3) Decret dl Presidënt dla Republica dl 31 de agost 1972, n. 6701)
Apurvazion dl test unich dla leges costituzioneles che reverda l statut speziel per l Trentin-Südtirol

(1) L sistem teritoriel regiunel ntegrà, metù adum dala Region, dala Provinzies y dai ënc nunziei tl coma 3, porta pro, tl respet dl balanz di bilanc curespundënc aldò dla lege di 24 de dezëmber 2012, n. 243, a arjonjer i obietifs de finanza publica, de perecuazion y de solidarietà y al eserzize di dërc y di duvieres che nen derivea, sciche nce al’usservanza di liams economics y finanzieres che se cumporta dal urdinamënt dla Union europeica: 70)

1. tulan ju la cuntribuzion sostitutiva dla chëuta sun l valor njuntà sun la mpurtazion y l'asseniazions da leges stateles de setor,
2. tulan ju la soma ududa danora dal articul 78;
3. cun l cuntribut finanzier sëuraprò per valivé ora la finanzes publiches sëurantulan la ublianzes finanzieres che se porta pro dal eserzize de funzions stateles, nce de chëles deleghedes, determinedes a una cun l Ministere dl'economia y dla finanzes y cun l finanziamënt de scumenciadives y de proiec liei ai teritoresc de cunfin, de ndut te na mesura che monta a 100 milions de euro al ann a pië via dal ann 2010 per uni Provinzia. La sëurantëuta dla spëises de 100 milions de euro al ann vel nce canche la spëises per i ntervënc ti raions de cunfin ie per n cër ann manco che de ndut 40 milions de euro,
4. cun la modaliteies dl coordinamënt dla finanzes publiches stabilides tl coma 3.

(2)  La mesures nunziedes tl coma 1 possa mé unì mudedes cun la pruzedura ududa danora dal articul 104 y nchin a si mudazion eventuela costituesceles la cuntribuzion ala arjonta dla mires dla finanza publica nunzieda tl coma 1.

(3) Restan mpé l coordinamënt dla finanza publica da pert dl Stat aldò dl articul 117 dla Costituzion, se cruzia la Provinzies de coordiné per si teritore la finanza publica provinziela ti cunfronc di ënc locai, di ënc y di organisms publics y privac dependënc da d’ëiles y dai ënc locai, dl’aziendes saniteres, dl’universiteies, nce chëles nia stateles nunziedes tl articul 17, coma 120 dla lege di 15 de mei 1997, n. 127, dla cameres de cumerz, dla ndustria, dl artejanat y dl’agricultura y di autri ënc o organisms a urdinamënt regiunel o provinziel finanziei da chëstes a na maniera regulera. Per arjonjer i obietifs tla forma de saldo netto da finanzië preudui per la Region y la Provinzies aldò de chësc articul ti spietel ala Provinzies de definì i cuntribuc y la ublianzes ti cunfronc di ënc dl sistem teritoriel ntegrà dla cumpetënza respetiva. La Provinzies ie de verdia sun l arjunjimënt di obietifs n cont dla finanza publica da pert di ënc nunziei te chësc coma y, per i fins dl monitoraje di conc dla finanza publica, ti comunichei al Ministere dl’economia y dla finanzes i obietifs fissei y i resultac arjonc. 71)

(4) Ti cunfronc dla Region y dla Provinzies y di ënc che toca pra l sistem teritoriel regiunel ntegrà ne possel nia unì aplicà despusizions stateles che vëij danora ublianzes, cëries, acantunamënc, resserves y uni sort de cuntribuc preudui per la cassa dl Stat, tlo leprò vëniel ratà nce chëi liei al pat de stabiltà ntern che ne ie nia udui danora te chësc titul. La Region y la Provinzies se cruzia, per sé y per i ënc dl sistem teritoriel regiunel ntegrà de si cumpetënza respetiva, di fins dl coordinamënt dla finanza publica cuntenii tla despusizions legislatives spezifiches dl Stat y adatea aldò dl articul 2 dl decret legislatif di 16 de merz 1992, n. 266 si legislazion ai prinzips che costituesc i lims aldò di articuli 4 o 5 tla materies ndividuedes dal Statut, tulan de cunseguenza mesures autonomes de razionalisazion y de cuntenimënt dla spëisa miredes al smendrimënt dl debit publich y cun chëles che l vën tenì cont dla dinamica dla spëises cumplessives dl’aministrazions publiches a livel statel, a una cun l urdinamënt legislatif dla Union europeica. 72) 73)

(4/bis)  Restan mpe la ndenisazions y la reduzions recunesciudes dal Stat per i ani 2020 y 2021 n relazion ala perduta dla ntreda lieda al’emergënza dl’epidemia da COVID-19 monta per uniun di ani dal 2018 al 2021 l cuntribut dla Region y dla Provinzies ala finanza publica tla forma dl saldo netto da finanzië, n referimënt al sistem teritoriel regiunel ntegrà, a de ndut 905,315 milions, de chëi che 15,091 milions d’euro a cëria dla Region. Per uniun di ani dal 2022 monta l cuntribut preudù dal tëmp da dant a 713,71 milions de euro al ann. L cuntribut dla Provinzies vën partì su aldò de si prodot ntern lordo n referimënt al prodot ntern lordo regiunel, restan mpé la mputazion respetiva dla ntredes mplù che se porta pro dal’atuazion di regulamënc dl articul 13, coma 17 dl decret lege di 6 de dezëmber 2011, n. 201, cun mudazions ala lege di 22 de dezëmber 2001 (rectius 2011), n. 214, y dl articul 1, comes 521 y 712 dla lege di 27 de dezëmber 2013, n. 147. La Provinzies y la Region possa fé ora che na cuota dl cuntribut vënie sëurantëut dala Region.   73) 74)

