s) Lege provinziala di 12 de otober dl 2015, n. 141)
Despusizions sun la partezipazion dla Provinzia autonoma de Bulsan ala furmazion y al'atuazion dla normativa dla Union europeica

(1) Tla materies de si cumpetënzes se cruzia la Provinzia autonoma de Bulsan de atué debota i ac dla Union europeica y de adaté l urdinamënt giuridich dla Provinzia a chël dla Union europeica garantian a chësta maniera l ademplimënt dla ublianzes che se porta pro dala purtenienza dla Talia ala Union europeica, sun la basa di prinzips de sussidiarietà, proporzionalità, efizienza, trasparënza y partezipazion democratica.

(2) Chësta lege stabilësc la pruzedures miredes al'atuazion asvelta di ac dla Union europeica tla materies de cumpetënza legislativa dla Provinzia y al adatamënt dl urdinamënt giuridich provinziel a chël dla Union europeica.

(1) Aldò de chësta lege mienen cun:

1. ac dla Union europeica: regulamënc, diretives y uni auter at dla Union europeica che lieie i Stac cumëmbri a tò pruvedimënc de atuazion o adatamënt;
   
2. Chëurt de giustizia: Chëurt de giustizia dla Union europeica
   
3. Cumiscion: Cumiscion europeica
   
4. Cunsëi: Cunsëi dla Union europeica;
   
5. EU Pilot: pruzedimënt che vën dan la pruzedura de nfrazion che nvieia via n dialogh nia furmel y struturà danter la Cumiscion y l Stat cumëmber nteressà per schivé na pruzedura de nfrazion;
   
6. pruzedura de nfrazion: pruzedura nvieda via aldò dl articul 258 dl Tratat sun l Funzionamënt dla Union europeica (TFUE) contra n Stat cumëmber che ne à nia ademplì una dla ublianzes n basa ai tratac.
   

(1) Tl cheder de si cumpetënzes porta la Provinzia pro n cuntribut diret per lauré ora i ac dla Union europeica tulan pert cun la delegazions dl Guviern ala ativiteies dl Cunsëi y dla grupes de lëur sciche nce di Cumiteies dl Cunsëi y dla Cumiscion aldò dla manieres stabilides dala normes spzifiches tla materia.

(1) La Provinzia atuea, tla materies de si cumpetënza, debota la diretives europeiches.

(2) La Jonta provinziela verifichea l stat de cunformità dl urdinamënt giuridich dla Povinzia cun chël dla Union europeica y do che l ie unit azertà l bujën ti presenteiela al Cunsëi provinziel n dessëni de lege cun l titul "Despusizions per l ademplimënt dla ublianzes dla Provinzia autonoma de Bulsan che se porta pro dala purtenienza dla Talia ala Union europeica"; l titul ie cumpletà dala indicazion "Lege europeica provinziela" y dal ann de referimënt.

(3) Tla relazion al dessëni de lege dà la Jonta provinziela tlarimënc n cont dl stat de cunformità dl urdinamënt giuridich dla Provinzia cun l dërt dla Union europeica y n cont dl stat dla pruzedures de nfrazion eventueles a cëria dl Stat pervia dla mancianza de ademplimënc dla Provinzia.

(3/bis)I ac per l’atuazion de diretives dla Union europeica ne daussa nia preudëi la ntroduzion o l mantenimënt de livei de regulamentazion plu auc de chëi damandei dala diretives nstësses. L resta mpe la mesures tla materia de defendura dla mendranzes linguistiches y per la scunanaza de nteresc provinziei spezifics. 2)

(4) L resta mpe la puscibltà, te caji d'ezezion pervia de destumënzes o tl cajo dla predispusizion de normes organiches, che mesures d'atuazion spezifiches dla normativa dla Union europeica vënie ntegredes te d'autra leges provinzieles.

(1) L'atuazion asvelta di ac dla Union europeica y l adatamënt periodich dl urdinamënt giuridich dla Provinzia a chël dla Union europeica ie segurei dala lege europeica provinziela, che cuntën chësc:

1. despusizions che ie de bujën per atué o seguré l'aplicazion di ac dla Union europeica;
   
2. despusizions che muda o abroghea normes provinzieles che va contra la ublianzes indichedes tl articul 1.
   
3. despusizions che autorisea la Jonta provinziela o l Presidënt/la Presiënta dla Provinzia a atué la diretives tres regulamënc tla materies nia curides da resserva assoluta de lege.
   
4. despusizions cun chëles che l vën determinà ciuna diretives che ie da atué n via aministrativa.
   

(1) L Ufize Legislatif dl Secretariat generel dla Provinzia se cruzia de monitoré i ac dla Union europeica ti comunican i resultac ala pertes sozieles, al Cunsëi provinziel y ala repartizions provinzieles cumpetëntes tla materia. Chësta ultimes ti manda al Ufize Legislatif provinziel la prupostes de normes ëutes a atué i ac dla Union europeica o a adaté l urdinamënt giuridich dla Provinzia a chël dla Union europeica. Cun referimënt a pruzedimënc EU Pilot eventuei o a pruzedures de nfrazion manda la repartizions, nce n via preventiva, prupostes de adatamënt dla normes provinzieles de setor curespundëntes.

L Ufize Legislatif provinziel lëura pona ora l dessëni de lege europeica provinziela.

(1) La normes dla Union europeica nia aplicables diretamënter, che muda manieres d'esecuzion y carateristiches tecniches de diretives bele sëurantëutes tl urdinamënt giuridich dla Provinzia, vën atuedes n via aministrativa.

(1) Duc i pruvedimënc adotei dala Provinzia per atué la diretives europeiches tla materies de si cumpetënza legislativa à tl tutul l numer identificatif dla diretiva atueda y vën mandei al Departimënt per la politiches europeiches dla Presidënza dl Cunsëi di Ministri.

(2) La sentënzes dla Chëurt de giustizia che cumporta per la Provinzia la ublianza de adatamënt ie indichedes tla despusizions che muda la normativa n forza aldò dla sentënzes nstësses.

(1) Ntan l tëmp nchin al tiermul dl'atuazion dla diretives europeiches ne vëniel nia dat ora normes legislatives o regulamënc y l ne vën nia adotà i ac aministratifs cuntreres al cuntenut dla diretives y nia cumpatibli cun i prinzips che nen derivea.

(1) Duc i pruvedimënc adotei dala Provinzia autonoma de Bulsan per dé atuazion ai ac dla Union europeica o ala sentënzes dla Chëurt de giustizia o che adatea l urdinamënt giuridich dla Provinzia a chël dla Union europeica ie publichei tl Buletin Ufiziel dla Region.

(1) Chësta lege ne cumporta nia cëries nueves o majeres a cëria dl bilanz provinziel.

Chësta lege unirà publicheda tl Buletin Ufiziel dla Region.

Uni persona a chëla che l ti spieta à da la respeté y da la fé respeté sciche lege provinziela.