac revardënc si urganisazion, atività y adurvanza dla ressurses.

(2)  I documënc, la nfurmazions y i dac che ie oget de publicazion ublieda vën publichei te na sezion aposta dla plata web istituzionela dl’aministrazion y a na moda che i sibe da udëi y azessibli dala plata prinzipela.

(2/bis) La deliberazions dla Jonta provinziela y i decrec dl Presidënt y di cumponënc dla Jonta provinziela sciche nce i decrec di diretëures dla strutures urganisatives provinzieles ie publihei te na sezion aposta dla plata istituzionela dedicheda a chisc, tl respet dla normes tla materia de prutezion di dac persunei. 165)

(3)  La Jonta provinziela apurvea y ajurnea la lista ressumënta dla ublianzes de publicazion n forza tla materia de trasparënza cun la ndicazion dla strutures urganisatives provinzieles, de chëles che i diretëures ie respunsabli per l ademplimënt. La Jonta provinziela ie ënghe autoriseda a dé ora diretives ntegratives n cont dla publicazions nunziedes te chësc articul.

(4)  La nfurmazions, i documënc y i dac che ie oget dla publicazion ublieda nunzieda tl coma 1, ie publics y chichemei à l dërt de i cunëscer, de se n nuzé debant y de i adurvé y inò adurvé cun la limitazions dates dant dala normes n forza tla materia de readurvanza dla nfurmazion tl setor publich y tla materia dla prutezion di dac persunei, a cundizion che l vënie zità la funtana y respetà la ntegrità.

(5)  La publicazion di ac vën dejëuta tl lim dl tëmp preudù dala normes n forza, tl respet dl prinzip de proporzionalità, per garantì l dërt di nteressei de unì desmincei. Canche l tiermul ie passà vën i ac archiviei te na sezion aposta.

(6) 166)

(7) 167) 166)

(1) L azes zivich scëmpl ie l dërt de chi che mei de damandé i documënc, la nfurmazions o i dac che ie oget de publicazion ublienta aldò dla disposizions n forza tla materia de trasparënza, ti caji te chëi che i ne ie nia unic publichei tla seziona posta dla plata web istituzionela tlameda “Aministrazion trasparënta”.

(2) La dumanda d’azes zivich scëmpl ne ie nia sometuda a vel’ limitazion n cont dla legitimazion sogetiva dl damandënt, la ne muessa nia unì mutiveda y la ie debant.

(3) Cun regulamënt d’esecuzion vëniel disciplinà la manieres d’eserzitazion dl dërt d’azes zivich scëmpl cun chëles che n muessa garantì che chësc dërt posse unì eserzità nce telematicamënter, tla formes y tla manieres preududes dala leges n forza tla materia d’aministrazion digitela.  168)

(1) L azes zivich generalisà ie l dërt de chi che mei de azeder ai dac y ai documënc tenii su tl’aministrazion sëuraprò a chëi che ie oget de publicazion ublienta, tl respet dla limitazions y dla estlujions relatives ala scunanza di nteresc giuridicamënter relevanc.

(2) La dumanda d’azes zivich generalisà ne ie nia sometuda a vel’ limitazion n cont dla legitimazion sogetiva dl damandënt y l ne ie nia de bujën de na mutivazion.

(3) Cun regulamënt d’esecuzion vëniel disciplinà la manieres d’eserzitazion dl dërt d’azes zivich generalisà, cun chëles che n muessa garantì che chësc dërt posse unì eserzità nce telematicamënter, tla formes y tla manieres preududes dala normes n forza tla materia d’aministrazion digitela; tl medemo regulamënt iel oradechël dat dant la limitazions y la estlujions, la garanzies per i dërc di contranteressei, coche nce i mesuns giuridics tl cajo de deguna resposta, de refudeda, tardivamënt y limitazion.  169)

(1)Per sauridé la cunescënza dla normativa n forza publichea la Provinzia autonoma de Bulsan, mé per l fin dla nfurmazion, sun si plata web istituzionela na banca dac, che ie azessibla a na maniera liedia y debant y che cuntën l test storich, mudà y n forza dla leges y di regulamënc provinziei. 170)

(1) L’aministrazion, nce per l fin de atué i prinzips nunziei tl articul 1, assegurea la despunibltà, la gestion, l azes, la trasmiscion, la cunservazion y la nuzeda a na maniera digitela di dac publics y di documënc che cuntën dac publics de chëi che la ie l tituler.

(2) Tl respet dla normativa tl ciamp dl azes ai ac aministratifs, dla prutezion di dac persunei y dl dërt ala prutezion nteletuela y ndustriela, garantësc l’aministrazion la defujion di dac nunziei tl coma 1 te formac dla sort davierta y azessibli a na maniera liedia da duc, per purté pro al svilup dla mprejes, alesiré y mascimisé la partezipazion di zitadins y dla mprejes ai pruzesc de dezijion dl’aministrazion y per sustenì l avané dl’economia tres la readurvanza de chisc dac.

