(1) I comitënc publics vá inant cun la surandada di apalc sön la basa dl’oferta plü vantajosa dal punt de odüda economich. 59)
(2) L’oferta economicamënter plü vantajosa dal punt d'odüda dl’aministraziun comitënta vëgn ciafada sö sön la basa dl prisc o dl cost, ti jon do a na valutaziun cost/faziun, sciöche al cost dl ziclus de vita preodü dal articul 68 dla diretiva 2014/24/UE, y pó tó ite le miú raport cualité/prisc, che vëgn valuté sön la basa de criters cualitatifs, ambientai y/o soziai, coliá al oget dl apalt publich en chestiun. Pro chisc criters toca:
- la cualité, che tol ite le valur tecnich, les carateristiches estetiches y funzionales, l'azessibilité, la proietaziun adatada a düc i utënc, les carateristiches soziales, ambientales y inovatives, sciöche ince la comerzialisaziun y les condiziuns che alda lapró;
- l'organisaziun, les cualifiches y l'esperiënza dl personal inciarié da fá l’apalt, sce la cualité dl personal inciarié pó avëi n’influënza importanta sön le livel dl’esecuziun dl apalt, o
- sorvisc ai cliënc y assistënza tecnica, condiziuns de surandada sciöche data de surandada, prozes de surandada y termin de surandada o d'esecuziun.
(3) L’elemënt sön le cost pó ince surantó la forma de n prisc o cost fis, sön la basa de chël che i operadus economics se mosöra ma plü aladô de criters cualitatifs. Pro les gares cun prozedöra de surandada basada sön l’oferta economicamënter plü vantajosa ne pól de regola nia ma gní adoré le prisc o le cost sciöche su criter de surandada.
(4) I criters de surandada é coliá al oget dl apalt publich sce ai reverda a val’ moda y te vigni fasa de so ziclus de vita laurs, fornidöres o sorvisc da forní tl cheder de chësc apalt, cun lapró faturs - ince sce ai ne toca nia pro le contignü sostanzial dl apalt - che é coliá:
- al prozes spezifich de produziun, fornidöra o barat de chisc laurs, fornidöres o sorvisc, o
- al prozes spezifich por na fasa suandënta de so ziclus de vita.
(5) I criters de surandada n'á nia la faziun da ti dé na liberté de lîta ilimitada al’aministraziun comitënta. Ai garantësc la poscibilité de na concorënza efetiva y á spezificaziuns che conzed da valuté la faziun dles informaziuns pitades dai pitadus por valuté le degré de sodesfaziun di criters de surandada dles ofertes. Tl caje de dübi verifichëia i comitënc publics sciöche al alda che les informaziuns y les proes dades jö dai oferënc sides dërtes.
(6) L’aministraziun comitënta dá dant ti documënc ci pëis che ara ti dá a vigni criter por ciafé sö l’oferta economicamënter plü vantajosa, ater co sce al vëgn ma determiné aladô dl prisc.
(7) Chësta evaluaziun pó gní dada dant preodon na lerch olache la desfarënzia danter le minim y le mascim mëss gní adatada.
(8) Sce ara ne vá nia da fá na evaluaziun por rajuns obietives, dá dant l’aministraziun comitënta i criters pian ia dal plü important.
(9) I comitënc publics pó preodëi tles condiziuns dla gara, che sce al ne vëgn nia arjunt le numer minimal de punc por la cualité dan l’avaliamënt di parametri, vëgnon stlüc fora dala prozedöra de gara y l’oferta ne vëgn nia daurida.