f) Lege provinziala di 15 de aurì dl 2016, n. 81)
Normes tl ciamp dla defendura dla plantes

(1) L'aplicazion dla despusizions preududes dala normatives dla Union europeica, stateles y provinzieles tl ciamp dla defendura dla plantes ie, aldò dl decret legislatif di 19 d'agost 2005, n. 214, y mudazions suzessives, de cumpetënza dl Servisc per la defendura dla plantes dla Provinzia autonoma de Bulsan, nluegià pra la Repartizion provinziela Agricultura y da tlo inant denuminà Servisc defendura dla plantes.

(2) L Servisc defendura dla plantes se cruzia oradechël che l vënie aplicà la normatives dla Union europeica y chëles stateles y provinzieles revardëntes la zertificazion genetich-sanitera dl material de propagazion vegetel.

(3) L Servisc de defendura dla plantes se joa de ispetëures fitosaniteres, aldò dla definizion tl decret legislatif di 19 d'agost 2005, n. 214 y mudazions suzessives, numinei aposta cun decret dla respunsabla/dl respunsabl dl Servisc defendura dla plantes.

(4) Pra l Servisc defendura dla plantes iel istituì n register provinziel aposta, ulache l ie scrit ite i inuemes dla/di ispetëures per la defendura dla plantes cun l numer d'identificazion curespundënt, l titul de stude y la sotscrizion autenticheda. La zescion dla ncëria cumporta la piersa dla cualificazion de ispetëura/ispetëur per la defendura dla plantes y la cancelazion dal register.

(5) L Servisc defendura dla plantes possa se jué dla culaburazion d'autri ufizies o d’autra strutures dla Provinzia cun esperienza desmustreda tl ciamp fitosaniter. La ispetëures y i ispetëures per la defendura dla plantes che lëura per d'autra aministrazions publiches che l Servisc defendura dla plantes respuend funzionalmënter y tecnicamënter ala respunsabla/al respunsabl dl Servisc defendura dla plantes.

(6) Tl'eserzitazion de si ncëria dejëuj la/i ispetëures per la defendura dla plantes la funzions d'autoriteies de polizai giudiziera, aldò dl articul 57 dl codesc de pruzedura penala.

(1) Per schivé o limité l se sparpanië ora de organisms danejënc ratei de relevanza fitosanitera particulera stabilësc la respunsabla/l respunsabl dl Servisc defendura dla plantes mesures fitosaniteres adatedes, tlo leprò ie danter l auter la pruibizion de cumerzialisé y senté ora plantes y la desnatureda dla plantes ostes. L'autoriteies locales ie ubliedes a apliché la despusizions scrites dant dal Servisc defendura dla plantes.

(2) Per cumbater l se spander ora di organisms danejënc aldò dl coma 1 possa la Jonta provinziela se ciarië de spëises y lëures, nce n economia.

(1) L ie pruibì traté cun prodoc fitosaniteres che danejea l'eves plantes n flëura de cultivazions de lëns, sienes, ierbes y plantes salveres y decuratives alalergia.

(2) L ie oradechël pruibì traté te tëmps dl ann spezifics cultivazions cun prodoc fitosaniteres che ie de dann per l'eves. I tëmps, la cultivazions y i prodoc fitosaniteres che ie oget de pruibizion vën determinei uni ann dala respunsabla/dal respunsabl dl Servisc defendura dla plantes do avëi audì l Zënter de consulënza per l zidlamënt de fruc y ua dl Südtirol y l'assoziazion di zidladëures d'eves a livel provinziel.

(3) La Jonta provinziela dà ora pruvedimënc per miuré la lerch vitela dl'eves, y tl particuler per miuré cualitativamënter y avané la pastures dl'eves.

(1) Per la defendura dla produzion de patac da senté ora y d'autra cultivazions agreres dà la respunsabla/l repunsabl dl Servisc defendura dla plantes ora prescrizions che reverda danter l auter la ublianza d'adurvé mé material da senté ora zertificà y de tò mesures de zidlamënt y de defendura dla plantes particuleres.

(1) Per l'ativiteies de produzion, cumerzialisazion y mpurtazion de plantes y prodoc vegetei iel da apliché cie che ie udù danora dal decret legislatif di 19 d'agost 2005, n. 214, y mudazions suzessives. L'autorisazion fitosanitera curespundënta vën data ora dala respunsabla/dal respunsabl dl Servisc defendura dla plantes.

(2) Chi che ne à nia l'autorisazion preududa tl articul 19 dl decret legislatif di 18 d'agost 2005, n. 214 y mudazions suzessives y che uel perdujer plantes da frut destinedes mé al'adurvanza de si luech muessa ti prejenté al Servisc defendura dla plantes na detlarazion sun n formuler aposta, che atestea la sort, la varietà, la cuantità y la luegia dla plantes che l perduj. La respunsabla/L respunsabl dl Servisc defendura dla plantes determinea cun decret per ce sortes y cuantiteies che chësta detlarazion muessa unì prejenteda.

(1) Per la produzion y la cumerzialisazion dl material de propagazion vegetel dla plantes da frut y dl'ua vëniel aplicà la despusizions preududes dala normatives stateles y dla Union europeica n forza.

(2) L'assessëura provinziela/L assessëur provinziel de cumpetënza per l'agricultura possa dé ora despusizions de njonta che reverda la zertificazion ulentera dl material de propagazion per sortes singules.

(3) L ie pruibì marciadé cun material de propagazion vegetel dla plantes da frut de categuria "CAC" aldò dla normativa dla Union europeica, acumpanià da documenënc de cumerzialisazion che reporta la scrita "liede da virus" (VF) o "virus testà" (VT) o scrites semientes, o marcà cun etichëtes che ti semea per dimenscion o culëur ala etichëtes ufizieles de zertificazion y che reporta la scrita "liede da virus" (VF) o "virus testà" (VT) o scrites semientes.