(3) La manieres de giaurida y de readurvanza di dac y dla nfurmazions publichedes sun la plata web istituzionela dl’aministrazion provinziela vën stabilides cun regulamënt d’esecuzion.  171)

(1) Per l arjunjimënt di fins nunziei tl articul 1 istituesc la Provinzia na Purtela per la relazions cun l publich.

(2) La Purtela nunzieda tl coma 1 à chësta funzions:

1. dejëujer ativiteies spezifiches d’urientamënt per sauridé l azes dl publich ai ufizies provinziei y per sustenì i cuntac cun i respunsabli curespundënc;
   
2. propaghé la nfurmazions che ie debujën per l publich per eserzité l dërt d’azes ai ac y d’azes zivich;
   
3. garantì l eserzize di dërc de nfurmazion, d’azes y de partezipazion;
   
4. miuré i servijes publics scutan su l publich;
   
5. abiné adum la valutazions di zitadins y dla zitadines n cont dl’atività dl’aministrazion, sciche nce si prupostes de miuramënt di servijes, y mandé chësta nfurmazions ala sëntes cumpetëntes.  172)
   

(1) I cumëmbri di organns colegiai dla Provinzia y di organns dla aziendes y di ënc dla Provinzia ne daussa ti caji nunziei dessot nia tò pert ala deliberazions:

1. sce la deliberazions à da nfé cun cuestions de strit o de cuntabltà che reverda diretamënter i cumëmbri y la strutures de chëles che ëi fej pert o l’aziendes o i ënc aministrei da ëi nstësc o che ie sometui a si ispezion o a si cuntrol;
   
2. sce l se trata de nteres persunel o de nteres, de stritoc o de cuntabltà de parënc o de persones maridedes ite nchin al segondo grado, o dla fëna o dl uem o de cunvivënc, o sce l se trata de ti fé avëi na stiera o na ncëria a chësta persones;  173)
   
3. sce ëi nstësc o si fëna o uem, si cunvivënc o descendënc direc se tira do na plura o na inamezizia grieva o sce i à n raport de credit o de debit cun la persones destinateres dl pruvedimënt;  174)
   
4. sce ëi à dat cunsëies o à fat ativiteies prufescioneles tla cuestion trateda;
   
5. sce i ie tutores, greps, mandateres, agënc o datëures de lëur de na persona adresseda da chësc pruvedimënt;
   
6. sce i ie aministradëures, diretëures respunsabli o revisëures de n ënt, n’assoziazion, n cumitat, na sozietà o n’azienda che à n nteres al pruvedimënt.
   

(2) Te uni auter cajo te chël che l ie rejons grieves de cunvenienza, damanda l cumëmber dl organn colegial l'autorisazion de se astenì. Sun l’astenscion tol l presidënt dl organn colegial la dezijion. 175)

(3) La pruibizion nunzieda tl coma 1 porta nce cun sé la ublianza de jì ora dla sala de adunanza ntan dut l tëmp che la cuestion vën trateda.

(4) La despusizions nunziedes ti comes 1, 2 y 3 vel nce per l secreter dl organn colegial.

(5) I cumëmbri dl organn colegial che se astën per la rejons nunziedes ti comes 1 y 2 vën cumpedei pra l numer che che ie de bujën per la legalità dezijionela dl'adunanza, ma nia pra l numer di y dla litadëures.

(6) Sce l se trata de organns colegiai che muessa vester cumplec per la validità dla deliberazion, muessa l cumëmber che ie mpedì aldò di comes 1 y 2 unì sustituì.

(7) La despusizions nunziedes tl coma 1 vel nce per i organns singui. Tl cajo de ncumpatibltà dl respunsabl dl organn o per la rejons nunziedes tl coma 2 vën la funzions respetives eserzitedes da si sustitut o, tl cajo de si assënza o mpedimënt, dal respunsabl dl organn gerarchicamënter plu aut.

(1) sce la desiniazion di cumëmbri di organns colegiai provinziei o de aziendes o ënc dependënc dala Provinzia ne vën nia fata tl lim de caranta dis dala dumanda, ie l organn costituì valëivlmënter, ora che sce l ie udù danora autramënter dala lege. L ne vën nia tenì cont di cumëmbri che ne ie nia unic desiniei, a cundizion che n arjonje la maiuranza di cumpunënc y che l ne se trate nia de organns colegiai perfec.

