a) Lege Provinziala di 1 de messè dl 1993, n. 111)
Regolamënt dl volontariat y dl sostëgn sozial 2)

(1) La Provinzia autonoma de Balsan aprijëia, sostëgn y valorisëia la funziun soziala dles organisaziuns de volontariat metüdes sö lediamënter, sciöche espresciun de partezipaziun, solidarieté y pluralism; ara sostëgn so svilup sconan süa autonomia y promöi le contribut original por arjunje i fins de carater sozial, zivil y cultural te chësta lege.

(2) Les organisaziuns de volontariat colaborëia independentemënter dales motivaziuns etiches y morales che les ispirëia, cun l'ënt publich, portan pro al'umanisaziun di sorvisc pità dantadöt tl setur sozio-sanitar, assistenzial, educatif y cultural, sciöche inće ala prevenziun y ala remoziun dles emarginaziuns soziales, ala promoziun y al svilup dles ativitês sportives, de aorela cörta y dl tëmp lëde, ala conservaziun y valorisaziun dles tradiziuns. Chësta ativité é l'espresciun de na solidarieté umana sinziera, de altruism, de desponibilité dejinteressada a bëgn dla singola porsona o de düć, inće conform ala cooperaziun al svilup aladô dla lege provinziala di 19 de merz dl 1991, n. 5, o sciöche momënt d'agregaziun tla sozialisaziun dantadöt de grups emarginà.

(1) Te chësta lege mìnon cun ativité de volontariat chëra fata personalmënter, de süa bona a na moda spontana y debann tres l'organisaziun de chëra che la porsona che fej volontariat fej pert, zënza intenziun de davagn, inće indiret, y ma por fins de solidarieté y de impëgn sozial.

(2) L'ativité de volontariat ne po nia gnì paiada, gnanca dal benefiziar/dala benefiziara. Ala porsona che fej volontariat ti pol ma gnì retü dal'organisaziun de portignënza les spëises sostignides veramënter por l'ativité fata, ti limić fać fora damperfora dal'organisaziun.

(3) L'ativité de volontariat ne va nia a öna cun n raport de laûr subordiné o autonom y cun degun ater raport de contignü patrimonial cun l'organisaziun de chëra che al/ara fej pert.

(4) A porsones che à arjunt de gragn mirić tl setur dl volontariat, sciöche preodü tl articul 1, ti pol gnì conzedü onoranzes dala junta provinziala, aladô dles formes y modalitês fates fora cun regolamënt d'esecuziun de chësta lege.

(5) Cun ativité de sostëgn sozial mìnon chëra fata zënza intenziun de davagn, dantadöt a bëgn de mëmbri, te chisc seturs:

1. assistënza soziala y sanitara;
   
2. cultura, educaziun y formaziun;
   
3. sport, recreaziun y tëmp lëde;
   
4. proteziun zivila, sconanza dl ambiënt y dla contrada;
   
5. promoziun dl turism sozial, sconanza di dërć di consumadus, dërć dles porsones, avalianza dles chances y cooperaziun al svilup.
   

(6) Les organisaziuns de sostëgn sozial s'anüza a na moda significativa dles ativitês de volontariat y debann de sü mëmbri por arjunje sü fins; ares po inće, sce al va debojëgn, tó sö personal dependënt o s'anuzé de prestaziuns de laûr autonom, inće s'anuzan de sü mëmbri. 3)

(1) Cun organisaziun de volontariat mìnon vigni organism metü adöm lediamënter por fà le laûr preodü dal articul 2, che s'anüza a na moda determinanta dantadöt dles prestaziuns personales, volontares y debann de sü mëmbri.

(2) Les organisaziuns de volontariat po surantó la forma iuridica che ares arata plü adatada por arjunje sü fins, tl respet dl limit de compatibilité cun le fin de solidarieté.