(4) La produzion y l cumerz de material de propagazion de plantes da bosch ie regulei cun la lege provinziela di 21 d'utober 1996, n. 21 y mudazions suzessives.

(1) La Provinzia autonoma de Bulsan ie l'autorità locala cumpetënta per l'atuazion dl cheder per l'azion cumunitera finaliseda a n'adurvanza sustenibla di pestizic nunziei tla diretiva 2009/128/CE, tla normes d'atuazion stateles curespundëntes y tl plann d'azion naziunel per l'adurvanza sustenibla.

(2) La Provinzia autonoma de Bulsan ie nce l'autorità locala cumpetënta per l'atuazion dl Regulamënt (CE) n. 834/2007, che reverda la produzion biologica y l'etichetatura di prodoc biologics, y dl Regulamënt (CE) n. 889/2008, che reverda la maniera d'aplicazion dl regulamënt (CE) n. 834/2007, y dla normes d'atuazion stateles curespundëntes.

(3) Per schivé la fazions negatives y i danns per persones, tieres o cosses, dà la Jonta provinziela ora, tl respet dla normes dla Union europeica y stateles, despusizions sun l'adurvanza sustenibla di pestizic.

(4) La Jonta provinziela dà ora despusizions per l'atuazion de chësta lege y per l'aplicazion dl plann d'azion naziunel per l'adurvanza sustenibla de prodoc fitosaniteres. La despusizions dates ora dala Jonta provinziela ie da publiché sun l Buletin Ufiziel dla Region.

(5) Tla materia d'adurvanza sustenibla di pestizic ti spietel ai chemuns la funzions aministratives atribuides o deleghedes dala Provinzia autonoma de Bulsan a una cun l Cunsëi di chemuns.

(1) L Servisc defendura dla plantes ie de verdia che l vënie respetà la despusizions cuntenides ti articuli 2, 3, 4 y 5 y tl articul 6, coma 1, 2 y 3.

(2) La verdia sun la despusizions preududes dal articul 7, comes 3 y 4 vën eserziteda dal'autoriteies cumpetëntes a livel statel, provinziel y cumenel, tlo leprò toca nce l'Azienda sanitera dl Südtirol. Chëstes se cruzia de azerté la viulazions y de les cuntesté. La sanzions aministratives fates per la viulazion dla despusizions nunziedes tl articul 7, coma 3 possa unì ciariedes dal ambolt cumpetënt.

(1) Chi che ne respetea nia la prescrizions dl Servisc defendura dla plantes aldò dl articul 2, coma 1 vën straufà cun na sanzion aministrativa da 500,00 euro a 3.000,00 euro. La sanzion aministrativa ie dl dopl sce la viulazion vën fata da firmes autorisedes aldò dl articul 19 dl decret legislatif di 19 d'agost 2005, n. 214 y mudazions suzessives, o da firmes che, n basa ai dac dla Camera de cumerz, ndustria, artejanat y agricultura, se cruzia prufesciunalmënter dla proietazion, dla realisazion y dla manutenzion de parcs y verzons.

(2) Sce la prescrizion de mesures de defendura dla plantes nunziedes tl articul 2, coma 1, reverda la pruibizion de senté ora plantes o l desnaturé de plantes ostes, resta la spëises eventualmënter abudes dal'aministrazion provinziela per l'esecuzion d'ufize dl ntervënt scrit dant defin a cëria de chi che ne à nia respetà la despusizions.

(3) Chi che ne respetea nia la pruibizion dl articul 3, comes 1 y 2, ie sometù a na sanzion aministrativa da 500,00 euro a 5.000,00 euro.

(4) Chi che ne respetea nia la pruibizion dl articul 4, coma 1, ie sometù a na sanzion aministrativa da 250,00 euro a 1.500,00 euro.

(5) Chi che vënd, njinia per unì vendù o mët te n'autra forma sun l marcià material de propagazion vegetel zertificà che ne curespuend nia ala ndicazions dl'etichëta ufiziela, ie sometù a na sanzion aministrativa da 1.000,00 euro a 5.000,00 euro.

(6) Chi che ne respetea nia la pruibizion dl articul 6, coma 3, ie sometù a na sanzion aministrativa da 1.000,00 euro a 5.000,00 euro.

(7) Chi che ne respetea nia la pruibizion dl articul 7, coma 3, ie sometù a na sanzion aministrativa da 250,00 euro a 5.000,00 euro tl cajo de cultivazions de ierbes, y da 250,00 euro a 10.000,00 euro tl cajo de cultivazions de lëns.

(8) Per cie che ne ie nia udù danora espressamënter da chësta lege vëniel aplicà la despusizions de straufonga preududes dala normes stateles de referimënt.

(1) L vën abrogà chësta despusizions:

1. la lege provinziela di 23 de merz 1981, n. 8 y mudazions suzessives "Mesures per la prutezion dla cultivazions agreres y dl'eves y per l cuntrol dla cultivazions de lëns da fruc";
   
2. l articul 10 dla lege provinziela di 29 de juni 1989, n. 1;
   
3. l articul 10 dla lege provinziela di 27 d'auril 1995, n. 9.
   

(1) La despusizions d'atuazion, dates ora aldò dla lege provinziala di 23 de merz 1981, n. 8, y mudazions suzessives, vën aplichedes nchin che la despusizions d'atuazion de chësta lege vën emanedes.

(1) Chësta lege ne cumporta deguna cëries nueves o majeres a cëria dl bilanz provinziel.

Chësta lege unirà publicheda tl Buletin Ufiziel dla Region. Uni persona a chëla che l ti spieta à da la respeté y da la fé respeté sciche lege provinziela.