(1) Les porsones che vëgn inciariades da vardé la ciacia pó, tratan che ares fej so sorvisc, tigní sö vigni porsona che á ermes o injins por la ciacia, salvarjins vis o morc, o che vá a ciacia o á intenziun da jí a ciacia, y damané do süa identité y i comané da mostré sö la lizënza por ermes, l'atestat de paiamënt dla tassa de conzesciun statala, la lizënza de ciacia y la poliza d’assiguraziun de responsabilité zivila por la ciacia. 105)
(2) Sce al vëgn trasgredì na proibiziun nominada tl articul 4 coma 3, articul 11 coma 6, articul 14 coma 1 y articul 15, coma 1, lëtres a), b), c), i) j), n) o), p) y q) y fat na contestaziun, é döt le personal de verda dla ćiacia autorisé da secuestrè en via aministrativa la salvarjina y i mesi da ćiacia, ater co nia les ermes da füch y le ćian. Le secuester dla sóra salvarjina vëgn autorisé ti caji odüs danfora dal articul 5, coma 1/bis, y dal articul 15, coma 1, lëtres d), e), f), h) y l), sciöche inće sce al vëgn stlopetè abusivamënter sorts, che vëgn eventualmënter autorisades aladô dl articul 4, comesc 2 y 4. Le personal de verda dla ćiacia scrî n verbal aposta dles operaziuns fates y ti nen dà atira na copia al trasgressur o, sce chësc n’é nia poscibl, ti la notifichëiel al trasgressur te 30 dis. 106)
(3) Sce danter les cosses secuestrades él inće salvarjina via, se crüzia i verdaćiacia da la lascè jì atira söl post.
(4) I salvarjins ćiaciabli che é gnüs secuestrà morć ti vëgn dà al aministradù dl raiun da chël che ai é gnüs tuć, por i vëne; al po pié do ći che vëgn trat ite sciöche refata dl dann parziala, pormò do che al é gnü constatè definitivamënter che al é stè na violaziun. I salvarjins nia ćiaciabli che é gnüs secuestrà ti vëgn surandà al ofize provinzial competënt por la ćiacia che tol spo na dezijiun sön süa adoranza aladô dl caje. Sce al ne vëgn nia constatè na violaziun, ti vëgn la soma trata ite cun la venüda dl salvarjin retüda ala porsona che l’à copè.
(5) Sce i verdaćiacia sa o inće sce ai sospetëia cun rajun che chësta lege vëgnes violada mëssi ti le lascè belatira alsavëi al’Assoziaziun o al ofize provinzial competënt por la ćiacia.
(6) Al ti vëgn proibì ai verdaćiacia da jì a ćiacia tl teritore olache ai eserzitëia sües funziuns, ater co sce ai ciafa l’autorisaziun dai organns da chi che ai depënn.
(7) I verdaćiacia fej de regola so sorvisc tl teritore che ti é gnü assegné.
(8) I verdaciacia é autorisá da copé te vigni momënt salvarjins dassënn püri, che an arata avëi na maratia infetiva o parasitara, sciöche ince salvarjins ciaciabli che á na gran ferida por che ai ne mësses nia plü patí o por schivé che al se sleries fora maraties da podëi se taché. I verdaciacia, i vardians volontars di reviers privac cun n’autorisaziun dl assessur provinzial competënt por la ciacia y le Corp forestal provinzial pó apié o copé predadus da ciacé tl tëmp stabilí dal articul 4. 107)
(9) Por i fins dla planificaziun de stlopetada preodüda dal articul 27 ti ortiëia l’Assoziaziun al ofize provinzial competënt por la ćiacia vigni ann ćina ai 30 de jügn düć i dać che va debojëgn por la valutaziun de soportanza odüda danfora dal articul 3, coma 1. Por vigni revier de dërt mëss le verdaćiacia competënt confermè chisc dać de consistënza dles iarines salvaries. Por i reviers privać vëgn i dać nominà chilò dessura ortià inant diretamënter dai verdaćiacia y dai vardians volontars competënć. 108)
L'art. 32, coma 1 é gnü mudé insciö dal art. 20, coma 8 dla l.p. di 24 de setëmber dl 2019, n. 8.
Le coma 2 é gnü sostituì dal art. 2 dla l.p. di 11 de forà dl 2000, n. 4, y sostituì dal art. 17 dla l.p. di 12 d’otober dl 2007, n. 10.
L'art. 32, coma 8 é naota gnü sostituí dal art. 6 dla l.p.de 28 d'otober dl 1996, n. 23, y spo mudé insciö dal art. 2, coma 14 dla l.p. di 23 de dezëmber dl 2021, n. 14, y ala fin mudé insciö dal art. 10, coma 1 dla l.p. di 14 de merz dl 2022, n. 2.
Le coma 9 é gnü ajuntè dal art. 18 dla l.p. di 12 d’otober dl 2007, n. 10.