(1) I raporc de laur dl personal dla Provinzia de Balsan y di ënc publics che depënn da d'ëra o olache l'ordinamënt é de süa competënza legislativa o delegada dla Provinzia, vëgn regolamentá dales desposiziuns dla seziun I, titul II, dl liber V dl codesc zivil y dales leges sön le raport de laur subordiné tl’impresa, tl respet dles atres desposiziuns preodüdes da chësta lege o che vëgn dales fontanes normatives preodüdes da d'ëra. Desposiziuns de lege o regolamënc che regolamentëia i raporc de laur dl personal dé dant dessura o de na pert de chësc, pó gní abrogades da contrac coletifs suandënc ma por les materies resservades ales prozedöres de contrat coletif y ne pó nia gní plü aplicades por la pert tuta jö, ater co sce na lege provinziala desponn val’ d’ater.
(1/bis) Le regolamënt di raporc de laur preodüs dal coma 1 vëgn a se le dé tl respet dles indicaziuns dla diretiva (UE) 2019/1158 dl Parlamënt europeich y dl Consëi di 20 de jügn dl 2019 sön la compatibilité danter laur y vita privata por geniturs y parentela che pita assistënza y l’abrogaziun dla diretiva 2010/18/UE dl Consëi. 2)
(2) I raporc de laur preodüs dal coma 1 vëgn regolamentá tres contrat. I contrac coletifs vëgn stlüc jö aladô dles modalités y di criters preodüs dai articui 4, 5, 6 y 7 de chësta lege. I contrac individuai garantësc la parificaziun contratuala y a vigni moda n tratamënt nia plü stlet co chël preodü dai contrac coletifs corespognënc.
(3) Desvian dal articul 2103 dl codesc zivil ne vëgnel nia arjunt, sce al vëgn ademplí temporaneamënter inciaries plü altes, le dërt da les ciafé definitivamënter. La surandada de ma na pert di compic de inciaries plü altes ne costituësc nia la surandada de inciaries plü altes.
(4) La regolamentaziun dl trasferimënt dl'aziënda preodüda dal articul 2112 dl codesc zivil vëgn ince aplicada tl caje de passaje de personl di ënc preodüs dal articul 1 a sozietés o ënc privac, sön la basa de desposiziuns de lege, de regolamënc o contrac, cun chi che al ti vëgn surandé daldöt o en pert les funziuns realisades dal personal dal ënt de portignënza ala sozieté privata o al ënt privat. Te de te caji vëgnel aldí les organisaziuns sindacales rapresentatives a livel de raiun.
(5) Les mosöres sön l'organisaziun interna di ofizi y la gestiun dl personal vëgn tutes dai organs responsabli dla gestiun dl personal aladô dles capazités y di podëis dl datur de laur privat, tignin cunt dles desposiziuns varëntes sön le personal dirigënt y la strotöra dirigenziala.