(3) Pro les acordanzes di mëmbri mëssel gnì preodü espressamënter, tl at costitutif o tl statut, dlungia ći che vëgn desponü dal Codesc zivil por les formes iuridiches desvalies, che l'organisaziun n'à nia n'intenziun de davagn y é strotorada a na moda democratica, che les inćiaries vëgn surantutes tres lita y zënza compëns, che les prestaziuns di mëmbri é debann, i criters d'amisciun y de estlujiun de chisc, sü dërć y sü dovëis. Al mëss inće gnì fat fora le dovëi da realisé le decunt economich y patrimonial, olache an vëiga i bëgns, i contribuć o les arpejuns, sciöche inće sües modalitês d'aprovaziun da pert dl'assemblea di mëmbri. 5)

(4) Les organisaziuns de volontariat po tó sö personal dependënt o s'anuzé de prestaziuns de laûr autonom, tan inant che al va debojëgn por so funzionamënt regolar o por cualifiché o spezialisé süa ativité.

(5) Sce l'organisaziun de volontariat vëgn lasciada tomè o sce süa ativité se röia o va fora, vëgn i bëgns che romagn do la fin dla prozedöra de licuidaziun dà, indipendentemënter da süa forma iuridica, a d'atres organisaziuns che laôra tl medemo setur o te un che ti somëia, aladô dles indicaziuns contignides tl statut o tles acordanzes di mëmbri o, sce chisc n'é nia, aladô dles desposiziuns dl Codesc zivil.

(6) Al vëgn aratè sciöche organisaziun de sostëgn sozial le ragrupamënt de dërt privat danter sogeć, metü sö sciöche assoziaziun reconesciüda o nia reconesciüda, o n'atra formaziun che à i recuisić determinà da n regolamënt d'esecuziun aposta. L'organisaziun à sciöche fin i interesc de düć zënza intenziun de davagn fajon tresfora ativitês de sostëgn sozial por i mëmbri o de terzi ti seturs preodüs dal articul 2, coma 5. 6)

(1) Les organisaziuns de volontariat tol les ressurses economiches por so funzionamënt y süa ativité da:

1. contribuć di mëmbri;
   
2. contribuć da porsones privates;
   
3. contribuć o sovenziuns de ënć o istituziuns publics, tan inant che ai vëgn ma paià por ativitês y proieć spezifics documentà;
   
4. contribuć o sovenziuns de organisaziuns internazionales;
   
5. donaziuns y arpejuns;
   
6. retüdes sön la basa de convenziuns;
   
7. entrades che vëgn da ativitês comerziales y produtives secundares che po portè pro a arjunje i mësi che va debojëgn por assiguré le funzionamënt dles ativitês de volontariat organisades.
   

(2) Ales organisaziuns de volontariat zënza personalité iuridica che é scrites ite tl register provinzial ti vëgnel apliché les desposiziuns preodüdes dal articul 5, comesc 2 y 3 dla lege di 11 d'agost dl 1991, n. 266, por ći che reverda la cumpra de bëgns imobii y de bëgns mobii registrà, sciöche inće por azetè donaziuns y arpejuns cun dërt d'inventar.

(3) Ales organisaziuns de volontariat ti vëgnel apliché, tan inant che ares é compatibles cun sü fins, les desposiziuns di articui 8 y 9 dla lege di 11 d'agost dl 1991, n. 266.

(1) Al vëgn metü sö le register provinzial dles organisaziuns de volontariat, che é partì sö insciö:

1. assistënza soziala y sanitara;
   
2. cultura, educaziun y formaziun;
   
3. sport, recreaziun y tëmp lëde;
   
4. proteziun zivila, sconanza dl'ambiënt y dla contrada;
   

(2) Le register provinzial vëgn tignì dala Repartiziun provinziala Presidënza y l'iscriziun vëgn desponüda dal Presidënt dla junta provinziala.

(3) L'iscriziun te öna o de plü seziuns dl register provinzial é la condiziun che va debojëgn por benefizié dles alisiraziuns fiscales, sciöche inće le titul preferenzial por stlü jö convenziuns preodüdes dal articul 6 de chësta lege. 8)

(4) Al po se scrì ite tl register provinzial les organisaziuns de volontariat che à i fins preodüs dal articul 1 sön le teritore provinzial, che laôra da altamo un n ann, che à les condiziuns preodüdes dal articul 3 y che ajunta ala domanda na copia dl at de costituziun y dl statut o dles acordanzes di mëmbri. 9)

(5) Les organisaziuns scrites ite tl register provinzial mëss dè jö na relaziun anuala sön le laûr fat y tignì sö la documentaziun de dötes les ofertes privates preodüdes dal articul 4, coma 1, cun l'inom de che fej l'oferta, tan inant che la porsona che fej l'oferta ne damana nia da romagne anonima.