(2) Sce la numinazion di organns colegiai nunziei tl coma 1 ti spieta ala Jonta provinziela o a n auter organn provinziel possa chisc se sustituì al ënt o al organn cumpetënt dla desiniazion, sce tl lim de tëmp de caranta dis dala dumanda ne iel mo nia unit desinià i cumëmbri di organns colegiai. Te chësc cajo vën la numinazion fata tl respet di nteresc reprejentei y l vën tenì cont dla desiniazions fates nce do la destumeda dl tiermul.

(3) Per uni cumëmber efetif de n organn colegial che ie preudù dala lege valëivla, possel unì numinà n cumëmber suplënt tenian cont dla categories, di nteresc y di ufizies reprejentei. L cumëmber suplënt muessa fé pert dla medema grupa linguistica de chël efetif y ël l sustituesc tl cajo de assënza o mpedimënt.

(4) Per garantì ti organns colegiai, che ie costituii cun lege, na reprejentanza dla grupes linguistiches prupurzionela, possa l diretëur de na strutura urganisativa dla Provinzia, che te chësta funzion fej pert de n organn colegial, unì sustituì, sce l ie de bujën, da zachei che purtën a n'autra grupa linguistica dl diretëur. L funzioner sustitut muessa vester almanco tl setimo livel funzionel.

(1) Ora che ti caji te chëi che l ie udù danora autramënter da na lege speziela o da n statut, vëniel aplicà ai organns colegiai metui su dala Provinzia, dala aziendes y dai ënc da d'ëila dependënta la despusizions che vën do.

(2) La sentedes di organns nunziedes tl coma 1 ne ie nia publiches. Sce l ie assolutamënter de bujën possa l presidënt nvië esperc o mpieghei per dé spiegazions o tlarimënc de natura tecnica o giuridica sun l argumënt che vën tratà; chësta persones muessa lascé l self dla senteda tl mumënt de descuscion y votazion.

(3) Tl cajo de assënza o mpedimënt vën l presidënt dl organn colegial sustituì dal vizepresidënt o sce nce chësc ne ie nia prejënt, da n auter cumëmber ndicà da chësc nce da cajo a cajo, o dal cumëmber plu vedl.

(4) Per arjonjer l numer legal iel de bujën che almanco la maiuranza di cumëmbri dl organn sibe prejënc.

(5) La deliberazions muessa unì fates cun la maiuranza di cumëmbri dl organn che tol pert ala votazion. I cumëmbri che lascia l self dla senteda tl mumënt dla votazion per ncumpatibltà o ajache i se astën dla usc vën cumpedei per determiné la validità dla deliberazion, ma i ne vën nia cumpedei pra l numer di litadëures.

(6) La deliberazions vën fates cun votazion davierta. La deliberazions che reverda persones vën fates cun na votazion sucrëta coche nce uni iede che almanco n terzo di cumëmbri prejënc se l damanda. La zedules de vela blances, chëles che n ne ie nia boni de liejer o che ne vel nia vën cumpededes per determiné l numer de litadëures.

(7) Do che la votazions ie unides stlutes ju, determinea y cunedësc l presidënt l resultat. La pruposta ne ie nia apurveda tl cajo de valivanza de stimes per y contra.

(8) Na pruposta ne daussa nia unì sometuda a na deliberazion de n organn colegial dezidënt o cunsultif, sce la ne ie nia unida metuda sun l orden dl di y sce i cumëmbri dl organn colegial ne à nia abù azes ai ac respetifs, ora che te caji de prëscia.

(9) Ti caji de prëscia mutiveda possa l presidënt o almanco n terz di cumëmbri dl organn colegial ti purté dant al organn diretamënter tla senteda cuestions che ne ie nia sun l orden dl di a cundizion che duc i presënc o almanco cater cuinti di cumëmbri sibe a una; tl cajo de prëscia mutiveda y sce la tratazion dl argumënt depënd da n tiermul tleca l’apurvazion dla maiuranza di cumëmbri prejënc.

(10) Ala sentedes tol nce pert l secreter dl organn colegial che tl cajo de assënza o mpedimënt vën remplazà da n sustitut o dal cumëmber dl organn colegial plu jëun o da n’auter mpiegà dl’aministrazion che ie almanco dl sesto livel funzionel y ie desinià dal presidënt.

(11) I verbai dla deliberazions y dla sentedes vën sotscric dal presidënt y dal secreter dl organn colegial. I verbai dla sentedes che ie unic scric dal secreter y ie unic sotscrì dal presidënt ne à nia de bujën de mo n’apurvazion.

(12) Uni cumëmber dl organn colegial possa tò vijion di verbai dla senteda, se lascé fé na copia o pertënder, sce n cajo, cumedures furmeles o prezisazions dla detlarazions fates ntan la senteda. La cumedures vën fates dal secreter do l’apurvazion dl presidënt.

