(1) Por sostigní l’inserimënt miré de posć de laur dl’Aministraziun provinziala de porsones cun handicap, sciöche ince de d’atres porsones che á le dërt da gní colocá obligatoriamënter, vëgnel preodü n contingënt aposta a pert de 40 posć. Sce chisc posć vëgn curis spo vëgn le contingënt indô metü sö cina che al vëgn ademplí la cuota resservada por lege ales categories sconades.
(1/bis) I ënc publics che depënn dala Provinzia o olache l’ordinamënt toca pro süa competënza legislativa o delegada pó ince, tl respet dla condiziun preodüda dal articul 8, coma 2, lëtra c), tó sö chëstes porsones cun handicap aladô dla lege di 12 de merz dl 1999, n. 68, y mudaziuns suandëntes, fora dl contingënt di posć:
- porsones che á stlüt jö dan süa assunziun na convenziun individuala por l’inserimënt tl monn dl laur aladô dla lëtra d) dl coma 1 dl articul 14 dla lege provinziala di 14 de messé dl 2015, n. 7;
- porsones che á stlüt jö dan süa assunziun na convenziun individuala por le laur aladô dla lëtra a) dl coma 1 dl articul 16 dla lege provinziala di 14 de messé dl 2015, n. 7;
- porsones che á tut pert dan süa assunziun a n proiet por l’adoranza temporanea de porsones dejocupades aladô dla lege provinziala di 11 de merz dl 1986, n. 11, y mudaziuns suandëntes;
- porsones che á stlüt jö dan süa assunziun n practicum aladô dl articul 18 dla lege di 24 de jügn dl 1997, n. 196. 36)
(1/ter) La Junta provinziala regolamentëia l’assunziun de porsones cun handicap sön domanda nominala pro i ënc publics. 37)
(2) Por chësc fin é l’azes al sorvisc ince conzedü desvian dales condiziuns profescionales preodüdes dai singui profii profescionai. Le tratamënt iuridich y economich tëgn cunt dla cualificaziun profescionala arjunta y vëgn determiné sön la basa di criters da stabilí cun deliberaziun dla Junta provinziala, a öna cun les organisaziuns sindacales rapresentatives a livel de raiun.
(2/bis) Por tó sö porsones preodüdes dal articul 2 dla lege provinziala di 14 de messé dl 2015, n. 7, sciöche ince porsones preodüdes dala lege di 5 de forá dl 1992, n. 104, pó l’atestat preodü dal articul 4 dl decret dl Presidënt dla Republica di 26 de messé dl 1976, n. 752, y mudaziuns suandëntes, gní sostituí da n atestat dles competënzes linguistiches arjuntes. L’atestat vëgn relascé dal ofize provinzial competënt por i ejams de bi- y trilinguism do n ejam fat aladô dl articul 3 dl decret dl presidënt dla Republica di 26 de messé dl 1976, n. 752, y mudaziuns suandëntes. 38)
(3) 39)
(4) Por n’integraziun plü mirada dles porsones cun handicap tl ambiënt de laur surantol i singui ofizi dles Repartiziuns provinziales Politiches soziales, Laur, Personal y dla Direziun generala dla Provinzia, vignöna aladô de sü dovëis isituzionai, la funziun che ti é gnüda atribuida dala reforma statala al responsabl/ala responsabla di prozesc de inserimënt de porsones cun handicap preodü dala lege di 12 de merz dl 1999, n. 68, y mudaziuns suandëntes, dantadöt por ci che reverda la garanzia de mosöres adatades preodüdes dal articul 3, coma 3/bis dl decret legislatif di 9 de messé dl 2003, n. 216, y mudaziuns suandëntes y la programaziun de tëmps y modalités por ademplí la cuota obligatoria preodüda por la Provinzia. 40)
L'art. 11, coma 1/bis é gnü injunté dal art. 1, coma 1 dla l.p. di 16 d'agost dl 2022, n. 10.
L'art. 1, coma 1/ter é gnü injunté dal art. 1, coma 1 dla l.p. di 16 d'agost dl 2022, n. 10.
L'art. 11, coma 2/bis é gnü ajunté dal art. 13, coma 1 dla l.p. di 19 d’agost dl 2020, n. 9.
L'art. 11, coma 3 é gnü abroghé dal art. 1, coma 2 dla l.p. di 16 d'agost dl 2022, n. 10.
L'art. 11, coma 4 é gnü ajunté dal art. 3, coma 9 dla l.p. di 11 de messé dl 2018, n. 10.