(6) Le Presidënt dla junta provinziala desponn d'ofize, s'anuzan di ofizi provinziai y dles strotöres de d'atres istituziuns publiches periferiches competëntes en materia, la revijiun periodica dles seziuns dl register provinzial por controlè sce les organisaziuns scrites ite sön la basa di criters, che gnarà stlaris cun regolamënt d'esecuziun de chësta lege, à ćiamò les condiziuns y fej efetivamënter l'ativité de volontariat.

(7) Le Presidënt dla junta provinziala desponn, sce al é de gran iregolaritês pro les ativitês de volontariat o sce al n'é nia plü les condiziuns scrites dant, do avëi aldì l'Osservatore provinzial preodü dal articul 8, cun provedimënt motivé, da straiché l'organisaziun de volontariat dala seziun dl register provinzial olache ara é scrita ite.

(8) Cuntra le provedimënt de refodada d'iscriziun o de straicada dal register provinzial ti pol gnì fat recurs, te trënta dis da süa comunicaziun, ala junta provinziala, che se lascia adintëne te sessanta dis da süa presentaziun. L'organisaziun de volontariat po contestè la dezijiun dla junta provinziala pro l'autorité iudiziara competënta, te trenta dis da süa comunicaziun aladô dles modalitês preodüdes dal articul 6, coma 5 dla lege di 11 d'agost dl 1991, n. 266.

(9) La Presidënza dla junta provinziala mëss ti ortié vigni ann al Osservatore nazional por le volontariat, aladô dl articul 6 dla lege di 11 d'agost dl 1991, n. 266, na copia ajornada dl register preodü da chësc articul.

(10) Al vëgn metü sö le register provinzial dles organisaziuns de sostëgn sozial, olache al vëgn scrit ite les organisaziuns che à les condiziuns damanades da chësta lege y da so regolamënt d'esecuziun, che à süa sënta y laôra tla provinzia y é gnüdes metüdes sö dan da altamo sis mëisc. 10)

(11) L'iscriziun tl register dles organisaziuns de sostëgn sozial é la condiziun che va debojëgn por podëi s'anuzé dles alisiraziuns fiscales aposta preodüdes dala normativa statala che alda laprò. I sogeć scrić ite tl register provinzial dles organisaziuns de sostëgn sozial ne mëss nia paié l'IRAP, aladô dl articul 23 dla lege di 7 de dezëmber dl 2000, n. 383, tl respet dl dovëi da dè jö la detlaraziun dl davagn, inće por determiné l'imponibl IRAP. 10)

(12) Al vëgn ma conzedü l'iscriziun te un n register preodü dai comesc 1 y 10. 10)

(13) La junta provinziala mët sö n fonds de garanzia tres chël che an po paié fora fonds por curì en pert i dagns straordinars gaujà dal'ativité dles organisaziuns dades dant dessura. La condiziun por ti rové pormez a chësc fonds de garanzia é che na pert di dagns vëgnes curida dal’assiguraziun dl’organisaziun de volontariat o dal’assiguraziun dl’organisaziun de sostëgn sozial. Les atres condiziuns por apliché la mosöra nominada denant gnarà fates fora cun deliberaziun dla junta provinziala. I fonds che va debojëgn gnarà tuć ćina a n limit mascimal de 1.000.000 euro por vigni caje, dal fonds de resserva por spëises nia preodüdes dl bilanz provinzial, sön domanda dl'assoziaziun interessada y sön la basa de n arat dl Osservatore provinzial dl volontariat, preodü dal articul 8, sciöche inće de n decret dl Presidënt dla Provinzia, cun chël che al vëgn fat fora la soma. 11)

(1) L'aministraziun provinziala, i ënć locai y i atri ënć publics responsabli dla gestiun di sorvisc tl teritore provinzial ti seturs preodüs dal articul 5, coma 1 de chësta lege, po stlü jö convenziuns cun organisaziuns de volontariat scrites ite da altamo sis mëisc tl register provinzial, che desmostra d'avëi assà ressurses umanes y la capazité da laurè.