(4/ter)  A pië via dal ann 2028 unirà la soma cumplessiva de 713,71 milions de euro, restan mpé si partizion danter la Region Trentin-Südtirol y la Provinzies autonomes de Trënt y de Bulsan, redetermineda uni ann da nuef aplican ala soma nunzieda dessëura la variazion perzentuela dla cëries dl debit dl’aministrazions publiches cunstateda tl ultim ann despunibl n referimënt al ann dant. La defrënza tl cunfront dl cuntribut de 713,71 milions de euro nunzieda dessëura vën partida su danter la Provinzies aldò dla cuota de si prodot ntern lordo n referimënt al prodot ntern lordo regiunel. Ai fins dla frasa dan chësta iel da tò n cunscidrazion l prodot ntern lordo ndicà dal relevamënt ISTAT atuel.   75)

(4/quater)  Dal ann 2016 garantësc la Region y la Provinzies l avaliamënt dl bilanz aldò dl articul 9 dla lege di 24 de dezëmber 2012, n. 243. Per i ani 2016 y 2017 mët la Region y la Provinzies da na pert a livel de cassa y de cumpetënza na soma cuncurdeda cun l Ministere dl’economia y dla finanzes per garantì la neutralità finanziera per i saldi de finanza publica. Dal ann 2018 inant vën l saldo programatich nunzià tl articul 1, coma 455 dla lege di 24 de dezëmber 2012, n. 228, sciche nce la despusizions per l pat de stabiltà ntern, che ie n cuntrast cun l avaliamënt dl bilanz aldò dla prima frasa de chësc coma, nia plu aplichei ai ënc cun autonomia speziela nunziei de sëura. 76)

(4/quinquies)  La despusizions tla materia de verdia, zertificazion y straufonghes, ududes danora dal articul 1, comes 460, 461 y 462 dla lege di 24 de dezëmber 2012, n. 228, resta mpé. 77)

(4/sexies)  Dal ann 2015 inant vën l cuntribut paià ite tla forma dl saldo netto da finanzië aldò dl’Acurdanza stipuleda ai 15 de utober 2014 danter l Guviern, la Region y la Provinzies, nchin ai 30 d’auril d’uni ann tla cassa dl Stat sun l capitul de bilanz 3465, articul 1, pert 10. Sce i paiamënc ne ruva nia ite nchin ai 30 d’auril coche ntredes tl bilanz dl Stat y sce l ne n vën nia fat comunicazion al Ministere dl’economia y dla finanzes, ie chësc ultim autorisà a tenì ite i cuntribuc curespundënc tla mesura dla cuota de cuntribut respetiva dala somes che ti spieta ala Region y ala Provinzies n basa a ce titul che mei; per chësc fin possel se nuzé per la somes scudides tres l organ aministratif nce dl’Agenzia dla ntredes. 78)

(4/septies)  L resta mpé la facultà da pert dl Stat de mudé, per n tëmp definì, i cuntribuc tla forma dl saldo netto da finanzië y de ndebitamënt netto metui a cëria dla Region y dla Provinzies, udui danora dal 2018 inant, per curì sce n cajo bujëns straurdeneres de finanza publica tla mesura de al plu l 10 percënt di cuntribuc nunzei. Cuntribuc tla mesura de de majera somes vën cuncurdei cun la Regions y la Provinzies. Sce l ie de bujën de pruvedimënc straurdeneres, acioche l vënie garantì l respet dla normes dla Union europeica tla materia de reecuilibrazion dl bilanz, possa i cuntribuc nunziei unì auzei per n tëmp limità de mo na perzentuela de chëla ndicheda tla frasa dant, ma a uni moda nia de plu che l 10 percënt. 79)

(4/octies)  La Region y la Provinzies sëurantol l duvier de atué cun lege aposta, che ie da dé ora nchin ai 31 de dezëmber 2014 cun la ndicazion curespundënta, la despusizions stateles sun l’armonisazion di sistems cuntabli y dla preparazion di bilanc dla Regions, di ënc locai y de si organisms, ududes danora dal decret legislatif di 23 de juni 2011, n. 118, sciche nce i ac giuridics y la fundamëntes che se porta pro dainora, a na moda che l posse unì atuà y aplicà la despusizions inant nunziedes ti lims de tëmp ndichei dal decret legislatif di 23 de juni 2011, n. 118 per la Regions a statut normal, postizipei de n ann. La postizipazion possa permò unì fata do che l ie unit dat ora n pruvedimënt statel cun chël che l vën regulamentà i azertamënc dla ntredes relatives n referimënt ala devoluzions de chëutes stateles y la pusciblteies de dé curidura ai nvestimënc cun l’adurvanza dl saldo de cumpetënza positif danter la ntredes curëntes y la spëises curëntes. 80)