t) Lege provinziala di 22 de jügn dl 2018, n. 81)
Agricoltöra soziala

(1) Tla Lista provinziala preodüda dal articul 2 él scrit ite i operadus dl’agricoltöra soziala preodüs dal articul 3 che fej chëstes ativités:

1. inserimënt sozial y dl laur de:
   
   1. lauranc cun handicap y lauranc desvantajá, sciöche definis dal articul 2, coma 1, numeri 3) y 4) dl regolamënt (UE) n. 651/2014 dla Comisciun di 17 de jügn dl 2014, che detlarëia n valgönes categories de aiüc compatibles cun le marcé intern en aplicaziun di articui 107 y 108 dl tratat;
      
   2. porsones desvantajades preodüdes dal articul 4 dla lege di 8 de novëmber dl 1991, n. 381, y mudaziuns suandëntes y de porsones sot i 18 agn tl'eté da lauré che tol pert a proiec de reabilitaziun y sostëgn sozial;
      
2. prestaziuns y ativités soziales y de sorvisc por les comunités locales y por les scores tres l’adoranza dles ressurses dl’aziënda agricola che pîta ativités por sostigní, acompagné y realisé scomenciadies por le svilup de abilités y capazités, d'orientamënt, d'inclujiun soziala y dl laur, de aurela cörta y de sorvisc d'öga por la vita da vigni de; pro chëstes ativités alda les ofertes de formaziun, d'assistënza y de sostëgn por gestí la vita da vigni de, ince cun tiers y plantes, i sorvisc de cura y d' assistënza, i sorvisc che dá fora da mangé, sciöche la mensa por jënt atempada, i pasć a ciasa y val' da insciö y i sorvisc d’alojamënt por porsones cun problems soziai, fisics y psichics;
   
3. prestaziuns y sorvisc che acompagnëia y sostëgn les terapies di doturs, psicologiches y de reabilitaziun por mioré les condiziuns de sanité y les funziuns soziales, emotives y cognitives dles porsones interessades, ince cun l’aiüt de tiers y plantes;
   
4. proiec por l'educaziun ambientala y alimentara, la sconanza dla biodiversité, sciöche ince la difujiun dla conescënza dl raiun incëria tres l’organisaziun de mêsc da paur soziai y didatics reconesciüs a livel provinzial, sciöche scomenciadies d'acoliënza y sojornanza por mituns y porsones cun dificoltés soziales, fisiches y psichiches.
   

(2) Por i fins dl inserimënt sozial y dl laur preodü dal coma 1, lëtra a) vëgnel ince apliché les desposiziuns dla lege provinziala di 14 de messé dl 2015, n. 7, y mudaziuns suandëntes.