(2) Tla convenziun él:

1. l'oget y la dorada dla convenziun;
   
2. le numer y la cualificaziun dl personal volontar y eventualmënter de chël dependënt o autonom adorè dal'organisaziun de volontariat;
   
3. les modalitês por che l'ënt responsabl di sorvisc mëtes a desposiziun so personal y por ti rové pormez ales strotöres y süa adoranza, por l'informaziun che va debojëgn por sostignì le sorvisc fat dai volontars;
   
4. les modalitês por desfiré les ativitês de volontariat ti sorvisc o por la singola porsona o la jënt dl post, garantin la continuité y le respet di dërć y dla dignité de che che les anüza;
   
5. la regolamentaziun di raporć finanziars danter l'ënt publich y l'organisaziun de volontariat, che mëss inće preodëi fora de chël:
   
   1. la retüda eventuala, parziala o totala, dles spëises de preparaziun y de gestiun dles strotöres, dles atrezadöres y di sorvisc che va debojëgn por l'ativité oget dla convenziun;
      
   2. la retüda di cosć por les prestaziuns de laûr dependënt o autonom adorè tl'ativité de volontariat, ma ti limić che vëgn reconesciüs nezesciars por sostignì y garantì le funzionamënt regolar dl'ativité o che va debojëgn por la cualifiché o la spezialisé;
      
   3. la retüda, a öna cun l'ënt che fej la convenziun, dles spëises sostignides veramënter dai volontars por la formaziun y l'ajornamënt, ti limić reconesciüs dal'organisaziun de portignënza; al ne po nia gnì paié fora compënsc, bel anfat sot ći forma.
      
   4. es modalitês de paiamënt di finanziamënć, inće damperfora;
      
6. le dovëi di volontars y dl personal adorè por l'ativité de volontariat da jì a cursc de formaziun organisà dala Provinzia o da d'atri ënć o assoziaziuns reconesciüs d'ütl por le funzionamënt regolar dl'ativité oget dla convenziun;
   
7. les relaziuns regolares sön l'ativité fata dal'organisaziun de volontariat;
   
8. les modalitês de control dl ënt o istituziun publics sön le desfiramënt regolar y sön la cualité dl'ativité de volontariat dla convenziun.
   

(1) L'aministraziun provinziala y i ënć publics che depënn dala Provinzia, o olache l'ordinamënt é de süa competënza legislativa o delegada, y les aziëndes che alda laprò, inće cun n ordinamënt autonom, sciöche inće i ënć sotmetüs a verda y sconanza dla Provinzia, po stlü jö convenziuns dantadöt cun organisaziuns de volontariat che laôra dantadöt tla provinzia de Balsan y che é ite te so contest sozio-economich, che à strotöres organisatives y tecniches, sciöche inće ressurses umanes dër spezialisades, da definì cun regolamënt d'esecuziun de chësta lege, por surantó i compić ti seturs dà dant tl articul 5, lëtra a), b), c) y d).

(2) Les convenziuns vëgn stlütes jö dantadöt cun les organisaziuns de volontariat che laôra sön le teritore diretamënter interessè dales ativitês oget dla convenziun, che desponn de n numer de volontars adatè al bojëgn y a assiguré la continuité dles prestaziuns.

(3) La junta provinziala emanëia, do avëi aldì l'Osservatore provinzial dl volontariat preodü dal articul 8 suandënt, les diretives por assiguré tl cheder dla convenziun, le pluralism dles organisaziuns de volontariat, le respet dla dignité y dles convinziuns etiches, religioses y culturales di utënć y l'osservanza dl socrët profescional.

(4) Les prestaziuns dles organisaziuns de volontariat tl cheder dla convenziun é, tl respet dla facolté dla junta provinziala da fissé na cuota de retüda dles spëises debann por düć i zitadins talians, i apolig y i foresti residënć o che sojornëia, inće temporaneamënter, tl teritore provinzial.

(5) Les organisaziuns de volontariat che fej intervënć assistenziai, sanitars, formatifs, educatifs o culturai, mëss assiguré, olache ara va, l'adoranza de porsones che fej volontariat che sais da comuniché tl lingaz dla porsona che s'anüza dl'ativité de volontariat.

