b) Lege Provinziala di 28 de otober dl 2011, n. 121)
Integraziun dles zitadines y di zitadins da foradecà

Publicada tl Boletin Ofizial di 8 de novëmber dl 2011, n. 45.

Art. 13 (Formaziun profescionala por adulć y politiches dl laûr)

(1) La Provinzia po mëte a jì cursc de cualificaziun, de recualificaziun y d’ajornamënt profescional aposta por les zitadines y i zitadins da foradecà cun chisc fins:

fà jì adöm domanda y oferta sön le marćé dl laûr;
promöie la conescënza y l’aplicaziun dles normes sön la proteziun dla sanité y sön la segurëza sön le post de laûr;
svilupé l’acuisiziun de competënzes interculturales y de mediaziun che va debojëgn tl monn dl laûr por funziuns o profesciuns spezifiches;
tó y jì de vigni sort de impedimënć che preiudichëia le medemo dërt d’azès dles zitadines y di zitadins da foradecà al marćé dl laûr tla provinzia.

(2) La Provinzia sostëgn les zitadines y zitadins da foradecà, tl cheder di provedimënć de formaziun profescionala por adulć odüs danfora dales normes varëntes, cun mosöres de formaziun y d’acompagnamënt linguistich por la formaziun profescionala.

(3) La Provinzia sostëgn la sojornanza y la permanënza tl Südtirol de zitadines y zitadins da foradecà che, cun n diplom de n’université o de na scora alta o na spezialisaziun profescionala particolara, passa n tëmp de formaziun profescionala cun carater de laûr dependënt pro daturs de laûr che operëia tl Südtirol o che tol pert a proieć de inrescida scientifica pro istituć de inrescida publics o privać. [La Provinzia se crüzia dantadöt, tl cheder de sües competënzes, che la Diretiva 2005/71/CE che reverda les prozedöres d’amisciun de zitadines y zitadins de stać terzi al’inrescida scientifica, vëgnes atuada daldöt tl Südtirol, che al vëgnes stipulé convenziuns d’acoliënza y che ai vëgnes de conseguënza tratà anfat.] 2)

Verfassungsgerichtshof - Urteil vom 14. Jänner 2013, Nr. 2 - Einwanderung und Integration – staatliche Zuständigkeit – Gesetzeswidrigkeit der Voraussetzung der fünfjährigen Ansässigkeit

La Curt Costituzionala à detlarè cun sentënza n. 2 di 14 de jenà dl 2013 che les parores „y a süa dorada“ dl art. 1, coma 3, lëtra g); l'art. 6, coma 3, lëtra c); le referimënt ala lëtra c) dl art. 6, coma 6; l'art. 10, comesc 2 y 3; l'art. 12, coma 4; l'art. 13, coma 3, secunda frasa; l'art. 14 comesc 3 y 5; le referimënt ala residënza zënza interuziun por n ann dl art. 16, coma 2; le referimënt ala dorada de cin agn dl art. 16, comesc 3 y 4 é cuntra la lege.