(1) I sorvisc soziai é organisà:
- sciöche sorvisc daverć de assistënza a ćiasa, inće por sostignì la familia, sciöche zëntri dl dé, sciöche laboratori de preferënza integrà, partis sö te na manira adeguada sön döt le teritore;
- sciöche istituziuns che sostituësc la familia;
- sciöche abitaziuns cun n pice numer de porsones assistides y de carater de preferënza familiar, cun formes de assistënza desvalies, tolon ite les porsones assistides;
- sciöche strotöres de cura a dorada lungia o d’assistënza che döra tl tëmp te caji gravënć tl respet dles competënzes dl sorvisc sanitar dla Provinzia.
(2) I sorvisc soziai é te vigni caje daverć a formes d’assistënza nöies inće sperimentales che porta pro a curì i bojëgns nüs che vëgn a s’al dè o a superè problems bele esistënć te na manira nöia.
(3) I sorvisc soziai vëgn organisà y pità a na manira da integrè i sorvisc sanitars.
(4) L’organisaziun y les modalitês d’atuaziun di sorvisc vëgn disciplinades cun regolamënt de sorvisc aprovè dal ënt de gestiun tl respet dles diretives y di criters stabilis dala Provinzia.
(5) La direziun dla strotöra d’organisaziun di sorvisc soziai pro i ënć de gestiun garantësc na gestiun unitara y coordinada di sorvisc soziai aladô di criters de faziun, efiziënza y sveltëza. Le diretur determinëia, tl cheder dles prioritês y di programs stabilis dal ënt de gestiun, i fins por le laûr di sorvisc, programëia y coordinëia süa esecuziun y ejaminëia süa atuaziun.
(6) I sorvisc soziai de gestiun publica y privata vëgn autorisá dala Provinzia y acredità, tan inant che ai vëgn ince ma en pert finanziá cun mesi publics. Por i zëntri de cura preodüs dal articul 11/quater, coma 10 mëssel ester danman por chësc fin les autorisaziuns preodüdes dal sorvisc sanitar provinzial. La Junta provinziala determinëia i criters y les modalités por les prozedöres d’autorisaziun y d'acreditamënt por garantí la cualité soziala y profescionala di sorvisc y dles prestaziuns 44) 45)
(7) Tl caje dla gestiun de sorvisc soziai por chi che al é gnü fat domanda d’autorisaziun o acreditamënt preodüs dal coma 6, mo che n’è nia gnüs conzedüs, o sce al ne vëgn nia fat domanda por ciafè l’autorisaziun o l’acreditamënt inće do da de plü esortaziuns, é la Provinzia autorisada da despone y atuè la stlüta dl sorvisc. Les spëises va a ćiaria dl ënt de gestiun dl sorvisc. 46)
(8) Sce al ne vëgn nia ademplí les prescriziuns tl cheder dl’autorisaziun o dl acreditamënt tl tëmp preodü vëgnel odü danfora sanziuns, a ciaria di ënc de gestiun che ne les ademplësc nia, por na soma danter 20.000,00 euro y 80.000,00 euro al ann. La Junta provinziala stabilësc i criters de classamënt dles sanziuns preodüdes. Les sanziuns vëgn trates jö dal finanziamënt dl sorvisc relatif. 47)
L’art. 14 é gnü sostituì dal art. 10 dla l.p. di 11 de novëmber dl 1997, n. 16.
L'art. 21, coma 6 é gnü injunté dal art. 18 dla l.p. di 12 de otober dl 2007, n. 9 y spo dedô él gnü sostituí insciö dal art. 21, coma 4 dla l.p. di 6 de messé dl 2017, n. 8.
L’art. 14, coma 7 é gnü injuntè dal art. 3, coma 2 dla l.p. di 13 de mà dl 2011, n. 3.
L'art. 14, coma 8 é gnü ajunté dal art. 12, coma 6 dla l.p. di 24 de ma dl 2016, n. 10.