(1) Al vëgn metü sö pro la Repartiziun provinziala Presidënza l'Osservatore provinzial dl volontariat, che mëss:

1. fissé i criters por tignì le register provinzial dles organisaziuns de volontariat;
   
2. propone, sostignì y realisé scomenciadies de formaziun y ajornamënć dles porsones che fej volontariat por la prestaziun di sorvisc;
   
3. promöie n'informaziun adatada sön l'ativité de volontariat, inće tres i mass-media y tl cheder dles manifestaziuns publiches;
   
4. portè pro al sostëgn y al svilup dl volontariat;
   
5. laurè fora propostes por sostignì le sorvisc zivil volontar tla provinzia de Balsan;
   
6. dè jö arać sön les propostes programatiches y sön la formaziun de che che fej n sorvisc zivil y sozial de süa buna. 12)
   

(2) Les funziuns aministratives de sostëgn dl Osservatore provinzial dl volontariat vëgn surantutes dala Presidënza dla junta provinziala, che po s'anuzé inće dl personal, di mesi y di sorvisc metüs a desposiziun dai assessurs provinziai/dales assessuries provinziales competënć.

(3) L'Osservatore provinzial dl volontariat é metü adöm da:

1. le Presidënt dla Provinzia, che é a će;
   
2. le diretur dla Repartiziun provinziala Presidënza, sciöche vizepresidënt;
   
3. cin esperć de lies, nominà dala junta provinziala;
   
4. trëi rapresentanć di ënć de sorvisc zivil. 13)
   

(4) L'Osservatore provinzial dl volontariat vëgn nominé dala junta provinziala y romagn en ćiaria por la dorada dla legislatöra tratan chëra che al vëgn nominé. Süa composiziun mëss s'adatè ala consistënza di grups linguistics dla provinzia aladô dl'ultima cumpëda dla jënt. Te vigni caje vëgnel garantì la rapresentanza dl grup linguistich ladin.

(5) L'Osservatore provinzial dl volontariat vëgn metü sö cun la maioranza assoluta de sü componënć y deliberëia cun la maioranza assoluta di presënć. Les funziuns de secretêr dl Osservatore vëgn destrigades da n funzionar provinzial dla Presidënza dla junta provinziala, che é almanco dl setimo livel.

(6) Ai componënć dl Osservatore provinzial dl volontariat ti vëgnel dè, tan inant che al ti speta, le paiamënt y l’indenité de sorvisc foradecà preodüs dales normes provinziales varëntes.

(1) Al personal dla Provinzia y di ënć publics che depënn da d'ëra, o olache l'ordinamënt é de süa competënza legislativa o delegada, y dles aziëndes inće cun ordinamënt autonom, che fej pert de organisaziuns de volontariat scrites ite tl register provinzial, ti pol gnì conzedü n orar de laûr flessibl y i turnus preodüs dal contrat coletif de setur, tan inant che ai va a öna cun i bojëgns de sorvisc y po ma se referì ai sorvisc de emergënza o de gran valur sozial.

(1) Tla Provinzia vëgnel metü sö le Fonds spezial preodü dala lege di 11 d'agost dl 1991, n. 266, olache al röia les somes che i ënć preodüs dal articul 12, coma 1 dl decret legislatif di 20 de novëmber dl 1990, n. 356, y les casses de sparagn preodüdes dal articul 15 dla lege di 11 d'agost dl 1991, n. 266, che laôra tl teritore provinzial, à da paié.

(2) Le fonds mëss sostignì les organisaziuns de volontariat che é scrites ite tl register provinzial aladô dl articul 5; les diretives y i criters de sostëgn vëgn fissà dal comitê de gestiun dl Fonds spezial por le volontariat. 14)

(3) Le Presidënt dla junta provinziala, o n so deleghè, é a će dl comitê de gestiun dl Fonds spezial. La junta provinziala nominëia cater rapresentanć dles organisaziuns de volontariat, scrites ite tl register provinzial, plü rapresentades tl raiun provinzial, por le comitê.

(4) La composiziun dl comitê mëss s'adatè a ći che vëgn fat fora tl articul 2, coma 2 dl decret dl Minister dl Tesur di 21 de novëmber dl 1991 y ala consistënza di grups linguistics tla provinzia, aladô dl resultat dl'ultima cumpëda generala dla popolaziun.