(13) I organns colegiai, che muessa vester cumplec y à cumpetënza dezijionela y cunsultiva sun nteresc defrënc, possa eserzité si cumpetënza dezijionela sce duc i cumëmbri, de chëi che l organn clegial muessa tò n cunsciderazion la minonga y l giudize, ie prejënc. La deliberazions relatives vën adotedes cun la maiuranza di prejënc che ne se possa nia se astenì dal dé ju si stima.

(14) L regulamënt sun l funzionamënt dla Jonta provinziela ne vën nia arzicà.

(15) 176)

(15/bis) La sentedes y la litazions nunziedes te chësc articul possa nce unì fates te na maniera digitela, restan mpe la ublianza de presënza ti caji udui danora espressamënter. La deliberazions fates te chësta sentedes à la medema fazion dla deliberazions fates ntan sentedes te presënza. 177)

(1) I organns eserzitea la funzions che ti spieta nchin che l tëmp de ncëria preudù per ëi toma; tl lim de chësc tiermul muessa i organns nueves unì numinei.

(1/bis) I organns litei o numinei per l tëmp dla legislatura eserzitea si funzions nchin canche la Jonta provinziela liteda da nuef vën istituida; i organns muessa unì numinei da nuef ti sessanta dis che vën do. Nchina ntlëuta ie si tëmp de ncëria prorogheda.  178)

(2) I organns che ne vën nia litei tl lim dl tiermul nunzià tl coma 1 ie proroghei per al plu carantecin dis dal di che l tiermul toma. Tl tëmp de prorogazion ne daussa i organns colegiai nia unì ntegrei tres la numinazion de cumëmbri eventualmënter tumei, efetifs o suplënc.

(3) Tl tëmp de prorogazion daussa i organns per chëi che la perioda de ncëria ie tumeda mé adoté ac de prëscia y che ne possa nia unì sburdledes, cun ndicazion spezifica dla rejons de prëscia y dla mpuscibltà che les vënie sburdledes.

(4) I ac adotei tl tëmp de prorogazion che ne toma nia sota l coma 3 ie contra la lege.

(5) Tl lim dl tiermul de prorogazion muessa i organns pra chëi che l tëmp de ncëria ie tumà unì litei da nuef.

(6) Ti caji te chëi che la numinazion nueva ie cumpetënza di organns colegiai y chisc ne fej nia la numinazions y la desiniazions che ti spieta almanco trëi dis dan la destumeda dl tiermul de prorogazion, ti vën chësta cumpetënza data al presidënt di organns che muessa la eserzité dan che l tiermul toma.

(1) Do la destumeda dl tiermul de prorogazion toma chëi organns che ne ie nia unic numinei da nuef.

(2) Duc i ac adotei dai organns tumei ne vel nia.

(3) Chëi, a chëi che ti spieta la numinazion nueva, à nce la respunsabltà di danns che se à purtà pro tres la destumeda gaujeda da si cumpurtamënt.  179)

(1) La despusizions di articuli 33 y 34 vën aplichedes, dala data dla jita n forza de chësta lege, sun duc i organns pra chëi che l tëmp de ncëria ne ie n chëla data mo nia tumeda.

(2) I organns pra chëi che la dureda dla ncëria ie bele tumeda pra la data dla jita n forza de chësta lege y che eserzitea si ncëria n prorogazion muessa unì numinei da nuef tl lim de tëmp de carantecin dis dala medema data. Do la destumeda dl tiermul toma chisc organns cun la cunseguënzes ududes danora tl articul 34, comes 2 y 3.

(3) La despusizions nunziedes tl articul 2/bis vën nce aplichedes vel nce per fac cumetui dan la jita n forza de chësta lege, sce les cunvën deplù che la despusizions nunziedes tl articul 2 dla lege provinziela di 5 d'auril dl 1995, n. 8 y tl articul 5, comes 8 y 9 de chësta lege.  180)

(1) L articul 45 dla lege provinziela di 3 de lugio dl 1959, n. 6 ie unit abrogà.

(2) L articul 7 dla lege provinziela di 21 de meidl 1981, n. 11 sustituì dal articul 4 dla lege provinziela di 12 de dezëmber dl 1983, n. 50 ie unit abrogà.

(3) L articul 14 dla lege provinziela di 7 de jené dl 1977, n. 9 ie unit abrogà.

(4) I comes 1 y 2 dl articul 8 dla lege provinziela di 28 de dezëmber dl 1981, n. 34 ie abroghei.

(5) L articul 25 dla lege provinziela di 12 de dezëmber dl 1983, n. 50 ie unit abrogà.

Chësta lege unirà publicheda tl Buletin Ufiziel dla Region. Uni un a chël che ti spieta, à da la respeté sciche lege provinziela y da la fé respeté.