(1)(2)(3)(4)15)

(5) La conzesciun de contribuć, sovenziuns y d'atri aiüć de carater economich, cun laprò le mëte a desposiziun debann imobii por fà ativitês de volontariat, vëgn regolamentada dales leges provinziales d'intervënt te vigni setur, s'assiguran a vigni moda le finanziamënt dles ativitês y scomenciadies oget dles convenziuns cun les organisaziuns de volontariat, aladô dl Art. 7

(1) Por eserzité les funziuns odüdes danfora dal articul 3 dl decret dl Presidënt dla Republica di 28 de messè dl 1999, n. 352, coliades cun i raporć de cooperaziun preodüs dal articul 8 dl medemo decret, po la Provinzia stlü jö cun l'ofize nazional por le sorvisc zivil na convenziun y protocoi d'intenüda spezifics, che vëiga danfora inće desposiziuns sön la dotaziun dl personal y sön la gestiun dles spëises y la partezipaziun di sorvisc provinziai competënć, dantadöt la formaziun profescionala, la sanité y la proteziun zivila.

(2) Por arjunje n bun coordinamënt danter le sorvisc publich y les organisaziuns de volontariat, po la Provinzia mëte sö n'agenzia por le sorvisc zivil, gestida diretamënter dala Repartiziun Presidënza pro l'aministraziun provinziala, a öna cun l'ofize nazional por le sorvisc zivil.

(3) Por i fins preodüs dai comesc 1 y 2 vëgnel autorisé la spëisa de 100 miliuns de lires a ćiaria dl eserzize finanziar 2000 sön le capitul 51495. La spëisa a ćiaria di eserzizi finanziars suandënć vëgn autorisada cun la lege finanziara anuala. 16)

(1) Les organisaziuns de volontariat che à ciafè le reconescimënt de idoneité aladô dl articul 3 dla lege provinziala dl 1. de merz dl 1983, n. 6, po, te dui agn dala jüda en forza de chësta lege, adatè i ać costitutifs o i statuć, ales desposiziuns preodüdes dai articui 1 y 2 de chësta lege, por l'iscriziun d'ofize tl register provinzial.

(2) Les convenziuns stlütes jö danter les organisaziun de volontariat y i ënć responsabli di sorvisc, aladô dl articul 5 dla lege provinziala dl 1. de merz dl 1983, n. 6, ne po nia gnì renovades chitamënter, sce les convenziuns ne respetëia nia i contignüs preodüs dal articul 3 de chësta lege, y les organisaziuns de volontariat n'à nia adatè i statuć aladô dl coma 1 de chësc articul.

(3) Les organisaziuns de volontariat scrites ite tl register aposta n'à nia debojëgn dl'autorisaziun preodüda dal articul 20, coma 2 dla lege provinziala di 30 d'aurì dl 1991, n. 13.

(4) Tl respet de ći che vëgn preodü dai comesc 1 y 2, vëgnel abroghè la lege provinziala dl 1. de merz dl 1983, n. 6.

(5)  Canche al vëgn apliché por le pröm iade chësta lege y ma por la dorada dla legislatöra da śëgn, vëgn i rapresentanć dles organisaziuns de volontariat tl Osservatore provinzial, preodü dal articul 8, coma 3 y tl comitê de gestiun dl Fonds spezial preodü dal articul 10, coma 3, designà dales organisaziuns de volontariat che laôra tla provinzia, independentemënter da süa iscriziun tl register provinzial.

(6) Al vëgn abroghè l'articul 35 dla lege provinziala di 13 de dezëmber dl 1985, n. 17, sostituì dal articul 9, dla lege provinziala di 11 de messè dl 1991, n. 19, y l'articul 11 dla lege provinziala di 18 d'agost dl 1988, n. 33.

(7) I recuisić damanà por mëte sö n'organisaziun de sostëgn sozial, les desposiziuns por tignì le register dles organisaziuns, les modalitês d'iscriziun y de straicada dal register y ći che va ćiamò debojëgn da regolamentè, vëgn stabilis cun un o de plü regolamënć d'esecuziun da emanè te 180 dis dala jüda en forza de chësta lege. 17)

Chësta lege gnarà publicada tl Boletin Ofizial dla Regiun. Vignun a chël che al ti speta mëss la respetè y la fà respetè sciöche lege dla Provinzia.